მარი ბროსე
მარი ფელისიტე ბროსე (ფრანგ. Marie-Félicité Brosset; დ. 5 ფურთუთა, 1802, პარიზი ― ღ. 3 ეკენია, 1880, შატელრო, საფრანგეთი), ფრანგი ორიენტალისტი დო ქართველოლოგი.
ბიოგრაფია [რედაქტირაფა]
დებადჷ ხემონჭირელ ვანჭარიშ ფანიას. გურაფულენდჷ ორლეანს, უკულ სან-სულპისიენიშ ოშურიელე სემინარიას. ირჩქილუანდჷ ლექციეფს კოლეჟ დე ფრანსის. გურაფულენდჷ ჩინურ ნინას დო ლიტერატურას, უკული ხე ქიმეთხჷ ქორთულ დო სომხურს. ქჷდიგურუ პარიზის თხილერი ქორთული ხეშნაჭარეფი, გჷმაბჟინუ ქართველოლოგიური ნახანდეფი, ქორთული ნინაშ გრამატიკაშ ოხემანჯღვერეეფი. ბროსეს მუშ საქვარუას ალურდეს ჟ. ა. სენ-მარტენი დო პეტერბურგიშ მახორუ თეიმურაზ ბატონიშვილი (მეჭარ-მოჭარუათ). 1837 წანას ბროსე რუსეთშა ქიმიპეჯეს, 1838 წანას გჷშაგორეს პეტერბურგიშ მენცარობეფიშ აკადემიაშ მაკათურო ქორთულ-სომხურ ფილოლოგიაშ გინორთათ. 1839-1841 წანეფს აკადემიას დო უნივერსიტეტის იკითხჷ ლექციეფიშ ეკერეცხი (ციკლი) საქორთუოშ დო სომხეთიშ ისტორიეფშე. 1847-1848 წანეფს იშარჷ საქორთუოშა, აკოკორობუ ბრელი ეპიგრაფიკული, ნუმიზმატიკური, დოკუმენტური დო შხვა მოღეეფი დო პეტერბურგის სუმ წიგნო გჷმაბჟინუ (1849-1851). ფრანგულო გინოთანგჷ დო 1849-1858 წანეფს შქვით ტომო ბეშტჷ „ქართლის ცხოვრება,“ ვახუშტი ბატონიშვილიშ „ისტორიაშ“ გეოგრაფიაშ ნორთი დო შხვა ქორთუ ისტორიკოსეფიშ ნახანდეფი. ბროსეშ 200-შე უმოს ნახანდის აკოშაყარელი რე ბრელი კრიტიკულო გინომორსაფილი მასალა. ბროსექ წჷმე ქაწუკინჷ ქორთულ ისტორიოგრაფიას, ნუმიზმატიკას, სფრაგისტიკას, ეპიგრაფიკას დო შხვა მუმახვარე დარგეფს. გამწოჭკირჷ დო დამუშუ შქა ოშწანურეფიშ საქორთუოშ ისტორიაშ ბრელი დეტალი. დიჭყჷ „ქართლის ცხოვრებაშ“ კრიტიკული დოგურაფა, ქოცადჷ საქორთუოშ ისტორიაშ კურსიშ ჭარუა. კაბეტი თია მიშეღჷ ბროსექ ქორთული ნინაშ დო ლიტერატურაშ დოგურაფაშ ამბეშა. 1834 წანას პარიზის გჷმაბჟინუ თე თემაშა მუშ ნახანდი.
ლიტერატურა [რედაქტირაფა]
- იოსავა ნ., ხანთაძე შ., ქორთული სხუნუეფიშ ენციკლოპედია, ტ. 2, ხს. 535—536, ქართი, 1977 წანა.
