ბენაზირ ბჰუტო

ბენაზირ ბჰუტო بينظير بُھٹو
ბენაზირ ბჰუტო 2006 წანას
პაკისტანიშ მა-11 პრემიერ-მინისტრი
პოსტის გერინაშ ბორჯი
18 გჷმათუთა, 1993 – 5 გერგობათუთა, 1996
პრეზიდენტი	ვასიმ საჯადი ფარუხ ლეგარი
წიმოხონი	მოინუდინ აჰმად ქურეში
მონძე	მერაჯ ხალიდი
პოსტის გერინაშ ბორჯი
2 ქირსეთუთა, 1988 – 6 მარაშინათუთა, 1990
პრეზიდენტი	გულამ ისხაკ ხანი
წიმოხონი	მუჰამად ხან ჯუნეჯო
მონძე	გულამ მუსტაფა ჯატოი
ოპოზიციაშ ლიდერი
პოსტის გერინაშ ბორჯი
17 ფურთუთა, 1997 – 12 გჷმათუთა, 1999
წიმოხონი	ნავაზ შარიფი
მონძე	ფაზალ-ურ-რეჰმანი
პოსტის გერინაშ ბორჯი
6 გერგობათუთა, 1990 – 18 პირელი, 1993
წიმოხონი	აბდულ ვალი ხანი
მონძე	ნავაზ შარიფი
პაკისტანიშ ოკათე პარტიაშ დუდმახვენჯი
პოსტის გერინაშ ბორჯი
12 გერგობათუთა, 1982 – 27 გერგობათუთა, 2007
წიმოხონი	ნუსრატ ბჰუტო
მონძე	ასიფ ალი ზარდარი ბილავალ ზარდარი
დუნაბადი	21 მანგი, 1953 კარაჩი, პაკისტანი
ნაღურა	ქირსეთუთა 27, 2007 (54 წანერი) რავალპინდი, პაკისტანი
ღურაშ ბაძაძი	ჸვილუა
ნთხორუ აბანი	ბჰუტოშ ფანიაშ მავზოლეუმი
მენოღალობა	პაკისტანი
პოლიტიკური პარტია	პაკისტანიშ ოკათე პარტია
მუმა	ზულფიკარ ალი ბჰუტო
ნანა	ნუსრატ ბჰუტო
ალმასქუ	ასიფ ალი ზარდარი
სქუალეფი	ბილავალი, ბახტავარი, ასიფა
გონათაფა	რედკლიფიშ კოლეჯი ოქსფორდიშ უნივერსიტეტი
რელიგია	ისლამი
ხეშმოჭარუა

ბენაზირ ბჰუტო (ურდუ. بینظیر بھٹو; დ. 21 მანგი, 1953 — ღ. 27 ქირსეთუთა, 2007) — პაკისტანარი პოლიტიკოსი დო სახენწჷფო მოღალე, პაკისტანიშ პრემიერ-მინისტრი 1988-1990 დო 1993-1996 წანეფს, პაკისტანიშ ფინანსეფიშ მინისტრი 1988-1990 დო 1994-1996 წანეფს, პაკისტანიშ დუდთხილუაშ მინისტრი 1988-1990 წანეფს. იდეოლოგიურო რდჷ ლიბერალი დო სეკულარისტი. მოღალენდჷ პაკისტანიშ ოკათე პარტიაშ ხემანჯღვერო 1982 წანაშე ღურაშახ.

ბენაზირ ბჰუტო გურაფულენდჷ რედკლიფიშ კოლეჯის დო უკულ ოქსფორდიშ უნივერსიტეტის. 1973 წანას ბენაზირიშ მუმა ზულფიკარ ალი ბჰუტო გიშაგორილქ იჸუ პაკისტანიშ პრემიერ-მინისტრო. 1977 წანას ბენაზირქ პაკისტანშა დირთჷ. თე წანას ზულფიკარ ალი ბჰუტო გეგთარაგვეს ოურდუმე გინორთაშ შედეგო დო ჟირი წანაშ უკულ ღურათ დასაჯეს. მუჰამედ ზია-ულ ჰაკიშ თარობაქ ბენაზირი ოჭოფუ დო უკულ 1984 წანას ბრიტანეთშა გეგნახორუ. 1986 წანას ბენაზირ ბჰუტოქ პაკისტანშა დირთჷ. ბჰუტოქ პაკისტანიშ ოკათე პარტია ლიბერალური იდეეფშა გეგნიჸონჷ. 1988 წანას, ბჰუტოშ ლიდერობათ პარტიაქ საპარლამენტო გიშაგორუეფს გემორძგუ. პრემიერ-მინისტრიშ პოსტიშ გერინაშ ბორჯის, ბჰუტო ოცადუდჷ სახენწჷფოშ რეფორმირაფას, მარა კონსერვატორული დო ისლამისტური ნძალეფქ ბჰუტოშ თარობას თეში ნება ვემეჩჷ. ბჰუტოშ ინიცირაფილი რეფორმეფი, თაშნეშე დოჩალეს პაკისტანიშ პრეზიდენტი გულამ ისხაკ ხანქ დო პაკისტანიშ არმიაქ. ბჰუტოშ თარობას, ოპოზიციაქ ქეკადვუ კორუფცია, ნეპოტიზმი დო 1990 წანას ბჰუტოშ თარობა დეთხინუ გულამ ისხაკ ხანქ. თე წანას იმანჯჷ ახალი საპარლამენტო გიშაგორუეფქ, ნამუთ გაყალბეს დო გომორძგვილო გეგმაცხადეს მემარძგვანე ორიენტაციაშ კონსერვატორული პარტია ისლამური დემოკრატიული ალიანსი. 1990 წანაშე ბჰუტოქ გინირთჷ ოპოზიციაშ ლიდერო.

სუმ წანაშ უკულ ისლამური დემოკრატიული ალიანსიშ თარობას ხეშულობა დათმებაფეს. 1993 წანაშ გიშაგორუეფს გემორძგუ პაკისტანიშ ოკათე პარტიაქ, ბჰუტოშ მანჯღვერალათ. მაჟირა მართუალაშ გოძვენას, ბჰუტო აწარმენდჷ პრივატიზაციაშ პოლიტიკას დო თხილანდჷ ოსურეფიშ ნებეფს. მარა მალას დუდი ირჩქინჷ კორუფციული სკანდალეფქ, ნამუეფსჷთ ბჰუტოშ ქომონჯი ასიფ ალი ზარდარი ოკათუდჷ. შედეგო პაკისტანიშ პრეზიდენტიქ ფარუხ ლეგარიქ ბჰუტოშ თარობა ოფიციალურო დეთხინუ. 1997 წანაშ გიშაგორუეფს, პაკისტანიშ ოკათე პარტიაქ დემარცხჷ. ართი წანაშ უკულ ბჰუტოქ ურცხოეთიშა მიდართჷ დო ცხოვრენდჷ დიო დუბაის დო უკულ ლონდონს. 2007 წანას ბჰუტოქ პაკისტანშა დირთჷ დო აქტიურო ქაკათჷ პოლიტიკური პროცესეფს. ართ-ართი პოლიტიკური აქციაშ მიმალობას, 2007 წანაშ ქირსეთუთას ბენაზირ ბჰუტო დოჸვილეს. თიში ჸვილუაშ გეშა პასუხიშგება გეჭოფუ ისლამისტური ტერორისტული ორგანიზაციაქ ალ-კაიდაქ. ბჰუტოშ ჸვილუას თაშნეშე შილებე მონაწილენდკო თალიბანი. ბჰუტო დასაფულეს ბჰუტოშ ფანიაშ მავზოლეუმს, სინდიშ პროვინციას.

ლიტერატურა

• ენციკლოპედია ბრიტანიკა