ანრი კონან ბედიე
| ანრი კონან ბედიე Henri Konan Bédié | ||
.jpg) ბედიე 1997 წანას | ||
| კოტ-დ’ივუარიშ მა-2 პრეზიდენტი | ||
|---|---|---|
| პოსტის გერინაშ ბორჯი | ||
| 7 ქირსეთუთა, 1993 – 24 ქირსეთუთა, 1999 | ||
| პრემიერ-მინისტრი | დანიელ კაბლან დუნკანი | |
| წიმოხონი | ფელიქს უფუე-ბუანი | |
| მონძე | რობერ გეი | |
| დუნაბადი | 5 მესი, 1934
დაუკრო, ფრანგული ბჟადალი აფრიკა | |
| ნაღურა | მარაშინათუთა 1,, 2023 (89 წანერი)
აბიჯანი, კოტ-დ’ივუარი | |
| მენოღალობა |  საფრანგეთი კოტ-დ’ივუარი | |
| პოლიტიკური პარტია | კოტ-დ’ივუარიშ დემოკრატიული პარტია | |
| გონათაფა | პუატიეშ უნივერსიტეტი | |
| რელიგია | კათოლიციზმი | |
ანრი კონან ბედიე (დ. 5 მესი, 1934 — ღ. 1 მარაშინათუთა, 2023) — კოტ-დ’ივუარალი პოლიტიკოსი, კოტ-დ’ივუარიშ რანწკით მა-2 პრეზიდენტი 1993-1999 წანეფს.
უმაღალაშ გონათაფა საფრანგეთის მიღჷ. გურაფაშ თებაშ უკულ კოტ-დ’ივუარშა დირთჷ დო მოღალენდჷ დიპლომატიური მისიათ. რდჷ კოტ-დ’ივუარიშ ელჩი ამერიკას დო კანადას. 1966-1977 წანეფს უკებუდჷ ეკონომიკაშ დო ფინანსეფიშ მინისტრიშ პოსტი. 1974-1976 წანეფს მოღალენდჷ საირქიანო სავალუტო ფონდის დო მოსოფელიშ ბანკის. 1980 წანას ბედიექ გიშაგორილქ იჸუ კოტ-დ’ივუარიშ ერუანული ასამბლეაშ მაკათურო. თე წანაშ ქირსეთუთას ბედიექ ქიდეკინჷ ერუანული ასამბლეაშ პრეზიდენტიშ პოსტი. 1985 დო 1990 წანეფს კინ ახალშო იჸუ გიშაგორილქ ასამბლეაშ პრეზიდენტო.[1]
1993 წანაშ 7 ქირსეთუთას დოღურჷ კოტ-დ’ივუარიშ პრეზიდენტიქ ფელიქს უფუე-ბუანქ. თიშ ღურაშ უკულ ქიდიჭყჷ პოლიტიკურ ლჷმაქ ხეშულობაშო ბედიეშ დო პრემიერ-მინისტრი ალასან უატარაშ შქას, სოდეთ ბედიექ გემორძგჷ დო წორეთ თიქ ქიდეკინჷ კოტ-დ’ივუარიშ გეჸვენჯი პრეზიდენტიშ პოსტი.
მართუალაშ ბორჯის, ბედიექ გეგმაცხადჷ ერუანული სტაბილურობაშ პოლიტიკა, მარა თიშ ხეშულობა იხასიათებუდჷ კორუფციათ დო რეპრესიეფით. 1995 წანას თიქ დოთირუ გიშაგორუეფიშ კანონი. ახალ კანონით საპრეზიდენტო კანდიდატიშ ჟირხოლო მასქერი ოკო რდუკო კოტ-დ’ივუარალი დო კანდიდატი ქიანას ოკო ცხოვრენდკო ეკონია ხუთ წანაშ გოძვენას. ჸათე კანონქ რეალურო მეღებულქ იჸუ ბედიეშ ოპონენტიშ უატარაშ მეხჷ, ნამუთ 1990-იან წანეფშე ამერიკას ცხოვრენდჷ დო ართ ვერსიათ თიშ მუმა ბურკინა-ფასოალ რდჷ. 1995 წანაშ გიშაგორუეფს ბოიკოტი გეგმუცხადჷ კოტ-დ’ივუარიშ თარ ოპოზიციურ პარტიეფქ: უატარაშ რესპუბლიკარეფიშ რსხუქ დო კოტ-დ’ივუარიშ ოკათე ფრონტიქ. შედეგო, 1995 წანაშ გჷმათუთაშ საპრეზიდენტო გიშაგორუეფს ბედიექ მიპალჷ ხონარეფიშ 96 % დო გემორძგჷ.[2]
1999 წანაშ 24 ქირსეთუთას მინწყუ ოურდუმე გინორთაქ, ნამუშ შედეგო ბედიე ქუდახუეს. პრეზიდენტიშ პოსტი ქიდეკინჷ გენერალ რობერ გეიქ. ბედიექ კოტ-დ’ივუარი ქიდიტუ დო ტოგოშა ინტუ. ტოგოშე თიქ საფრანგეთშა მიდართჷ. 2001 წანას კოტ-დ’ივუარშა დირთჷ დო თარობაშ კრიტიკოსო გინირთჷ. ღურუ 2023 წანაშ 1 მარაშინათუთას, 89 წანერქ.[3]
ქოძირით თაშნეშე
[რედაქტირაფა | წყუშ რედაქტირაფა]სქოლიო
[რედაქტირაფა | წყუშ რედაქტირაფა]- ↑ Former Ivory Coast President Bedie dies at 89, relative says (2023-08-02).
- ↑ Former Ivory Coast President Bedie dies at 89, relative says (2023-08-02).
- ↑ Former Ivory Coast President Bedie dies at 89, relative says (2023-08-02).