Guerrillero Heroico

ვიკიპედიაშე
ალბერტო კორდაშით გჷნოღალირი ჩე გევარაშ ჩინებული ფოტო
პოპულარული, ეშნაჭკირა ვერსია

Guerrillero Heroico (მარგ. პარტიზანული ლჷმაშ გერგეზი) — მარქსისტი რევოლუციონერიშ — ჩე გევარაშ ოკულტე ფოტო, ნამუშათ თინა გჷმოხანტილი რე მუში ბერეტით, გჷნიღჷ ალბერტო კორდაქ. გჷნოღალირი რე 1960 წანაშ 5 მელახის, კუბაშ ნანანოღა ჰავანას, ხვამარდ „ლა-კუბღაშ“ (ფრანგ. La Coubre) აფეთქებაშ ბორჯის დინაფილეფშა პატიშ გინოგაფაშ ცერემონიაშ ბორჯის. 1960-ამი წანეფიშ ბოლოს თიქ გჷნირთჷ ქარიზმატულ დო ოდებელი კულტურულ გჷმნასახათ.[1] კორდაშ თქუალათ, ფოტოშ გჷნოღალაშ მომენტის, თიქ ესახჷ გევარაშ კილაჯინა, ნამუთ ეფშა რდჷ „აბსოლუტური კონწარალათ“,[2] გურიშ მულათ დო ჭუათ.[3] წანეფიშ უკული, კორდა ეთმოშანუნდჷ, ნამუდა ფოტო ეთმოსახუნდჷ ჩეშ მეკენჯი დო სტოიკურ ხასიათის.[4] ფოტოშ გჷნოღალაბორჯის, გევარა 31 წანერი რდჷ.

მერილენდიშ ხელუანობაშ ინსტიტუტ-კოლეჯიქ სურათის XX ოშწანურაშ სიმბოლო დო მოსოფელიშ არძოშე ჩინებული ფოტო გიოდჷ, მუდგათ ღოზის უსვანს სურათიშ ირდიხასრინჯალაშ ბუნებას დო ფართო წესას.[5] თიში ვერსიეფი დოხანტეს, დობეშტეს, გაციფრულეს, გეშაქარგეს, ტატუეფშა გეგნიღეს, ტრაფარეტეფი ქოღოლის, გეგშასკულპტურეს დო გეშასახეს არძო წჷმარინაფალი ჟიდოხის. მუჭოთ ვიქტორიაშ დო ალბერტიშ მუზეუმიშ ხემანჯღვერალაქ თქუნ, ფოტოქ თიშე უმოსო იჸუ გაბრელებურქ, ვინდარო შხვა ნამუდგარდია ფოტოგრაფიული ნახანდიქჷნ.[6] კალიფორნიაშ ფოტოგრაფიაშ მუზეუმიშ დირექტორქ ჯონათან გრინქ უზურშა იღვენუ, ნამუდა „კორდაშ ფოტო მუში შარათ მუშენდჷ ედომუშამი მოსოფელიშ ნინეფსინ. თიქ გჷნირთჷ ალფა-რიცხუობურ სიმბოლოთ, იეროგლიფო, უგჷნალი სიმბოლოთ. თინა მისტერიულო ხეახალაშო რჩქინდუ ირდიხას, სოდეთ კონფლიქტი რენ. ისტორიას ვა რე შხვა თიში მეთე, ნამუთ თე შარათ მუშენსჷნ“.[7]

სურათიშ ისტორიაქ დო ამდღარხანური მოსოფელიშურ გოლინაქ ოსხირო გიადჷ ტირშა ზიფიშ 2008 წანაშ დოკუმენტურ ფილმის „ჩევოლუცია“,[8] თეშინეშეს მუჭოთ მაიკლ კეისიშ 2009 წანას გჷშულირ წიგნისჷნ „ჩეშ შურდგჷმა ღურაშ უკული: სურათიშ მონძალა“.[9]

გალერეა[რედაქტირაფა | წყუშ რედაქტირაფა]

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ:
ვიკიოწკარუეს? რე ხასჷლა თემაშენ:

სქოლიო[რედაქტირაფა | წყუშ რედაქტირაფა]

  1. Communists, Capitalists still buy into Iconic Che Photo, Author says by Brian Byrnes, CNN, May 5, 2009
  2. Jon Lee Anderson. Che Guevara : A revolutionary life. ხს. 465
  3. "Che Guevara: Revolutionary & Icon", by Trisha Ziff, Abrams Image, 2006, ხს. 15
  4. "Che Guevara: Revolutionary & Icon", by Trisha Ziff, Abrams Image, 2006, ხს. 33
  5. Maryland Institute of Art, referenced at BBC News, "Che Guevara photographer dies", May 26, 2001. Online at BBC News, accessed January 4, 2006.
  6. V&A: The story of an image, exhibition organised by UCR/California Museum of Photography. Vam.ac.uk. კითხირიშ თარიღი: 2011-03-05.
  7. Che as revolutionary and icon, by Corinna Lotz. Aworldtowin.net. კითხირიშ თარიღი: 2011-03-05.
  8. DVD Review: Chevolution by David Van Der Haeghen, DVD Town, January 16, 2010
  9. Brand Che: Revolutionary as Marketer’s Dream by Michiko Kakutani, The New York Times, April 20, 2009