ამანი დიორი

ამანი დიორი Hamani Diori
დიორი 1968 წანას
ნიგერიშ მა-1 პრეზიდენტი
პოსტის გერინაშ ბორჯი
3 მარაშინათუთა, 1960 – 15 პირელი, 1974
წიმოხონი	პოსტიქ გიჭყჷ
მონძე	სეინი კუნჩე
ნიგერიშ მა-1 პრემიერ-მინისტრი
პოსტის გერინაშ ბორჯი
10 გჷმათუთა, 1958 – 15 პირელი, 1974
წიმოხონი	ჯიბო ბაკარი
მონძე	სეინი კუნჩე
დუნაბადი	6 მანგი, 1916 სუდურე, ფრანგული ბჟადალი აფრიკა
ნაღურა	23 პირელი, 1989 (72 წანერი) რაბატი, მაროკო
მენოღალობა	ნიგერი
პოლიტიკური პარტია	ნპპ-ადგ
ალმასქუ	აისა დიორი
სქუალეფი	აბდულაი ამანი დიორი
პროფესია	მაგურაფალი
რელიგია	სუნიზმი

ამანი დიორი (ფრანგ. Hamani Diori; დ. 6 მანგი, 1916 — ღ. 23 პირელი, 1989) — ნიგერალი პოლიტიკოსი, ნიგერიშ მა-1 პრეზიდენტი 1960-1974 წანეფს.

გურაფულენდჷ უილიამ პონტიშ მაგურაფალეფიშ ოტრეინინგე კოლეჯის, დაკარს, სენეგალს. გურაფაშ თებაშ უკულ, 1936 წანაშე მუშენდჷ მაგურაფალო ნიგერს. 1946 წანას დიორიქ, მუშ მაჸალეეფწკჷმა ართო დარსხუ ნიგერიშ პროგრესული პარტია. თე წანას დიორიქ გიშაგორილქ იჸუ საფრანგეთიშ ერუანული ასამბლეაშ მაკათურო. 1951 წანაშ გიშაგორუეფს დიორი დამარცხჷ მუშ ბიძისქუაქ დო პოლიტიკურ ოპონენტიქ ჯიბო ბაკარიქ. 1956 წანას დიორი ხოლშე ართა გეგშაგორეს ერუანულ ასამბლეაშ მაკათურო. 1958 წანაშ რეფერენდუმიშ ნძალათ, ნიგერქ ავტონომიურ მართუალაშ ნება მიპალჷ. 1959 წანას, დიორიქ ქიდეკინჷ ნიგერიშ პრემიერ-მინისტრიშ პოსტი.

1960 წანაშ 3 მარაშინათუთას, ნიგერქ მიპალუ ზოხორინელობა საფრანგეთიშე. თე წანაშ გერგობათუთას, ნიგერიშ ერუანულ ასამბლეაქ დიორი გეგშაგორჷ ქიანაშ მაართა პრეზიდენტო. მართუალაშ გოძვენას, თიქ გაჭყჷ ართ-პარტიული სისტემა. კანონიერო რდჷ მერჩქინელი ხვალე ართ პარტია ნიგერიშ პროგრესული პარტია. პრეზიდენტობაშ მოხ, დიორის უკინებუდჷ პარტიაშ პრეზიდენტიშ პოსტი, თაშნეშე დუდთხილუაშ დო გალენურ საქვარეფიშ მინისტრიშ პოსტეფი.

1965 დო 1970 წანეფიშ საპრეზიდენტო გიშაგორუეფს, დიორი რდჷ ხვალახე კანდიდატი. თიშ მართუალა იხასიათებუდჷ კორუფციათ დო ნეპოტიზმით. დიორიშ თარობას ვეგნაჭყვიდირჷ შქირენაშ პრობლემაქ, ნამუთ 1970-იან წანეფიშ გოლოფაქ გიმიჭანუ ედუმუშამო საჰელიშ რეგიონს. 1963 წანაშ ქირსეთუთას დიორიშ მეხჷ არდგილი უღუდჷ სახენწჷფო გინორთაშ ცადებას, ნამუქჷთ წჷმოძინელქ ვეჸუ. 1965 წანას, თიშ ჸვილუა ხოლო მინდომეს, მარა ვართ თე ცადებაქ იჸუ წჷმოძინელქ. დიორი ხეშულობას ინარჩუნენდჷ საფრანგეთიშ ალარინათ.

1974 წანაშ 15 პირელს, გენერალ-ლეიტენანტიქ, სეინი კუნჩექ მანწყუ ოურდუმე გინორთა დო ქუდახუ დიორიშ მართუალა. დიორი ოჭოფეს დო ჯიხას ქუდახუნეს. 1980 წანას თინა გადუდიშულეს. დიორი 1987 წანაშე მაროკოს ცხოვრენდჷ, სოდეთ დოღურჷ 1989 წანაშ 23 პირელს, 72 წანერქ.

ქოძირით თაშნეშე

• ნიგერიშ პრეზიდენტი