ენტონი იდენი
| ენტონი იდენი Anthony Eden | ||
.jpg) იდენი 1942 წანას | ||
| გოართოიანაფილი ომაფეშ პრემიერ-მინისტრი | ||
|---|---|---|
| პოსტის გერინაშ ბორჯი | ||
| 6 პირელი, 1955 – 9 ღურთუთა, 1957 | ||
| მონარქი | ელისაბედ II | |
| წიმოხონი | უინსტონ ჩერჩილი | |
| მონძე | ჰაროლდ მაკმილანი | |
კონსერვატიული პარტიაშ ლიდერი | ||
| პოსტის გერინაშ ბორჯი | ||
| 6 პირელი, 1955 – 10 ღურთუთა, 1957 | ||
| წიმოხონი | უინსტონ ჩერჩილი | |
| მონძე | ჰაროლდ მაკმილანი | |
| დუნაბადი | 12 მანგი, 1897 დარემი, ინგლისი | |
| ნაღურა | 14 ღურთუთა, 1977 (79 წანერი) უილტშირი, ინგლისი | |
| მენოღალობა | .svg){kind=small} გოართოიანაფილი ომაფე | |
| პოლიტიკური პარტია | კონსერვატიული პარტია | |
| მუმა | უილიამ იდენი | |
| ნანა | სიბილ ფრენსის გრეი | |
| ალმასქუ | 1. ბეატრის ბეკეტი 2. კლარისა სპენსერ-ჩერჩილი | |
| სქუალეფი | 3 | |
| გონათაფა | ოქსფორდიშ უნივერსიტეტი | |
| ხეშმოჭარუა |  | |
რობერტ ენტონი იდენი (ინგლ. Robert Anthony Eden, დ. 12 მანგი, 1897 — ღ. 14 ღურთუთა, 1977) — ბრიტანალი პოლიტიკოსი, გოართოიანაფილი ომაფეშ პრემიერ-მინისტრი დო კონსერვატიული პარტიაშ ლიდერი 1955-1957 წანეფს.
მონაწილენდჷ მაართა მოსოფელიშ ლჷმას. უკულ გურაფულენდჷ ბჟაეიოლმარჩქინჯალას (არაბული დო სპარსული ნინეფი) ოქსფორდიშ უნივერსიტეტის. 1920-იან წანეფიშე ქაკათჷ პოლიტიკას. 1923 წანას გიშაგორილქ იჸუ პარლამენტიშ მაკათურო. 1935 წანას, 38 წანერი იდენი ქუდარინეს გალენური საქვარეფიშ მელამოსეთ. იდენი აპროტესტენდჷ პრემიერ-მინისტრი ნევილ ჩემბერლენიშ დარჩქალებაშ (Appeasement) პოლიტიკას, ნამუსჷთ თინა აწარმენდჷ ფაშისტური გერმანიაშ დო იტალიაშ მეხჷ. 1938 წანაშ ფურთუთას იდენქ პოსტიშე გეგნოდირთჷ. 1940 წანაშ 10 მესის პრემიერ-მინისტრო უინსტონ ჩერჩილქ გინირთჷ, ნამუქჷთ იდენი ქუდარინუ ოურდუმე მელამოსეთ. 1940 წანაშ 22 ქირსეთუთას, იდენქ კინ ქიდეკინჷ გალენური საქვარეფიშ მელამოსეშ პოსტი. ჸათე პოსტის თინა მასუმაშა ხოლო ნინალენდჷ, 1951-1955 წანეფს. პოსტიშ გერინაშ ბორჯის, იდენქ მიშეღჷ შანულამი თია ბრიტანულ-ირანული ონაფთობე დისპუტიშ გინოჭყვიდუაშა, იტალია-იუგოსლავიაშ კონფლიქტიშ გინოჭყვიდუაშა, ინდოჩინეთიშ ლჷმაშ თებაშა დო ობჟათე-ბჟაეიოლი აზიაშ ხეკულუაშ ორგანიზაციაშ (სეატო) დორსხუაფაშა.
იდენი ჩერჩილიშ გამაკოჩი რდჷ ვითოხუთი წანაშ გოძვენას დო ჩერჩილიშ უკულ თიქ ქიდეკინჷ მუჭოთ კონსერვატიული პარტიაშ ლიდერიშ, თაშნეშე გოართოიანაფილი ომაფეშ პრემიერ-მინისტრიშ პოსტი. 1956 წანაშ 26 კვირკვეს, ეგვიპტეშ პრეზიდენტიქ გამალ აბდელ ნასერქ გეგმაცხადჷ სუეციშ არხიშ ნაციონალიზაციაშ გეშა. ბრიტანეთიშ თარობა სუეციშ თარი აქციონერი რდჷ 1875 წანაშე. სუეცის კაბეტი შანულობა უღუდჷ ბრიტანეთიშ ოვაჭარე ინტერესეფიშო. 1956 წანაშ გერგობათუთას, სუეციშ არხიშ დორთინაფაშ ღანკით ბრიტანეთიქ, საფრანგეთიქ დო ისრაელქ ეგვიპტეს ქიგიანთხეს. ჸათე მოქმენდალას მაჸუნჷ კაბეტი ნეგატიური რეაქციაქ მოსოფელიშ მასშტაბით. ამერიკაქ დო სხუნუეთიქ მითხის ეგვიპტეშე ჯარეფიშ გიშაჸონაფა. სუეციშ კრიზისი რდჷ ბრიტანეთიშო ისტორიული მარცხი, ნამუქჷთ შანულამო დადაღარჷ ბრიტანეთიშ ინტერესეფი დო გოლინა არხო ბჟაეიოლს. 1957 წანაშ ღურთუთას, ენტონი იდენქ გოართოიანაფილი ომაფეშ პრემიერ-მინისტრიშ პოსტიშე გეგნოდირთჷ. იდენი მერჩქინელი რე ართ-ართი ნარკებო წჷმოძინელი პრემიერ-მინისტრო ბრიტანეთიშ ისტორიას.