ქაზიმ ქოიუნჯუ

Kazim Koyuncu ქაზიმ ქოიუნჯუ
ფაილი:Kazim.png
ბიოგრაფია
დებადჷ	7 გერგობათუთა, 1971
ბადებაშ აბანი	თურქეთი, იეშილ ქოი.
ღურჷ	25 მანგი, 2005
ჟანრ(ეფ)ი	როკი, ფოლკლორი
საქვარუა	პოლიტოლოგი, მუსიკოსი
აქტიური	1992 - 2005
ვებ-ხასჷლა	www.kazimkoyuncu.com

ქაზიმ ქოიუნჯუ (ბექარიში) (თურქ. Kâzım Koyuncu; დ. 7 გერგობათუთა 1971 – ღ. 25 მანგი 2005) — პოლიტოლოგი დო მუსიკოსი, ნამუშ მოღალობაქჷთ ქვერსემი როლი ილაჸაფჷ თურქეთიშ მახორუ ლაზეფიშ კულტურული ღირებაშ გინოსქილიდაფაშენ.

ჩქჷჩქუობა

დებადჷ 1972 წანაშ 7 გერგობათუთას ხოფაშ ილჩეს, ოფუტე პანჭოლს (ამუდღანერი იეშილ ქოი, ვარა „წვანე ოფუტე“). ჩქჷჩქჷობაშე გჷშარჩქინელი რდჷ მუსიკაშ ჸოროფათ, 13 წანერი რდჷნ, გიტარას მიოგანდჷ. გურაფულენდჷ თურქეთიშ მუსიკაშ ცენტრის „იაშარა ტურნანა“. გურაფულენდჷ სტამბოლიშ უნივერსიტეტის პოლიტოლოგიაშ ფაკულტეტის. ინტერესუანი დო გჷშარჩქინელი სტუდენტი რდჷ, მარა მუში დო მუში მახანეფიშ აზჷრეფი ართიანც ვაკმოხვადუდჷ. 20 წანერი რდჷნ თეში ქაზიმქ გურაფა მეჭყვიდჷ დო მუსიკას ქჷმეთხჷ ხე. მაჸალეეფი თის დინას უძახჷდეს. თე ჯოხო ქაზიმს ძალამს უჸორდჷ.

კარიერა

1992 წანას ალი ელვერწკჷმა ართო ორსხუანს როკ-ბუნას „დიმეინ“. მოგვიანაფილო ხანდენს ლაზურ მუსიკაშ პოპულარიზაციაშო, მარა თაქჷთ ვა ურთინუანს ოჭიშის როკის დო მუშ მუსიკა რე ლაზური მუსიკაშ დო როკიშ სინთეზი. 1993 წანას მემედ ალი ბარიშ ბეშლიწკჷმა ართო ორსხუანს ბუნას „ზუღაში ბერეფე“ (ზუღაშ სქუალეფი). თენა რდჷ მოსოფელს მაართა ლაზური როკ-ბუნა. ბუნა ლაზურო იბირდჷ, მუ ბორჯისჷთ თურქეთის შხვა ნინაშა ბირა ძალამი რთული რდჷ. ქაზიმს ირო ოპეკჷდჷ მუში ლაზური ჯინჯი დო ვარწყედჷ თეშ ფულუაშ უციობას. 1995 წანას „ზუღაში ბერეფექ“ გაგშაშქჷ მაართა ალბომი, ჯოხოთ „ვა მიშქუნან“, ალბომშა ბრუო ახალ ბირაქ მიშელჷ. ალბომი დიდი პოპულარობათ რგებაფულენდჷ თურქეთის, გჷშაკერძაფილო ახალეფ შქას. 1998 წანას გჷშელჷ ახალ ალბომქ ჯოხოთ „იგზას“ („შარას“), ნამუთ თი წანაშ ართ-ართი არძაშე უჯგუში ნახანდო მირჩქინეს. 2000 წანას ბუნაქ დიფაჩჷ, მუშ ისტორიას 130 კონცერტიქ დო 2 ალბომქ ქჷდოსქჷდჷ.

სოლო კარიერა

ბუნაშ აკოცჷმაშ უკული ქაზიმი ხვალე მეჸუნს ბირას, შხირას რჩქინდუ ლაზური კულტურული ორგანიზაციეფიშ შაყარუეფს, მარა ვა აქტიურენს, ლიდერიშ უმოსო ჯგჷრი მარჩქილე რე. 2002 წანას მაართა სოლო ალბომი, „ვია“ გჷშურს, 2004 წანას მაჟირა ალბომი - „ჰაიდე“. ქაზიმიშ ორჩქილუშა კათა შხვადოშხვა ოფუტეეფშე გილურს. ქაზიმ სცენას დუდიშულო გჷნაფულენს დუდს. მაბირე ფუატ საკაწკჷმა, ვოლქან კანაკომწკჷმა დო ბაიარ შაჰინწკჷმა ართო გჷშურს ოტელევიზიე პროექტის „უჩა ზუღაშ მუსიკა“.

საქორთუო

2003 წანაშ მარაშინათუთას ქაზიმ ქოიუნჯუ საქორთუოშა მოურს. საქორთუოს მობირეს გჷშაკერძაფილ დოხვალამას უნწყჷნა, მუსჷთ ტჷბას იშინუანს ირო. მუ შხირას იშინუანს საქორთუოშა შარალუას დო თაქ მონწყიილ კონცერტეფს მაჸალეეფწკჷმა დო ფანიაშ მაკათურეფწკჷმა. ქაზიმი ქორთუ კათას იშინუანს, მუჭოთ მუშ ჯიმალეფს დო გაკვირებული რე თაქიანი სუმარიშმოჸოროფეობათ დო ქორთუეფიშ მუსიკალურობათ.

მობირე მაფშალიაშ ეკონია წანეფი

ქაზიმს შხირას უძახჷდეს მაბირე „მაფშალიას“. 2005 წანას ქაზიმს ექიმეფქ კიბოშ დიაგნოზი ქიგუშქვეს. 33 წანერ ქაზიმ ლახარას ვაუდვანდჷ დუც დო თუმა გოცჷმილი გილეშ კონცერტეფშა დო მარჩქილეს ვა ღალატენდჷ, ლახარა ბორჯის ჭარჷ ჰიმნი „ტრაპიზონსპორტიშო“. 2005 წანაშ 25 მანგის მობირექ დოღურჷ. ქაზიმი ტრაპიზონშა გეგნასვანჯეს, სოდეთ 60.000 ადამიერქ დოხვადჷ. ქაზიმ ქოიუნჯუ ოდაბადურ ოფუტე პანჭოლას ართ-ართი გვალაშ კართეს დასაფულეს.

დისკოგრაფია

ბუნა Zuğaşi Berepe

• 1995 Va Mişkunan
• 1998 İgzas
• 1998 Brüksel Live

ბუნა Grup Dinmeyen

• 1996 Sisler Bulvarı

სოლო ალბომეფი

• 2001 Viya
• 2004 Hayde
• 2006 Dünyada Bir Yerdeyim

რესურსეფი ინტერნეტის

• ქაზიმ ქოიუნჯუ on .::მარგალურ მედია::. მარგალურ მედიაშ გალერეა s. v. ქაზიმ ქოჲუნჯუ ((ქორთ.))
• Kazım Koyuncu Official Website
• Kazım Koyuncu
• Kazım Koyuncu: Anılar Düştü Peşime
• Kazım Koyuncu: İşte Gidiyorum
• Kazım Koyuncu: Didou Nana
• Kazım Koyuncu: Ella Ella
• Kazım Koyuncu & Şevval Sam: Gelevera Deresi
• Kazım Koyuncu & Şevval Sam
• Kazım Koyuncu Sarıgazi Festivali 2002 RapAtma&Koçari
• Kazım Koyuncu Sarıgazi Festivali 2003 RapAtma&Koçari