ალვარო ობრეგონი

	ალვარო ობრეგონი; Álvaro Obregón
	; ობრეგონი 1920-იან წანეფს
მექსიკაშ პრეზიდენტი
პოსტის გერინაშ ბორჯი
	1 კვირკვე, 1928 – 17 კვირკვე, 1928
წიმოხონი	პლუტარკო ელიას კალიესი
მონძე	ემილიო პორტეს ხილი
პოსტის გერინაშ ბორჯი
	1 ქირსეთუთა, 1920 – 30 გერგობათუთა, 1924
წიმოხონი	ადოლფო დე ლა უერტა
მონძე	პლუტარკო ელიას კალიესი
ნაღურა	კვირკვე 17, 1928 (48 წანერი); მეხიკო, მექსიკა
ღურაშ ბაძაძი	ჸვილუა
მენოღალობა	მექსიკა
პოლიტიკური პარტია	ლეიბორისტული პარტია
ალმასქუ	მარია ტაპია
საქვარუა	ოურდუმე მოღალე, პოლიტიკოსი
ჯილდოეფი

ალვარო ობრეგონ სალიდო (ესპ. Álvaro Obregón Salido, დ. 19 ფურთუთა, 1880 — ღ. 17 კვირკვე, 1928) — მექსიკარი ოურდუმე მოღალე დო პოლიტიკოსი, მექსიკაშ პრეზიდენტი 1920-1924 წანეფს. 1928 წანას, ხოლო ართიშა იჸუ გიშაგორილქ პრეზიდენტო, მარა პოსტიშ დაკინებაშახ დოჸვილეს.

ბიოგრაფია

დებადჷ ნავოხოას, სონორაშ შტატის. უმაღალაში გონათაფა ვემუღებჷ. 1913 წანაშ ფურთუთაშ სახენწჷფო გინორთაშ უკულ, რევოლუციური პროცესეფს ქაკათჷ დო ქალუდირთჷ ვენუსტიანო კარანსას, კონსტიტუციონალისტური არმიაშ მანჯღვერს, ვიქტორიანო უერტაშ რეჟიმიშ მეხჷ. ობრეგონქ მალას მიპალუ შანულამი პოპულარობა კონსტიტუციონალისტური არმიაშ დინახალე დო გინირთჷ გენერალო. კარანსაქ ობრეგონი ქუდარინუ რევოლუციური ნძალეფიშ თარსარდალო ოორუე-ბჟადალი მექსიკას. 1914 წანაშ კვირკვეს კონსტიტუციონალისტეფქ დამარცხეს უერტა დო ხეშულობა დათმებაფეს. 1915 წანაშე მექსიკაშ რევოლუციაქ მიშელჷ ომენოღალე ლჷმაშ ახალი ფაზაშა, მუჟამსჷთ ართიანს ოლიმუდეს კონვენციონალისტეფი (ემილიანო საპატა, პანჩო ვილია) დო ობრეგონი-კარანსაშ ნძალეფი (კონსტიტუციონალისტეფი). კონსტიტუციონალისტეფიშ აკოანჯარაფილი ნძალეფიშ ხემანჯღვერო გინირთჷ ობრეგონქ, ნამუქჷთ ბრელშა დამარცხჷ კონვენციონალისტეფი. 1917 წანაშო მეღებულქ იჸუ მექსიკაშ კონსტიტუციაქ. ჸათე ბორჯიშე უკვე, კონსტიტუციონალისტეფქ სერიოზული გომორძგუეფს მიოჭირინეს ოპონენტეფიშ მეხჷ. 1920 წანას, კარანსაქ მუში პოლიტიკური მონძეთ ქჷმწარინუ რსულას უჩინებუ იგნასიო ბონილასი. მარა რევოლუციური მაღალეეფქ: ობრეგონქ, პლუტარკო ელიას კალიესიქ დო ადოლფო დე ლა უერტაქ აკიკათეს (თენეფიშ პოლიტიკური ალიანსის უძახჷდეს სონორაშ ტრიუმვირატის, მუშენდა სუმხოლო სონორაშე რდეს) დო მანწყუეს არყება. ტრიუმვირატიქ ქუდახუ კარანსაშ მართუალა. კარანსაქ, თიში კაბინეტიშ მაკათურეფქ, თაშნეშე ბონილასიქ მეხიკოშე ინტეს. მარა თინეფს ქიგიანთხეს არყებულეფქ. კარანსა დოჸვილეს დო ბონილასი ოჭოფეს. უკულ, 1920 წანაშ 5 ეკენიას იმანჯჷ საპრეზიდენტო გიშაგორუეფქ, სოდეთ ობრეგონქ, ხონარეფიშ უმენტაშობათ გემორძგუ.

ობრეგონიშ მართუალაშ ბორჯის იტარინჷ გონათაფაშ რეფორმაქ, დიხაშ რეფორმაქ, გევითარჷ მექსიკური მიურალიზმიქ. ქიანაქ შანულამი სტაბილურობას მიოჭირინუ. 1923 წანაშ მარაშინათუთას, ობრეგონქ ამერიკაწკჷმა ხე მაჭარჷ ბუკარელიშ ხეკულუას, ნამუქჷთ გოხურგ მექსიკაშ თარობაშ დო ამერიკაშ ონაფთობე კორპორაციეფიშ ნებეფი. თაშნეშე, ამერიკაქ დიპლომატიურო ქიჩინჷ ობრეგონიშ ხეშულობა. 1923 წანაშო ობრეგონქ მუში მონძეთ გეგმაცხადჷ პლუტარკო ელიას კალიესი. ჸათე გინოჭყვიდირიშ გეშათ უკმაყოფილე ფინანსეფიშ მინისტრიქ, ადოლფო დე ლა უერტაქ ეარყჷ ობრეგონიშ მეხჷ. დე ლა უერტას ქალუდირთეს შხვა რევოლუციონერფქ ხოლო. მარა მალას ობრეგონქ, ამერიკაშ ფინანსური დო ოურდუმე ალარინათ, არყებულეფი დამარცხჷ.

1924 წანაშ საპრეზიდენტო გიშაგორუეფს გემორძგუ ობრეგონიშ მაჸალექ დო რევოლუციონერქ პლუტარკო ელიას კალიესიქ. ობრეგონქ ხეშულობას დეთხუ, მარა იშენ სქიდუდჷ გოლინიანი პოლიტიკოსო. 1928 წანას ობრეგონქ პოლიტიკური პროცესეფს დართჷ დო საპრეზიდენტო გიშაგორუეფს გემორძგუ. მარა პოსტიშ დაკინებაშახ, 1928 წანაშ 17 კვირკვეს, თინა დოჸვილჷ კათოლიკე ხოსე დე ლეონ ტორალიქ, ნამუთ უკმაყოფილე რდჷ ობრეგონიშ ანტი-რელიგიური პოლიტიკათ. ობრეგონიშ ჸვილუაქ ხოლო უმოსო განძალიერჷ პოლიტიკური კრიზისი მექსიკას.

ქოძირით თაშნეშე

ლიტერატურა

Hall, Linda B. (1981). Álvaro Obregón: power and revolution in Mexico, 1911–1920. College Station: Texas A&M University Press.
Buchenau, Jürgen (2011). The Last Caudillo: Alvaro Obregón and the Mexican Revolution. Chichester, England: Wiley-Blackwell.

რესურსეფი ინტერნეტის

ენციკლოპედია ბრიტანიკა