ლონდონი

ლონდონი

ლონდონი (ინგლ. London) — დიდი ბრიტანეთიშ დო ოორუე ირლანდიაშ გოართოიანაფილი ომაფეშ ნანანოღა. იდვალუაფუ წყარმალუ ტემზას, ობჟათე-ბჟაეიოლ ინგლისის. ნოღაშ მახორობა გვალო რე 7.385.575 ადამიერი, თაურეშე 2700000 ადამიერი დინოხოლე ლონდონს ოხორანს, აგლომერაციას — 10.645.800 ადამიერ (2005 წანაშ 10 მანგი).

ნოღაშ ისტორია იჭყაფუ რომაელეფშე ლონდონიუმიშ დორცხუაფათ. ლონდონიშ ისტორიული ცენტრი რე „სიტი“, მეხოლაფირო XIX ოშწანურაშე ლონდონს ორხველჷ სიტი დო გოხოლუაშ აკანეფი. 1965 წანაშ 1 პირელს დირცხუ „კაბეტ ლონდონქ“. ლონდონქ ჟირშა ამენძელ ზარხულიშ ოლიმპიურ ლაჸაფეფს, 2012 წანას იჸი მასუმა ოლიმპიადა.

ლონდონი რე დიდი ბრიტანეთიშ ფინანსური ცენტრი დო თელქიანაშ ფინანსური ცენტრეფშე ართ-ართი. ლონდონს ართ-ართი მაჸონაფალი აბანი უკჷნებუ საგებიოს მოდაშ ინდუსტრიას. ნოღას უღუ ართ-ართი არძაშე უდიდაში ოტრანსპორტე სისტემა. ჰითროუშ აეროპორტი ართ-ართი უდიდაში რე საგებიოს მეშარეეფიშ მუდანობათ. ლონდონს რე საგებიოს არძაშ უმოსი - 480 უცხოური ბანკი.

ეტიმოლოგია

ლონდონიშ ზუსტი ეტიმოლოგია ვა რე ჩინებული. თენა უჯვეშაში ჯოხო რე დო ისტორიულ წყუეფს მა-2 ოშწანურაშე იშინუაფუ. 121 წანას ლონდინიუმი ჯოხო, მუთ რომაულ-ბრიტანული აკნაწყორა ოკო რდას. 1899 წანაშა ლონდონი ხვალე ნოღას ჯოხოდჷ, უკული თე ჯოხოქ გიფაჩჷ ოგრაფეშე დო კაბეტ ლონდონშე.

ისტორიაშახიანი ანტიკური ბორჯი

ლონდონს უჯვეშაში ბრითონული ოხორუეფი რდჷ აკოშაყარელი, მარა მაართა შხუ ოხორე იშენ რომაელეფიშ დჷნარცხუეფი რე ჩქ. წ. 43 წანას. ოხორექ რინელქ იჸუ ხვალე 17 წანას. 61 წანას თაქ იცენეფქ გამშაციეს დო ირფელი დიხაწკჷმა გამანგეს. ნოღაშ უკულიან ეკონწყუალაქ მოხვადჷ 100 წანას, მუჟამსჷთ კოლჩესტერქ ნოღა გეკჷდჷ დო მანწყუ, მუჭოთ რომიშ ართ-ართ პროვინციაშ-ბრიტანიაშ ნანანოღა. ნოღაშ მახორობაქ მალას ქჷდიჭყჷ მოძინა დო მა-2 ოშწანურაშო 60,000 კოჩის მუკულუ.

შქა ოშწანურეფი

მა-5 ოშწანურას რომიშ იმპერიაშ დონთხაფაწკჷმა ართო ლონდონქ მალას გიჩოლჷ. მა-6 ოშწანურაშე ანგლო-საქსეფიშ ლუნდევიქიშ მახორობაქ 12,000-ს ქიმიოჭირინდუ. მა-9 ოშწანურას ნოღას ვიკინგეფი იკჷნენა დო კჷნ რომაულ მახორობაშ ფარგლეფშა ორთინუანა.

თე სტატია მერკე რე. თქვა შეგილებუნა ქიმეხვარათ ვიკიპედიას დო გაგშათინათ დო გოფაჩათ.