მუხუდო

მუხუდო

მუხუდო (Glycine) - ტყამ მაფალუეფიშ გვარი პარკამეფიშ ფანიაში. აკმოდირთუ მუზმარენ ვითარ სახეობაშე. ფართასიე გოფაჩილი კულტურული მუხუდო, ნამუშ შურობუმუთ ჩინეთი რე. ირთუ ოთხ თუდონსახეობათ: კორეული, მანჯურიული, ჩინური დო ინდური. ართწანამ სოიაშ სიმაღალა 0,2-2 მეტრიშახ ოჭირინუანს. პარკი ღია ვარა რუმე უჩა რე, დინოხოლე რე 2-3 (ვარა 1-4) ღია ფერიშ კაკალი. სინთეში დო ტენიშ მაჸოროფუ რე. ჯგირო ირდუ შხვადოშხვა ტიპიშ ნერჩის ( მჟავე, ონტყოლაშეამი დო ბიცობი ნერჩეფიშ მეტი). სოია ტექნიკური, ოჩმალი დო სიდერალური კულტურა რე. კაკალს 24-45% ცილა რე, 20-32% - ნოშკერწყარეფი, 13-37% ცხიმი. იკათუანს D, B, E დო შხვა ვიტამინეფს. საქორთუოს გოფაჩილ ჯიშეფიშე მენორსამიე იმერული, გურული, ჭიათურაშ, მოწინავე-7, კოლხიდა-4, ადრეულა-6, სენაკიშ და შხვა.