არნოლდ ჩიქობავა

ვიკიპედია ხასჷლაშე
გეგნორთი: ნავიგაცია, გორუა

არნოლდ ჩიქობავა (14 მელახი, 1898 — 5 გერგობათუთა, 1985) — სსრკ-ს გიშარჩქინელი ნინათმენცარი, ფილოლოგი დო ოჯარალუ მოქარანე, საქორთუოშ მენცარეფიშ აკადემიაშ ართ-ართი დუმარცხუაფალი, აკადემიკოსი, იბერიულ-კავკასიური ნინათმენცარობაში მენცარული სკოლაშ დუმარსხუაფალი, საქორთუოშ დოინალაფირი მოქარანე, ფილოლოგიაშ მენცერობაშ დოქტორი, პროფესორი.

დებადჷ 1989 წანას ოფუტე საჩიქობავოს, სენაკიშ რაიონს, სამარგალოს. 1922 წ. გათუ ქართიშ სახენწჷფო უნივერსიტეტი (ქსუ). 1926-33 წანეფს რდჷ ქსუ-შ დოცენტი, უკულიანი წანეფს, რინაშ ეკონიაშახ, თე უნივერსიტიშ პროფესორი. 1933-60 წანეფს დუდმახვენჯენდ ქსუ-შ კავკასიოლოგიაშ კათედრას. 1929 წანას მიღჷ ფილოლოგიაშ მენცარობაშ დოქტორიშ ხარისხი.

1936-85 წანეფს ქართიშ ნინეფიშმენცარობაშ ინსტიტუტიშ იბერიულ-კავკასიური ნინეფიშ გჷნართაშ გამგე რდჷ, 1950-52 წანეფს თე ინსტიტუტიშ დირექტორი. 1941 წანას პატჷნი არნოლდ გეგშაგორეს საქორთუოშ მენცარობაშ აკადემიაშ ართ-ართი აკადემიკოსო. 1950-63 წანეფს აკადემიაშ პრეზიდიუმიშ მაკათური რდჷ.

პროფესორი ჩიქობავა რდჷ ბერლინიშ უნივერსიტეტიშ საპატიო დოქტორი (1960), დიდი ბრიტანეთიშ ომაფე ფილოლოგიური ჯარალუაში საპატიო მაკათური (1968), საქორთუოშ სახენწჷფო პრემიაშ ლაურეატი (1971), მოსკოვიშ სახენწჷფო უნივერსიტეტიშ ლომონოსოვიშ პრემიაშ ლაურეატი (1951).

არნოლდ ჩიქობავაშ მენცარული გითოგორუაშ ჯინჯი თემეფი რდჷ:

  • იბერიულ-კავკაციური ნინეფი
  • ნინეფიშმენცარობაშ თეორიული პრობლემეფი
  • რუსთველოლოგია
  • ქორთული დო კავკასიური ნინეფიშ გრამატიკა
  • ქორთული ნინაშ დო ლიტერატურაშ გრამატიკა
  • ქორთული ნინაშ დო ლიტერატურაშ ისტორია
  • ბასკური-კავკასიური ჰიპოთეზა
  • ლექსიკოგრაფია და ათაშ უკული

არნოლდ ჩიქობავა რდჷ სუმოშიშახ მენცარულ-კილაგორუა ნახანდაშ, ათნეფშე ვითაანთხ მონოგრაფიაშ ავტორი, ოირქიანე მენცარული ჟურნალიშ „იბერიულ- კავკასიური ნინათმენცარობაშ მაწარმოწანეშ“ (თე ჟამს „იბერიულ-კავკასიურ ნინათმენცერობაშ“) დუმარსხუაფალი დო უთირალი თარი რედაქტორი. დოღურჷ 1985 წანას ქართის. დასაფულებური რე ქსუ-შ ბაღის.

რესურსეფი ინტერნეტის[რედაქტირაფა]