ზინედინ ზიდანი

ზინედინ ზიდანი

ზინედინ იაზიდ ზიდანი — (ფრანგ. Zinédine Yazid Zidane — „Zizou“) ფრანგი სპორტსმენი, რდჷ საგებიოს არძაშ უმოს ძვირო ღირაფილი მობურთე. 2001 წანას მადრიდიშ რეალქ 69 მილიონ ამერიკული დოლარი გინუჷგ იუვენტუსის.

ბიოგრაფია

ზინედინ ზიდანქ დებად საფრანგეთის, მარსელს, არძაშე უმოს გაჭირებული აკანს-კასტელანს. მუშ მასქერეფი რდეს ალჟირშე. მუმა მუშენდ უნივერმაგის. ზიდანიშ ჩქჷჩქჷუობაქ ართ ჭიჭე ბინას მუკილუ. ზიდანს ჸუნდუ ოთხი და დო ჯიმა. დუდშე ზიდანშო ბურთიშ ფუნქცია უღუდუ პლასტიკურ ბოთილს. ჩქჷჩქჷუობას ართუაფუდ ველოსპედით დო ძიუდოთ. ზიდანს ოკოდ ხვალე ართ მუდგარენი, მოუღორებუდუკო არძა, ნამუთ წოხლე აწოხვადუდჷ. 14 წანერი რდჷნ თეშ ზიდანიშ ლაჸაფით დეინტერესეს კლუბ კაენიშ სელექციონერეფქ. ართ მარაშ დაკვირაშ უკული გეგნოჭყვიდეს ზიდანიშ ეჭოფუა. 2 წანაშ უკული, 1989 წანაშ 20 მესის, ზიდანქ მაართა ლაჸაფი ილაჸაფი საფრანგეთიშ ჩემპიონატის, მუჟამც დიო 17 წანერი ხოლო ვა რდჷნ თეში. თი ბორჯის ზიდანიშ ხეშფარა რდჷ 800 ფრანკი.

იუვენტუსი

1992 წანას ზიდანქ გინილჷ ბორდოშა, ევროპაშ 1996 წანაშ ჩემპიონატიშ უკული „იუვენტუსშა.“ დუდშე გაუჭირდჷ იუვენტუსის ლაჸაფიქ, მარა უკული ბუნაშ დირიჟორო გინირთჷ.

რეალი

2001 წანაშ 9 კვირკვეს რეალიშ საპატიო პრეზიდენტიქ, ალფრედო დი სტეფანოქ ჟურნალისტეფიშ წოხლე ზიდანს გეგნოჩჷ 5-ნომერამი ფორმა. რეალქ თიმ დღაშე დიჭყჷ ზიდანშე გაფილი ფარაშ ეშაღალა. რეალიშ ფორმეფი ღირჷდ 80 დოლარი, მარა ხუთ ნომერამი ფორმეფი პრაქტიკულო ვეშიიდჷ მაღაზიეფს. ხვალე ზიდანიშ ოტელევიზიე პრეზენტაციაშე რეალქ იშუ 1 მილიონ დოლარი, ართ-ართ ოტელევიზიე არხიშე. ზიდანიშ უკულ რეალშა გინილეს რონალდოქ, ლუიშ ფიგუქ, დევიდ ბექჰემქ. ზიდანქ ჯგირო მიანწყუ რეალს, ირ მუშ ლაჸაფი სპექტაკლიშ დოდგჷმა რდჷ. სპექტაკლიქ იჸუ 2002 წანაშ ჩემპიონეფიშ ლიგაშ ფინალქ, სოდეთ ართიანს შეხვადეს რეალქ დო ლევერკუზენიშ ბაიერქ. თი ბორჯის, მუჟამც ანგარიში 1-1 რდჷ, კარლოსიშ ხასჷლაშე ინოჭირინდაფაშ უკული, ზიდანქ ნინათ ვეიჭარენ ფერ სისქვამეშ გოლი გემთიღჷ დო ხოლო ართშა ქაძირუ თელქიანას, ნამდა არძაშე უჯგუში რდჷ არძაშე უჯგუშეფ შქას. 2003 წანას ზიდანქ იჸუ ესპანეთიშ ჩემპიონქ.

ერუანული ნაკათა

1994 წანაშ 14 მარაშინათუთას უღუდუ დებიუტი ზიდანს საფრანგეთიშ ერუანულ ნაკათას, მუჟამც საფრანგეთი ჩეხეთიწკჷმა აგენდ 0-2-ს. ზიდანქ თირაფაშა მუშართჷ დო ხუთი წუთიშ დინოხოლე 2 ბურთი გემთიღჷ დო საფრნაგეთის ქულა გეიოჭოფაფუ.

2002 წანაშ თელქიანაშ ჩემპიონატიქ კრახით გეთუ ზიზუშო დო საფრანგეთიშ ნაკათაშო. ზიდანს ნაკათაშე ულა ოკოდჷ , მარა ვედჷ.

2006 წანას ჯგირო ლაჸაფენდჷ ჩემპიონატის ზიდანი, მარა ფინალს, იტალიაწკჷმა, სოდეთ გოლი მითიღჷ, ეჩხუპუ დო დუდი ქიმიოგჷ მარკო მატერაცის დო გაგშაჸათეს მოედანშე.

თე ლაჸაფით გათუ ზიდანქ კარიერა. სუმშა მეჩეს თელქიანაშ არძაშ უჯგუშ მალაჸაფეშ ტიტული, ჟირშა ევროპაშ არძაშ უჯგუშ მალაჸაფეშ ტიტული.