პერუ-ბოლივიაშ კონფედერაცია

პერუ-ბოლივიაშ კონფედერაცია ესპ. Confederación Perú-Boliviana კონფედერაცია
←   ← 9 მესი 1836 — 25 მარაშინათუთა 1839 →   →
შილა გერბი
ნანანოღა	ტაკნა
ნინა	ესპანური
რელიგია	კათოლიციზმი
დუდალაშ ფორმა	რესპუბლიკა
პრეზიდენტი
- 1836 - 1839	ანდრეს დე სანტა კრუსი

პერუ-ბოლივიაშ კონფედერაცია (ესპ. Confederación Perú-Boliviana) - სახენწჷფო ობჟათე ამერიკას, არსებენდჷ 1836–1839 წწ. თე სახენწჷფოქ აკიქიმინჷ ჟიმოლენი დო გიმენი პერუშ დო ბოლივიაშ გოართოიანაფაშ შედეგო. სახენწჷფოშ მადუდე დო კონფედერაციაშ აკოქიმინუაშ თარი იდეოლოგი რდჷ - ანდრეს დე სანტა კრუსი. რესპუბლიკაშ ნანანოღა – ტაკნა, ნამუთ ალმახანს პერუშ ტერიტორიას იდვალუაფუ.

წიმიისტორია

კონფედერაციული სახენწჷფოშ აკოქიმინუაშ იდეა პერუშ ლიდერეფს ენუხედეს ჭკუაშა, მარა ხუჯის ვედმუკინანდეს ბოლივიაშ მადუდეეფი, თიშენი, ნამჷდა ბოლივიარეფს თე კონფედერაციას, მაჟიახარისხამი როლი მითმიაჩამუდჷ. პერუს პოლიტიკური ვასტაბილურობაშ ნძალათ, ბოლივიაშ თარობაშ გომანგარაფათ დო ანდერს დე სანტა კრუსიშ ჭყოლოფუათ, სიტუაციაქ ჯინჯიერო დითირუ დო უკვე ბოლივიაშ პრეზიდენტი, ანდრეს დე სანტა კრუსი მუშ პიჯალეფს წჷმარინუანდჷ.

პოლიტიკური სტრუქტურა

კონფედერაციული სახენწჷფო

კონფედერაციულ სახენწჷფოქ აკიქიმინჷ ხეშულობაშ გორთუალაშ შედეგო:

• ხეშულობაშ მადუდე - გამაშმაგაფალი რდჷ კონფედერაციულ სახენწჷფოშ თხილუაშე.
• ემაჸონაფალი ხეშულობა - ასრულენდჷ თარ ოთხილუე ფუნქციას, სახენწჷფოშ უნჩაშწკჷმა, თიჯგურა ოკითხეფს მუჭოთიე - სახენწჷფოშ დო ოურდუმე ნძალეფიშ მართუა დო მინისტრეფიშ სხუნუეფიშ დუდალა.
• კანონდუმადვალი ხეშულობა - აკმოდირთუდჷ ჟირპალატიან წჷმმარინაფალი კონგრესშე.
• სასამართალე ხეშულობა - კონფედერაციაშ უმაღალაში სასამართალოშ როლს ასრულენდჷ.

კონფედერაციული სახენწჷფოშ თარი ნებაგოქუნელობეფი გოხურგელი რდჷ კონფედერაციაშ თარი კანონით. შხვა სახენწჷფობურ ნებაგოქუნელობეფს, კონფედერაციაშ მაკათური ქიანეფი ახორციელენდეს, მუნეფიშ იურისდიქციაშ თუდო.

მაკათური ქიანეფი

კონფედერაციაქ აკიქიმინჷ სუმ სახენწჷფოშე: ოორუე პერუშ სახენწჷფო, ობჟათე პერუშ სახენწჷფო დო ბოლივიაშ სახენწჷფო

ოორუე პერუშ სახენწჷფო

ოორუე პერუშ სახენწჷფო აკმოდირთუდჷ პერუშ ჸოფილი დეპარტამენტეფშე - ლა-ლიბერტადი, ამაზონასი, ლიმა დო ხუნინი, სახენწჷფოშ ნანანოღათ ქჷდარსხუეს ნოღა ლიმა. სახენწჷფოს ოორუეშე უხურგანდჷ ეკვადორი დო ბჟაეიოლშე - ბრაზილია.

ოორუე პერუშ სახენწჷფოშ პრეზიდენტეფი რდეს:

• ლუის ხოსე დე ორბეგოსო ი მონკადა (21 მარაშინათუთა 1837 - 1 ეკენია 1838); დო
• ხოსე დე ლა რივა აგუერო (11 მარაშინათუთა 1838 - 24 ღურთუთა 1839).

ოორუე პერუშ რესპუბლიკას, პერუშ რესპუბლიკაშ ოფიციალური სიმბოლოეფი უღუდჷ.

• 
  შილა
• 
  გერბი

ობჟათე პერუშ რესპუბლიკა

ობჟათე პერუშ სახენწჷფო აკმოდირთუდჷ პერუშ უჯვეშაშ დეპარტამენტეფშე - არეკიპა, კუსკო, აიაკუჩო დო პუნო, სახენწჷფოშ ნანანოღათ ქუდარსხუეს ნოღა ტაკნა.

ობჟათე პერუშ რესპუბლიკაშ პრეზიდენტეფი რდეს:

• რამონ ჰერერა (17 ეკენია 1837- 12 გჷმათუთა 1838).
• პიო დე ტრისტანი (12 გჷმათუთა 1838 - 23 ფურთუთა 1839).

სიჩუანიშ ასამბლეაქ დეკრეტი გიშაშქჷ კონფედერაციაშ სიმბოლოეფიშ გეშა, ნამუშ მეჯინათ სახენწჷფო შილას, ბოლივიაშ დო პერუშ სახენწჷფოეფიშ შილეფიშ აკობუნილი ფერი უღუდუკო ოკო დო ახალი გერბი მიღესჷ.

• 
  შილა
• 
  გერბი

ბოლივიაშ სახენწჷფო

ბოლივიაშ სახენწჷფოქ კონფედერაციას ქაკათჷ, მუჭოთ კონფედერაციულ სახენწჷფოქ (ბოლივიური სახენწჷფო), ნამუთ აკმოდირთუდჷ გეჸვენჯი დეპარტამენტეფშე - კოჩაბამბა, ჩუკისაკა, ლა-პასი, პოტოსი დო სანტა-კრუსი, ნანანოღა რდჷ ნოღა სუკრე.

კონფედერაციაშ აკოდგინალუაშ ბორჯის, ბოლივიაშ სახენწჷფოშ პრეზიდენტი რდჷ ხოსე მიგელ ველასკო. კონფედერაციაშა მიშულაშახ, სახენწჷფოს მუში სიმბოლოეფი ხოლო უღუდჷ.

• 
  შილა
• 
  გერბი

კონფედერაციაშ ირი მაკათური სახენწჷფოშ დორთილი დეპარტამენტეფიშ რუკა. შანილიე კანკალე ალმახანური ხურგეფი.

მაკათური სახენწჷფოფიშ ადმინისტრაციული დორთუალა

ოორუე პერუშ სახენწჷფო|	ობჟათე პერუშ სახენწჷფო|	ბოლივიაშ სახენწჷფო
ამაზონასი ლიმა ხუნინი ტრუხილიო	არეკიპა აიაკუჩო კუსკო პუნო	კოჩაბამბა ჩუკისაკა ლა-პასი პოტოსი სანტა-კრუსი

ოურდუმე ნძალეფი

მუშ ბორჯის, თე ქიანაშ ოურდუმე ნძალეფი, არძაშ უჯგუში რდჷ ნთელ ობჟათე ამერიკას დო ოორუე ამერიკას. მუჭოთ შხვა თიმ ბორჯიანი ქიანან თეშ, ოურდუმე ნძალეფიშ სტრუქტურა, რწაფუა დო ოურდუმე ტაქტიკა, ნაპოლეონიშობურ მოდელშა რდჷ გერსხილი.

რესურსეფი ინტერნეტის

• Decreto del 28 de octubre de 1836 (Establecimiento de la Confederación Perú-Boliviana) Archived 2014-02-02 ვებ-ხასჷლას Wayback Machine.
• Ley Fundamental de la Confederación Perú-Boliviana Archived 2005-03-11 ვებ-ხასჷლას Wayback Machine.
• Constitución del Estado Nor-Peruano Archived 2009-04-10 ვებ-ხასჷლას Wayback Machine.
• Constitución del Estado Sud-Peruano (1836) Archived 2014-04-23 ვებ-ხასჷლას Wayback Machine.
• La guerra contra la Confederación peruano-boliviana
• Reconocimiento al Ejército Unido Restaurador Archived 2007-09-26 ვებ-ხასჷლას Wayback Machine.
• Concediendo premios a todos los jefes y oficiales Archived 2009-02-05 ვებ-ხასჷლას Wayback Machine.