ატროპატენა
|
ატროპატენა | ||||
| ||||
|---|---|---|---|---|
 ატროპატენა სელევკიდეფიშ იმპერიაშ ვასალობაშ ბორჯის, ჯვ. წ. 221 წანას | ||||
| ნანანოღა | განზაკი | |||
| ნინა | ჯვეში აზერბაიჯანული, მიდიური ნინა | |||
| რელიგია | ზოროასტრიზმი | |||
| დუდალაშ ფორმა | მონარქია | |||
| დინასტია | ატროპატიდეფი არშაკიდეფი | |||
| ისტორია | ||||
| - გოჭყაფა | დოხ. ჯვ. წ. 323 | |||
| - ჸოფა გასურჷ | ახ. წ. 226 | |||
ატროპატენა (ჯვ. სპარს. Ātṛpātakāna, ჯვ. ბერძ. Ἀτροπατηνή), თაშნეშე შინელი რდჷ მუჭოთ მიდიაშ ატროპატენა — ჯვეში ირანული ომაფე, ნამუთ დარსხუ სპარსალი სატრაპიქ ატროპატექ, დოხოლაფირო ჯვ. წ. 323 წანას. ატროპატენა ირანიშ აზერბაიჯანიშ ჯვეში ისტორიული ჯოხოდვალა რდჷ. ბერძენი გეოგრაფი სტრაბონი მუში შინელი ნახანდის "გეოგრაფია", ჭარუნს: "მიდია ჟირი ნორთო ირთუ. ართი ნორთის უძახჷნა კაბეტი მიდიას დო თიში თარი ნოღა ეკბატანა რე. მაჟია რე ატროპატეშ მიდია, ნამუშ ჯოხო მანჯღვერთარი ატროპატეშე მოჸურს".
ჯვ. წ. 331 წანას, გავგამელაშ ლჷმას, ალექსანდრე მაკედონარქ დამარცხჷ აქემენიანეფიშ ეკონია მაფა დარიოს III. შედეგო, მიჯალაგჷ აქემენიანეფიშ იმპერიაქ. ატროპატექ ალექსანდრეს ლიოალობა გეგმუცხადჷ დო ჯვ. წ. 328 წანას ალექსანდრექ თინა მიდიაშ მამართალო ქუდარინუ. ალექსანდრეშ ღურაშ უკულ თიში იმპერია დიადოქოსეფს გირთეს. მიდიაქ ჟირო გირთჷ. კაბეთი (ობჟათე) მიდიაქ - მიდია მაგნა მიაჩჷ ართ-ართი დიადოქოსის პითონს. მორჩილი (ოორუე) მიდიაქ გეგნაჩჷ აქემენიანეფიშ ჸოფილი სატრაპის ატროპატეს. ატროპატექ უკულ, დოხოლაფირო ჯვ. წ. 323 წანას, ატროპატენა ზოხორინელი დო დუდიშული სახენწჷფოთ გინაშქჷ. ჯვ. წ. 223 წანას სელევკიდეფიშ იმპერიაშ ხვისტაშა გეშართჷ ანტიოქე III-ქ, ნამუქჷთ გემშეჭკირჷ ატროპატენაშა დო ქიდიჸუნუ. მაფა არტაბაზანეს ხვალე დინახალენი საქვარეფიშ მართუალაქ ქასქიდჷ. ჸათე ბორჯის ძალამს გენძალიერჷ რომიშ იმპერიაქ დო გაფართინუ მუში გოლინა სქირონაშქა ზუღაშ მუკი. ჯვ. წ. 190 წანას რომალეფქ, მაგნეზიაშ ლჷმას, კონწარო დამარცხეს ანტიოქე III. სელევკიდეფიშ მარცხიშ უკულ, რომი ოლიმუდჷ პართიას, ნამუსჷთ ატროპატენა ალურდჷ. ჯვ. წ. 38 წანას რომალეფქ პართიალეფს ორჯგინეს. რომალფქ უკულ ატროპატენაშა გემშეჭკირეს დო ოცადუდეს თიში ართ-ართი შანულამი ნოღაშ ფრაასპაშ ეჭოფუას (ჯვ. წ. 36). მარა რომალეფს ნოღაქ ვეიაჭოფეს, მიღეს კაბეტი გავალი, დოხოლაფირო 35 ანთასი ჯარიშკოჩიშ მუდანობათ დო უკახალე დიკინეს. უკულ, პართიალეფქ გინოჭყვიდეს ატროპატენაშ დოჸუნაფა. პართიაშ დოდაღარაფაშ დო არდაშირ I-შით თიში მოჯალაგუაშ უკულ, ატროპატენაქ სასანიანეფიშ იმპერიაშ აკოდგინალუაშა მიშელჷ.