ვლადიმერ ბახუტაშვილი

ვლადიმერ ბახუტაშვილი (დ. 23 მელახი, 1931, ქართი — ღ. 2005) — ქორთუ ექიმი, მენცარი.

1955 წანას გათუ ქართიშ სახენწჷფო სამედიცინო ინსტიტუტიშ ოკურნალე ფაკულტეტი.

1957 წანაშე დიჭყჷ მუში პროფესიული მოღალობა პრაქტიკოსი ექიმ-ინფექციონისტიშ პოსტის. 1966 წანას საქორთუოშ სინთელეშ თხილუაშ სამინისტროშ სანიტარიაშ დო ჰიგიენაშ ინსტიტუტის ქჷდარსხუ ვირუსული დო ბაქტერიული ინფექციეფიშ გჷნართა, ნამუსჷთ 1972 წანაშა დუდენდჷ. 1978 წანაშე მუშენდჷ დიო ალექსანდრე ნათიშვილიშ ჯოხონობაშ ექსპერიმენტული მორფოლოგიაშ ინსტიტუტის ბიოტექნოლოგიაშ გჷნართაშ გამაგეთ, 1980 წანაშე თე ინსტიტუტიშ დირექტორიშ გამაკოჩო სამენცარო დარგის. ვლადიმერ ბახუტაშვილიშ სამენცარო-პრაქტიკული ინტერესეფიშ სფერო მიარეგანამი რდჷ, ფორჷნდჷ აკოზათილი ინფექციეფიშ დო დიზენტერიაშ პათოგენეზიშ, ვირუსულ ინფექციეფიშ გოფაჩუაშ, გნოტობიოლოგიაშ, ორგანოშ დო ნოსოვიშ კულტურეფიშ გჷმორინაფაშ ტრანსპლანტაციური იმუნიტეტიშ გურაფას დო შხვას. შურდგჷმუაშ ბოლო წანეფს მუშენდჷ აპოპტოზიშ დო ღერუანი თოლეფიშ პრობლემეფშე. თინა სუმოშშე მეტი სამენცარო ნახანდიშ, მუსხირენი სახეშ მედიკამენტიშ, თინეფს შქას ფართას ჩინებული „პლაფერონიშ“ ავტორი რე.

საკანდიდატო დისერტაციაშ თემა — „ტოქსოპლაზმოზი“, თხილუ 1962 წანას. სადოქტორო დისერტაციაშ თემა — „შიგელეფიშ თოლეფშურიშიანი პარაზიტირაფაშ შანულობა დო ვირუსული ინფექციეფიშ როლი დიზენტერიაშ პათოგენეზის“, თხილუ 1968 წანას.

რდჷ ხარისხეფიშ მემაჩამლი სპეციალიზაფირი სხუნუშ მაკათური. 2001 წანაშე რდჷ საქორთუოშ მენცარობეფიშ აკადემიაშ აკადემიკოსი. მუშენდჷ საქორთუოშ ხანდაშ, სინთელეშ თხილუაშ დო სოციალური უნარღელჸოფაშ სამინისტროს.

ღურჷ 2005 წანას, 73 წანაშ ხანს, დოსაფულაფირი რე ქართის, საბურთალოშ პანთეონს.