ციგანეფი

ციგან ცირეფი

ციგანეფი — ერი (უმოს თინაშო, ომიშური ბადებაშ (წარმოშობაშ) დო ნინაშ მაღვენი ეთნიკური ბუნეფი). მუშ დუდიშა უჯოხონა "რომა". კანკალე ბუნეფი მუშ დუდის მიშინუანა მუჭოთ "სინტი"ს. ციგანეფი ბადებათ ინდოეთიშე მუმაულარ ეთნიკური ბუნა რე. ოხორანა ევროპაშ, აზიაშ, ამერიკაშ დო აფრიკაშ ბრელ ქიანას, თაშნეშე ავსტრალიას.

ინგლისარეფს თინეფშა ტრადიციულო უჯოხონა Gypsies (Egyptians — «ეგვიპტარეფი»), ესპანარეფი — Gitanos, ფრანგეფი — Bohémiens (ბოჰემიარეფი), Gitans ვარა Tsiganes, გერმანარეფი — Zigeuner, იტალიარეფი — Zingari, ჰოლანდიარეფი — Heidens ("კერპთაყვანისმცემლეფი"), უნგრელეფი — Cigany ვარა Pharao nerek ("ფარაონიშ ტომი"), ფინარეფი — mustalaiset ("უჩეფი"), თურქეფი — Çingerie, Çingane; ურიეფი — Tso’anim (צוענים), მოურსუ ბიბლიური ეგვიპტური პროვინცია – "ცოანი"–შე. თეჟამიშო ევროპულ ნინეფს ფაჩილო იკვირდებუ ციგანეფიშ ეთნონიმი – "რომა".

შხვადოშხვა სტატისტიკური მუნაჩემეფით ციგანეფიშ რიცხვი საგებიოს 2,5 – 12 მილიონ შურდგუმილ შქას რე. ჸოფილ სხუნუეფიშ მერსის თინეფიშ რიცხვი ოფიციალური მუნაჩამეფით 175,3 ანთასი რდჷ. მაჟირა საგებიო ლჷმაშ ჟამის მეხოლაფირო 20 ანთასი ციგანი ცენტრალურ დო ელახ ევროპას ნაცისტეფქ გოჭყვიდეს.

ციგანეფი იჩიებუნა ციგანეფიშ ნინაშა, ნამუთ მუსხირენ დიალექტო ირთუ. თაშნეშე იჩიებუნა თი ნაციეფიშ ნინაშა, ნამუეფიშ შკასით იგვალარზენუანა დო ოხორანა.