ალაზანი

ალაზანი
დოხასიათაფა
სიგჷრძა	390 კმ
გოჸორიშ ფართობი	11 800 კმ²
წყარიშ ნაკადი
ოდუდე	კავკაციონი (საქორთუო)
ინაკათუუ	მინგეჩაურიშ წყაროთხილუ (აზერბაიჯანი).
ორენი
ქიანეფი	საქორთუო, აზერბაიჯანი

ალაზნის ველი

ალაზანი — წყარმალუ ბჟაეიოლ საქორთუოს დო აზერბაიჯანს, ნორთიშურო მეურს თე ქიანეფიშ ხურგიშ მანგას. ალაზანიშ სიგირძა რე 390 კმ, გოჸორიშ ფართობი — 11 800 კვ.კმ, წყარიშ ოშქაშე ხარჯი — 98 კუბ.მ/წმ. ეთმიჯუმუაფუ შხვადოშხვანერი წყუთ (თირი, დიხაშთუდონი წყარით დო ათაში უკული), გიმირინუაფუ ოწყარალო. ალაზანიშ გოხოლუაშ დჷკჷეფი მებინეხობაშ მუნიციპალიტეტი რე. ოდუდე უღუ კავკაციონიშ გვალას, კონკა დიდი ბორბალოშ ბჟაეიოლ კართეს. ჟინი მალობას გვალაშ წყარმალუ რე, უკული გიშმურს ალაზანიშ დჷკიშა დო ინოჸელებუ. აკათუ მინგეჩაურიშ წყაროთხილუს (აზერბაიჯანი). წყაროთხილუშ ეგაფაშახ ალაზანი ბონას ტკვარს აკათუდუ.

ალაზანი ეთმიჯუმუაფუ დიხაშითუდონი, ჭვემაშ დო თირიშ წყარით. წყარიშ გიმნაკათაშ მეხოლაფირო 40% მოურს დიხაშთუდონი წყარიშა, ჭვემაშა დო თირიშა — 30-30%. წყარალა უჩქჷ აფუნიშ დო ზარხულიშ მაართა გვერდის, წყარმოლაფა - დამორჩილს. ზოთონჯი წყარმარჩხა რე. აფუნს მოურსუ წყარიშ გიმნაკათაში 38.3%, ზარხულს — 29.1%, დამორჩილს — 20.3%, ზოთონჯის — 12.3%. ალაზანი ვეჸინუ.

ალაზანიშ კვარჩხანი ნადუეფი რე: სტორი, ლოპოტა, ინწობა, ჩელთი, დურუჯი, ავანისხევი, კაბალი, მაწიმისწყალი, გიშისწყალი (აგრიჩაი) დო შხვა. მარძგვანი — ილტო, თურდო, კისისხევი, ჭერმისხევი, დო შხვა. კანკალე ნადუ რე პოპორული (ღვარცოფული) (მაგ., დურუჯი). ალაზანს მინგეჩაურიშ წყაროთხილუშა ირწანურო მიშმუღუ 2,5 მლრდ მ³ წყარი. გიმირინუანა ოწყარალო.

ლიტერატურა

• აფხაზავა ი., ქორთული სხუნუეფიშ ენციკლოპედია, ტ. 1, ხს. 262, ქრ., 1975 წანა.
• აფხაზავა ი., ენციკლოპედია „საქართველო“, გვ. 88, თბ, 1997