ვიოლეტა ბარიოს დე ჩამორო
| ვიოლეტა ბარიოს დე ჩამორო Violeta Barrios de Chamorro | ||
 | ||
| ნიკარაგუაშ პრეზიდენტი | ||
|---|---|---|
| პოსტის გერინაშ ბორჯი | ||
| 25 პირელი, 1990 – 10 ღურთუთა, 1997 | ||
| წიმოხონი | დანიელ ორტეგა | |
| მონძე | არნოლდო ალემანი | |
| დუნაბადი | 18 გჷმათუთა, 1929 რივასი, ნიკარაგუა | |
| ნაღურა | 14 მანგი, 2025 (95 წანერი) სან-ხოსე, კოსტა-რიკა | |
| მენოღალობა |  ნიკარაგუა | |
| პოლიტიკური პარტია | ოპოზიციაშ ერუანული რსხუ გადუდიშულაფაშ ერუანული რსხუ | |
| ალმასქუ | პედრო ხოაკინ ჩამორო კარდენალი | |
| სქუალეფი | 4 | |
ვიოლეტა ბარიოს ტორეს დე ჩამორო (ესპ. Violeta Barrios Torres de Chamorro, დ. 18 გჷმათუთა, 1929 — ღ. 14 მანგი, 2025) — ნიკარაგუალი პოლიტიკოსი, ნიკარაგუაშ პრეზიდენტი 1990-1997 წანეფს, ქიანაშ მაართა ოსური პრეზიდენტი.
ბიოგრაფია
[რედაქტირაფა | წყუშ რედაქტირაფა]ვიოლეტა ჩამოროქ დებადჷ დინდარი ფანიას. გურაფულენდჷ ამერიკას (ტეხასის დო ვირჯინიას). მუამუშიშ ღურაშ უკულ, 1950 წანას ნიკარაგუაშა დირთჷ დო ოსურო მიდაჸუნჷ პედრო ხოაკინ ჩამორო კარდენალს, ნამუთ გაზეთ "La Prensa"-შ რედაქტორი რდჷ. გაზეთი კონწარო აკრიტიკენდჷ სომოსაშ ფანიაშ დიქტატორული მართუალას. ჸათეშ გეშათ, პედრო ჩამოროს თხოზუდეს. 1957 წანას თინა გეგნახორეს. ნიკარაგუაშა ამნისტიაშ გჷმოცხადაფაშ უკულ დირთჷ. მარა პედრო ჩამოროქ იშენ გაგინძორჷ თარობაშ კრიტიკა. 1960-1970-იან წანეფს თინა ბრელშა რდჷ ჭოფილი. 1978 წანაშ 10 ღურთუთას, პედრო ჩამორო დოჸვილეს. თიში ღურას მაჸუნჷ რევოლუციური პროცესეფქ, ნამუეფიშ შედეგო ქუდახუეს ანასტასიო სომოსა დებაილეშ თარობა. ახალი მართუალას, 1979-1980 წანეფიშ მიმალობას, ოკათუდჷ ვიოლეტა ჩამორო ხოლო, ნამუსჷთ ახალი, სანდინისტეფიშ თარობაშ მარქსისტული პოლიტიკა ვამოწონდჷ. ჸათეშ გეშათ თიქ სანდინისტას დეთხუ დო თიშ ოპონენტო გინირთჷ. ვიოლეტა ჩამოროქ ქიდეკინჷ La Prensa"-შ რედაქტორიშ პოსტი დო თევრეშე აკრიტიკენდჷ თარობას. გაზეთი ბრელშა დოკილუ თარობაქ 1980-იან წანეფს, 1986-1987 წანეფს გაზეთი გვალო აკრძალეს. 1980-იან წანეფს ჩამოროს აბრალუაფუდეს ფარაშ ეჭოფუას ცენტრალური ოთოლორე სააგენტოშე, ნამუთ აქტიურო ოხვარუდჷ დო აფინანსენდჷ პარტიზანული ბუნეფს დო არყებულეფს სანდინისტაშ თარობაშ მეხჷ.
1980-იან წანეფიშ ეკონიას, გეთუ პარტიზანული ლჷმეფქ დო მორაგადაფეფიშ შედეგო იმანჯჷ დუდიშული გიშაგორუეფქ, 1990 წანას. ვიოლეტა ჩამორო წჷმარინუანდჷ ოპოზიციაშ ერუანული რსხუს, ნამუთ აკმოდირთუდჷ 14 ოპოზიციური პარტიაშე. ალიანსიქ დამარცხჷ დანიელ ორტეგა, ნამუთ სანდინისტეფიშ კანდიდატი რდჷ. 1990 წანაშ 25 პირელს მინწყუ ვიოლეტა ჩამოროშ საპრეზიდენტო ინაუგურაციაქ.
პოსტიშ გერინაშ ბორჯის, ჩამოროქ წიმიჭყჷ შხვადოშხვა შანულამი რეფორმეფი. პრივატიზაფილქ იჸუ სახენწჷფო ინდუსტრიული კორპორაციეფქ, გეუქვჷ ცენზურაქ, აკოანჯარაფილი ნძალეფიშ მუდანობაქ დერკჷ. ვიოლეტა ჩამორო აქტიურო ოცადუდჷ ოპოზიციური პარტიეფიწჷმა შერიგას დო მეთხოზუდჷ თინეფიწკჷმა ოთინჩალე პოლიტიკას. 1997 წანაშ ღურთუთას, ჩამოროქ საპრეზიდენტო ვადა გათუ დო პოლიტიკაშე მიდართჷ.
ქოძირით თაშნეშე
[რედაქტირაფა | წყუშ რედაქტირაფა]ლიტერატურა
[რედაქტირაფა | წყუშ რედაქტირაფა]- Close, David (1999). Nicaragua: The Chamorro Years. Lynne Rienner Publishers.