ალფრედო სტრესნერი
| ალფრედო სტრესნერი Alfredo Stroessner | ||
.jpg) სტრესნერი 1959 წანას | ||
| პარაგვაიშ 42-ა პრეზიდენტი | ||
|---|---|---|
| პოსტის გერინაშ ბორჯი | ||
| 15 მარაშინათუთა, 1954 – 3 ფურთუთა, 1989 | ||
| წიმოხონი | ტომას რომერო პერეირა | |
| მონძე | ანდრეს როდრიგესი | |
| დუნაბადი | 3 გერგობათუთა, 1912 ენკარნასიონი, პარაგვაი | |
| ნაღურა | მარაშინათუთა 16, 2006 (93 წანერი) ბრაზილია, ბრაზილია | |
| მენოღალობა |  პარაგვაი | |
| პოლიტიკური პარტია | კოლორადოშ პარტია | |
| ალმასქუ | ელიხია მორა დელგადო | |
| სქუალეფი | 3 | |
| გონათაფა | მარშალი ფრანსისკო სოლანო ლოპესიშ ოურდუმე აკადემია | |
| რელიგია | კათოლიციზმი | |
| ხეშმოჭარუა |  | |
ალფრედო სტრესნერ მატიაუდა (ესპ. Alfredo Stroessner Matiauda; დ. 3 გერგობათუთა, 1912 — ღ. 16 მარაშინათუთა, 2006) — პარაგვაიშ ოურდუმე მოღალე, პოლიტიკოსი, ოურდუმე დიქტატორი, პარაგვაიშ პრეზიდენტი 1954-1989 წანეფს.
რდჷ გერმანალი იმიგრანტიშ სქუა. გურაფულენდჷ ასუნსიონიშ ოურდუმე კოლეჯის. 1932 წანას ქაკათჷ პარაგვაიშ აკოანჯარაფილი ნძალეფს, სოდეთ ხელათ მიპალუ შანულამი პოპულარობა დო მიოჭირინუ გენერალობას. 1951 წანას სტრესნერი ქუდარინეს პარაგვაიშ არმიაშ თარსარდალო. სტრესნერქ მუში გოლინა თეში განძალიერჷ, 1954 წანაშო ქუდახუ პრეზიდენტი ფედერიკო ჩავესი დო ხეშულობა მუქ ქაშეჸოთჷ ხეშა. მართუალაშ დაჭყაფუშე სტრესნერქ წიმიჭყჷ რეფორმეფი. გენძალიერჷ ერუანული ვალუტაქ დო დეჭიჭარჷ ინფლაციაქ. სტრესნერქ ხუჯი დუკინჷ ოფუტეეფს მახურე ღარიბი მენოღალეეფს, თაშნეშე დინდარი მახორუეფს დო ბიზნესმენეფს. ეიოგეს ახალი სკოლეფი, ჰოსპიტალეფი, გაკეთეს შარეფი, გაუჯგუშეს ინფრასტრუქტურა. ართ-ართი უდიდაში პროექტი, ნამუქჷთ სტრესნერიშ მართუალაშ ბორჯის იმანჯჷ, რდჷ იტაიპუშ კაშხალი. კაშხალი ეიოგეს პარაგვაი-ბრაზილიაშ სანძღოშ გოხოლუას. იტაიპუ ართ-ართი უდიდაში ჰიდროელექტროდგჷმილი რე მოსოფელიშ მასშტაბით. თიქ კაბეტი პოზიტიური გოლინა იღვენუ პარაგვაიშ ეკონომიკური გოვითარაფაშო.
ალფრედო სტრესნერიშ მართუალა იხასიათებუდჷ ავტოკრატიული დო ტოტალიტარული მეთოდეფით. თხოზუდეს პოლიტიკური ოპონენტეფს, დოკონჩეს ადამიერიშ ნებეფი დო შხვა. სტრესნერქ ოჸურჩე ქიმეჩჷ საირქიანო კრიმინალეფს, მაგალთო ნაცისტი იოზეფ მენგელეს. სტრესნერიშ თარობა აქტიურო მონაწილენდჷ ოპერაცია კონდორს, ნამუსჷთ ააშ აფინანსენდჷ დო ნამუშ ღანკი პოლიტიკური დისიდენტეფიშ, გიშაკერზაფილო სოციალისტეფიშ დო კომუნისტეფიშ მოჯალაგუა რდჷ.
1988 წანაშ გიშაგორუეფს კინ სტრესნერქ გემორძგუ. თენა თიშო რანწკით მაბრუო საპრეზიდენტო ვადა რდჷ. სტრესნერი გიშაგორუეფს ირო აყალბენდჷ დო ჸათაშ სქიდუდჷ ხეშულობას. მარა 1989 წანაშ 2-3 ფურთუთას, თიში მართუალაშ მეხჷ ქუმოხვადჷ სახენწჷფო გინორთაქ, ნამუსჷთ ხემანჯღვერენდჷ გენერალ-ლეიტენანტი ანდრეს როდრიგესი. სტრესნერი ქუდახუეს დო გეგნახორეს ბრაზილიაშა, სოდეთ ღურაშახ ცხოვრენდჷ.