მარგალური ვიკიპედია

Megrelian wikipedia მარგალური ვიკიპედია
მიოწურაფუ:	xmf.wikipedia.org
კომერციული:	ვარი
საიტიშ ტიპი:	რშვილური ენციკლოპედია
რეგისტრაცია:	ვა რე უციო
ნინა:	მარგალური
მინჯე:	ფონდი ვიკიმედია
მუშობაშ დოჭყაფა:	2011 წანაშ 12 კვირკვე
სტატიეფიშ მუდანობა:	20,878
ხასჷლეფიშ მუდანობა:	38,593
რედაქტირაფეფიშ მუდანობა:	219,725
რეგისტრირაფილი მახვარებუ:	19,715
აქტიური მახვარებუ:	35
ადმინისტრატორი:	4
სიტომბა:	4.1

მარგალური ვიკიპედია — ვიკიპედიაშ მარგალურნინამი ვერსია, ნამუსჷთ დუდენს ფონდი „ვიკიმედია“. ომორსებელ პროექტიქ 2008 წანაშ ღურთუთას დირსხუ. ოფიციალურო 2011 წანაშ 12 კვირკვეს იჸუ გოტებულქ დო რანწკით 283-ა ვიკიპედია რდჷ. თი ბორჯიშო, სტატიეფიშ მუდანობა მარგალურ ვიკიპედიას 330-ის ოჭირინდუანდჷ. 2012 წანაშ ღურთუთას მუდანობაქ 1800-ის გეგნაჩირთჷ. 2012 წანაშ მანგიშო მარგალურ ვიკიპედიას 2600-შახ სტატია რდჷ დო 2012 წანაშ ქირსეთუთას სტატიეფიშ მუდანობაქ 4000-ის გეგნაჩირთჷ. 2013 წანაშ 14 კვირკვეშო სტატიეფიშ მუდანობა რდჷ 4 661. 2014 წანაშ 28 ფურთუთაშო სტატიეფიშ მუდანობა რდჷ 4725. 2015 წანაშ 4 პირელშო სტატიეფიშ მუდანობაქ 5000-ს, 2016 წანაშ 26 პირელშო 6 000-ს მიკაჩირთჷ. 2024 წანაშ 18 პირელიშო სტატიეფიშ მუდანობა 20,878 რე.

მარგალური ვიკიპედიაშ დორსხუაფაშ იდეაქ ქორთული ვიკიპედიაშ რედაქტორეფიშ ართ ნორთის გორჩქინდჷ, მორო პროექტიშ გოტებაშ მომენტის თინეფი უკვე ვა უხუჯანდეს პროექტიშ იდეას დო თიწკჷმა ირინერი რსხუ მეჭყვიდეს. თეჟამო, მარგალურ ვიკიპედიას მუსხირენ აქტიური მახვარებუ ხანდენს. თეჟამო პროექტის ჸუნს ჟირი ირალი ადმინისტრატორი.

რესურსეფი ინტერნეტის

• მარგალურ ვიკიპედიაშ დუდხასჷლა