გალეაცო ჩიანო
| გალეაცო ჩიანო Galeazzo Ciano | ||
 ჩიანო 1936 წანას | ||
| იტალიაშ გალენური საქვარეფიშ მინისტრი | ||
|---|---|---|
| პოსტის გერინაშ ბორჯი | ||
| 9 მანგი, 1936 – 6 ფურთუთა, 1943 | ||
| პრემიერ-მინისტრი | ბენიტო მუსოლინი | |
| წიმოხონი | ბენიტო მუსოლინი | |
| მონძე | ბენიტო მუსოლინი | |
| პოსტის გერინაშ ბორჯი | ||
| 23 მანგი, 1935 – 11 მანგი, 1936 | ||
| პრემიერ-მინისტრი | ბენიტო მუსოლინი | |
| წიმოხონი | პოსტიქ გიჭყჷ | |
| მონძე | დინო ალფიერი | |
| დუნაბადი | 18 მელახი, 1903 ლივორნო, იტალიაშ ომაფე | |
| ნაღურა | 11 ღურთუთა, 1944 (40 წანერი) ვერონა, იტალიაშ სოციალური რესპუბლიკა | |
| ღურაშ ბაძაძი | რხუალა | |
| პოლიტიკური პარტია | ნაციონალური ფაშისტური პარტია | |
| მუმა | კოსტანცო ჩიანო | |
| ნანა | კაროლინა პინი | |
| ალმასქუ | ედა მუსოლინი | |
| სქუალეფი | 3 | |
| გონათაფა | საპიენცაშ უნივერსიტეტი | |
| საქვარუა | დიპლომატი, პოლიტიკოსი | |
| ხეშმოჭარუა |  | |
ჯან გალეაცო ჩიანო, კორტელაცოშ დო ბუკარიშ გრაფი (იტალ. Gian Galeazzo Ciano, conte di Cortellazzo e Buccari; დ. 18 მელახი, 1903 — ღ. 11 ღურთუთა, 1944) — იტალიარი დიპლომატი დო პოლიტიკოსი, მოღალენდჷ იტალიაშ გალენური საქვარეფიშ მინისტრო 1936-1943 წანეფს, მუში მუანთილიშ ბენიტო მუსოლინიშ თარობას.
დებადჷ ლივორნოს, 1903 წანაშ, შინელი ოურდუმე მოღალეშ დო პოლიტიკოსიშ კოსტანცო ჩიანოშ დო თიში ალმასქუშ კაროლინა პინიშ ფანიას. გალეაცოშ მუმა, კოსტანცო ჩიანო რდჷ ადმირალი დო მაართა მოსოფელიშ ლჷმაშ გერგეზი. თინა რდჷ ნაციონალური ფაშისტური პარტიაშ ართ-ართი დუმარსხუაფალი. გალეაცო ჩიანო გურაფულენდჷ იურისპრუდენციას საპიენცაშ უნივერსიტეტის, ნამუშ თებაშ უკულ მუშენდჷ ჟურნალისტო დო უკულ დიპლომატო. 1922 წანას, მუმაწკჷმა ართო მონაწილენდჷ რომიშ მარშის, ნამუშ შედეგო ხეშულობა გეჭოფეს ფაშისტეფქ, ბენიტო მუსოლინიშ მანჯღვერალათ. 1920-იან წანეფიშე რდჷ დიპლომატიური მისიაშ მაკათური დიო ბრაზილიას, უკულ ჩინეთის. 1930 წანაშ 24 პირელს, გალეაცო ჩიანოქ ოსურო ქიმიჸონჷ ბენიტო მუსოლინიშ ცირასქუა ედა. 1935 წანას ჩიანო ქუდარინეს პრესაშ დო პროპაგანდაშ მინისტრო. 1935-1936 წანეფს მონაწილენდჷ იტალიაშ ოურდუმე კამპანიას ეთიოპიას. ჸათაქ თიქ დუდი გეგმირჩქინჷ დო მიოჭირინუ კაპიტანობას. 1936 წანას იტალიაშა დირთჷ მუჭოთ ლჷმაშ გერგეზიქ. თე წანაშ 9 ივანობას, მუსოლინიქ ჩიანო ქუდარინუ გალენური საქვარეფიშ მინისტრო. ჩიანო მუსოლინის ფშხირას აკრიტიკენდჷ, თიში გეგმეფი ვამოწონდჷ დო თვალუნდჷ ნამდა იტალიაშ აკოანჯარაფილი ნძალეფი დიდი ლჷმაშო ხაზირი ვარდჷ. 1942-1943 წანეფს ღერზიშ ქიანეფქ დემარცხეს ოორუე აფრიკას, ბჟაეიოლი ფრონტის, ბრიტანალეფი დო ამერიკალეფი აპირენდეს სიცილიაშა მიშაჭკირუას. ჸათე ბორჯიშე ჩიანო ოცადუდჷ იტალიაშ მაჟირა მოსოფელიშ ლჷმაშე გიშაჸონაფას. ჸათე პოლიტიკაშ გეშათ, ჩიანო მინისტრიშ პოსტიშე გეგნარინეს დო ქუდარინეს იტალიაშ ელჩო ვატიკანს.
1943 წანაშ 9 კვირკვეს, მორსხუეეფქ სიცილიაშა გემშეჭკირეს. ჸათე პოლიტიკური სიტუაციაშ გეშა, 1943 წანაშ 24 კვირკვეს მუსოლინიქ ქიმიჭანუ დიდი ფაშისტური სხუნუ. სხუნუშ აკოხვამილაფაშ მიმალობას, ხონარეფიშ უმენტაშობათ მუსოლინი პოსტიშე გეგნარინეს. ჩიანოქ ხოლო მუსოლინიშ გინორინას ქიმეჩჷ ხონარი. მუსოლინიქ ჸათე გინოჭყვიდირი მუთუნო ვემირჩქინჷ დო მაჟირა ოჭმარეს სამუშაშა მიდართჷ. ონჯუას, იტალიაშ მაფაქ ვიტორიო ემანუელე III-ქ მუსოლინი ომაფე რეზიდენციაშა ქიჭანუ დო პოსტიშე ოფიციალურო გეგნარინუ. მალას მუსოლინი ოჭოფეს დო ჯიხას ქუდახუნეს. 1943 წანაშ ეკენიას გერმანალეფქ მუსოლინის ქიმიოგორეს, ჯიხაშე ონტინეს დო ხეშულობაშა დართინეს ოორუე იტალიას (იტალიაშ სოციალური რესპუბლიკა).
მუსოლინიშ გინორაგვაფაშ უკულ, იტალიაშ ახალი თარობაქ ჩიანო მონწყუ. ჩიანოქ, მუში ფანიაწკჷმა ართო გერმანიაშა ინტუ, 1943 წანაშ 28 მარაშინათუთას. მარა გერმანალეფქ თინა ოჭოფეს დო გეგნოჩეს მუსოლინიშ თარობას, იტალიაშ სოციალური რესპუბლიკას. მუსოლინიშ ზოჯალათ ჩიანო გასამართეს, გითოჩამა ქეკადვეს დო 1944 წანაშ 11 ღურთუთას გორხვეს. თიში ეკონია ზიტყვეფი ჸოფე: "გომორძგუა იტალიას".
გალეაცო ჩიანო მუში დიპლომატიური კარიერაშ გოძვენას, ჭარუნდჷ მემუარეფს, სოდეთ ეჭარილი აფუ მუში ურთიართალა მუსოლინიწკჷმა, შეხვამილაფა ადოლფ ჰიტლერიწკჷმა დო იოახიმ ფონ რიბენტროპიწკჷმა დო შხვა ეპიზოდეფი. ჩიანოშ მემუარეფქ გიმორინაფილქ იჸუ რიბენტროპიშ მეხჷ, ნიურნბერგიშ პროცესის.