ლონგ-აილენდი

ვიკიპედიაშე
კინგსი, ქუინსი, ნასაუ დო საფოლკი, მეხოლაფირი თანჯეფითი.

ლონგ-აილენდი (ინგლ. Long Island - გჷნძე კოკი) — კოკი ნიუ-იორკის, ააშ, 3567 კმ² ფართობით დო 7,536 მილიონი მახორუთ (2005 წ. ცენზი). თენა უდიდაში დო არძაშე მეჭედას დოხორინელი კოკიე კონტინენტურ ააშ-ს. მახორობაშ მუდანობათ მა-17 მოსოფელს დო თე პარამეტრით აწულუანს იაპონიაშ კოკი ჰოკაიდოსი დო ქიანეფს - ირლანდიასი დო იამაიკას. ჯოხოდვალაშე გიშულირო კოკი დასაბაღო გჷნძე რე - 190 კმ, თიში სიფართა არძაშე ფართე მუკნაკვათეფს 32 კმ-იე. ლონგ-აილენდიშ აბანური ინდიალეფიშ ჯოხო რე ”პავმონავკი” (Paumonauk) დო შანენს ჩხომიშ ფორმაშ კოკის.

ლონგ-აილენდიშ ბჟადალ ნორთის იდვალუაფუ ნიუ-იორკიშ ბრუკლინიშ რაიონი (კინგსიშ ქაუნთი) დო ქუინსი (ქუინსიშ ქაუნთი); ელახიშე - ნასაუში დო საფოლკიშ ქაუნთეფი.თიშ ვემკუჯინალუო, ქოლოქვიალურო ”ლონგ-აილენდის” ვარა უბრალოდ ”აილენდის” ხვალე ნასაუსა დო საფოლკიშ ქაუნთეფს უძახუნა; ბრუკლინი დო ქუინსი გიშატებულიე, თიშენ ნამუდა თინეფი ნოღა ნიუ-იორკის ორხველუნა.

ლონგ-აილენდი ჩინაფილიე რინაშ გიშაკერძაფილო მაღალი დონეთ. 2004 წანაშო ნასაუშ ქაუნთი ნიუ-იორკიშ შტატის ართ შურ მახორუშა არძაშე უდიდარაშ ადმ. ართულო იკოროცხუდუ, ააშ-იშ მასშტაბით თე კრიტერიუმით მაამშვა რე. საფოლკიშ ქაუნთი ჯოხოგოლაფირიე კოკიშ ოძგაშეს დვალირი დიდარულ ვილეფით, თინეფ შქას ეკაღანკალიე ”ჰამპტონსი”. ფედერალური საგამოძიებო ბიუროს ინდექსიშ მიკოჯინათ ლონგ-აილენდი (ნასაუ-საფოლკი) კრიმინალიშ დონეშ სიჭიჭათ ააშ-ს მაჟირა აბანს რე.