გალი

ვიკიპედია ხასჷლაშე
გეგნორთი: ნავიგაცია, გორუა

გალი (ქორთულო: გალი) — ნოღა საქორთუოს, აფხაზეთიშ ავტონომიური რესპუბლიკაშ გალიშ მუნიციპალიტეტიშ ადმინისტრაციული ცენტრი. 1991 წანაშოთ ოხორანდჷ 15 700 შური კოჩი (99% ქორთუ; 1939 წ. – 3 800; 1959 წ. – 9 400; 1970 წ. – 13 600; 1974 წ. – 13 800). ნოღაშე ნტინელი რე მუში მახორობაშ გვერდიშ უმოსი, ოდო აფხაზეთიშ 2003 წანაშ მახორობაშ ეჭარუათ სქჷდუდუ 7 200 მახორუ. ნოღა დოკიდილი რე სამურზაყანოშ რზენს, ერწყარპიჯის, ქართი–სოხუმიშ რკინაშარაშ დო ოავტომობილე მაგისტრალს. ზუღაშ ეშე 48 მ.–შახ. სოხუმშახ მეუძჷ 77 კმ.

ჰავა ზუღაშ ლამე სუბტროპიკული რე. ოშქაშეწანური ტემპერატურა რე +13,7 გრადუსი, ღურთუთაშ ოშქაშე ტემპერატურა +4,5 გრადუსი, კვირკვეშ +22,8 გრადუსი. ნოლექეფი – 1646 მმ წარმოწანას.

გალიშ ელ–მოლუს კოჩი დიო ხოლო პალეოლითიშ ბორჯის ნოხორუე. ნაძირეფი რე ნეოლოთიშ ბორჯიშ კაჟიშ ხეჭკუდეფი დო ლენჯიშ მოღეეფი. ნოღა მოშინელი რე იტალიური მისიონერიშ არქანჯელო ლამბერტიშ 1654 წანაშ რუკას გოგიელიშ ჯოხოთ. თე ბორჯის სამარგალოშ (ოდიშიშ) ოთარე მიშეშჷ. 1906 წანას სამურზაყანოშ ცენტრი ოქუმშე გალშა გინიღეს. 1928–30 წანეფს გალიშ მაზრაშ ცენტრი რდჷ,1930 წანაშე – გალიშ რაიონიშ. ნოღას რე რკინაშარაშ გიორენჯი. რუსეთი–საქორთუოშ აფხაზეთიშ ლჷმაშახ გალს რდჷ თეატრი, მუხურონჩქინაშ მუზეუმი, ჩაიშ დო ეთერზეთეფიშ ქარხანეფი დო შხვა.