ტელესკოპი
ტელესკოპი (ბერძნ. τῆλε ტელე "შორი" დო σκοπεῖν სკოპეინ "ჯინა"), ასტრონომიული ხენწყილობა; ირინუანა ცაშური ობიექტეფიშ დაკვირებელო. არსებენს 3 ტიპიშ ტელესკოპი: ლინზამი (რეფრაქტორეფი), სარკეამი (რეფლექტორეფი) დო სარკეამ-ლინზამი სისტემეფი. ირინუანა ნიუტონიშული, კასეგრენიშური, ნესმითიშური დო რიჩი-კრეტიანია ოპტიკური სისტემაშ მაღვენჯ რეფლექტორეფს (ეკონია, არძაშე უმოსო გოფაჩილი რე), სარკეამი-ლინზამი სისტემაშ შმიდტიშ დო მაქსუტოვიშ ტიპიშ ტელესკოპეფს.
არძაშო ჩინაფილი რე, ნამუდა ასტრონომიაშ არძაშე უმოს მენორსამი ხენწყილობა, ანჯარი (იარაღი) ტელესკოპიე, მარა არძას მუჭო უჩქუ, მუ უპირატესობა უღუ თის შეუიარაღებელი თოლწკჷმა ალაზიმაფათ. ფირქენა, ნამუდა ტელესკოპიშ თარი კილადანი ცაშური სქვისქვირეფიშ გჷმოსახულაფაშ გოდიდაფა რე. თახმობუას ტელესკოპიშ სიძალიერე ხვალე გჷმოსახულაფაშ გოდიდაფაშ მეჯინათ ვა გინითანჯაფუ, გიოჯინალი ობიექტიშ მუთ შილებენ უმოს გჷშაჩხორაფაშ აკოკოროფუაშ გაბრათ ხოლო. თეს აპიჯალენს თიში ობიექტივიშ დიამეტრი, თით უმოსიე თიში ფართობი, ანდანე, დიდიე სინთეშ მუდანობათ, ნამუსით ობიექტივი კოროფუნს დო თეშ გურიშენ უმოს მურიცხიშ ძირაფა შემილებუნა. ტელესკოპით თიშნერ მურიცხეფსჷთ ბძირუნთ, ნამუეფსჷთ დაღარი ნათაფაშ გურიშენი, შეუიარაღებელი თოლით შურო ვა ვორწყეთ. ცაშურ სხეულეფს ხანგინძე ჟამით დაკვირაშო ტელესკოპის სპეციალური მართაფუ გიოდგინალს ამარგენა.
