ზიაურ რაჰმანი
| ზიაურ რაჰმანი জিয়াউর রহমান | ||
 რაჰმანი 1979 წანას | ||
| ბანგლადეშიშ პრეზიდენტი | ||
|---|---|---|
| პოსტის გერინაშ ბორჯი | ||
| 21 პირელი, 1977 – 30 მესი, 1981 | ||
| ვიცე-პრეზიდენტი | აბდუს სატარი | |
| პრემიერ-მინისტრი | მაშიურ რაჰმანი აზიზურ რაჰმანი | |
| წიმოხონი | აბუ სადათ მუჰამედ საიემი | |
| მონძე | აბდუს სატარი | |
| დუნაბადი | 19 ღურთუთა, 1936
ბაგბარი, ბრიტანეთიშ ინდოეთი | |
| ნაღურა | მესი 30,, 1981 (45 წანერი)
ჩიტაგონგი, ბანგლადეში | |
| ღურაშ ბაძაძი | ჸვილუა | |
| ნთხორუ აბანი | ზიაურ რაჰმანიშ მავზოლეუმი | |
| მენოღალობა |  ბანგლადეში | |
| პოლიტიკური პარტია | ბანგლადეშიშ ნაციონალისტური პარტია | |
| ალმასქუ | ხალედა ზია | |
| სქუალეფი | თარიქი, არაფატი | |
| გონათაფა | პაკისტანიშ ოურდუმე აკადემია | |
| საქვარუა | ოურდუმე მოღალე, პოლიტიკოსი | |
| რელიგია | სუნიზმი | |
| ხეშმოჭარუა |  | |
ზიაურ რაჰმანი (დ. 19 ღურთუთა, 1936 — ღ. 30 მესი, 1981) — ბანგლადეშარი ოურდუმე მოღალე დო პოლიტიკოსი, ბანგლადეშიშ რანწკით მა-6 პრეზიდენტი 1977-1981 წანეფს.
გურაფულენდჷ პაკისტანიშ ოურდუმე აკადემიას დო ნინალენდჷ პაკისტანიშ აკოანჯარაფილი ნძალეფს.[1] მონაწილენდჷ ინდოეთ-პაკისტანიშ მაჟირა ლჷმას, სოდეთ გჷმორჩქინელი გერგეზალაშ გეშა პაკისტანიშ თარობაქ დაჯილდუ ჰილალ-ი-ჯურატიშ ჯილდოთ.[2] მარა ბანგლადეშიშ დუდიშულობაშო ლჷმაშ ბორჯის, 1971 წანას, ზიაურ რაჰმანი რდჷ ბანგლადეშიშ აკოანჯარაფილი ნძალეფიშ ართ-ართი მანჯღვერი. თე წანაშ 27 მელახის, ზიაურ რაჰმანქ რადიოთ გჷმაცხადჷ ბანგლადეშიშ ზოხორინელობა.[3] ჸათეშ გეშათ თინა შინელი რე მუჭოთ "დუდიშულობაშ გჷმმაცხადაფალი". ზოხორინელი ბანგლადეშიშ გოჭყაფაშ უკულ, ზიაურ რაჰმანს უკინებუდჷ შანულამი პოსტეფი. რდჷ ბანგლადეშიშ არმიაშ შტაბიშ უნჩაშიშ გამაკოჩი დო უკულ შტაბიშ უნჩაში. 1975 წანაშ 3 გერგობათუთაშ სახენწჷფო გინორთაშ უკულ, რაჰმანი პოსტიშე გადუდიშულეს. 1975 წანაშ 7 გერგობათუთას ბანგლადეშის ქუმოხვადჷ ახალ სახენწჷფო გინორთაქ, აბუ ტაჰერიშ მანჯღვერალათ. ჸათე მოლინეფიშ უკულ, რეალურ ხეშულობაქ გეგნორთჷ ზიაურ რაჰმანიშ ხეშა.[4] 1977 წანაშე თიქ ქიანაშ პრეზიდენტიშ პოსტი ხოლო ქიდეკინჷ.
მართუალაშ გოძვენას, ზიაურ რაჰმანქ დარსხუ ბანგლადეშიშ ნაციონალისტური პარტია (ბნპ), გემშეღჷ მიარეპარტიული სისტემა, პრესაშ დუდიშულობა, ზიტყვაშ დუდიშულობა დო დუდიშული ბაზარი.[5] თიქ წიმიჭყჷ მასობური ირიგაციაშ პროექტი, სოციალური პროგრამეფი დო შხვა. გალენური პოლიტიკას, ზიაურ რაჰმანქ გაუჯგუშჷ ურთიართალა ბჟადალიშ ქიანეფწკჷმა დო ჩინეთწკჷმა. მართუალაშ ბორჯის, ბრელშა უღუდჷ არდგილი სახენწჷფო გინორთაშ ცადებეფს რაჰმანიშ მართუალაშ მეხჷ. ართ-ართი ჸათეცალ ცადებაშ შედეგო, 1981 წანაშ 30 მელახის, ზიაურ რაჰმანი დოჸვილეს.[6]
ზიაურ რაჰმანი ოდებელი ფიგურა რე ამდღარ ბანგლადეშის. ნამთინე მარკვიალი თის პოზიტიურო უჯინე დემოკრატიული რეფორმეფიშ გეშა. მარა რაჰმანს ფშხირას აკრიტიკენა ოპოზიციაშ თხოზინიშ გურშენჷ.
ზიაურ რაჰმანიშით დორსხუაფილ პარტია - ბნპ ამდღა ხოლო სერიოზულ ნძალა რე ბანგლადეშიშ პოლიტიკურ ოფირჩას. თიშ ალმასქუ, ხალედა ზია სუმშა რდჷ ბანგლადეშიშ პრემიერ-მინისტრი. თიშ სქუას, თარიქის 2026 წანაშ ფურთუთაშე უკებჷ ბანგლადეშიშ პრემიერ-მინისტრიშ პოსტი.
სქოლიო
[რედაქტირაფა | წყუშ რედაქტირაფა]- ↑ Ziaur Rahman. კითხირიშ თარიღი: 2026-04-15.
- ↑ Ziaur Rahman. კითხირიშ თარიღი: 2026-04-15.
- ↑ Ziaur Rahman. კითხირიშ თარიღი: 2026-04-15.
- ↑ Ziaur Rahman. კითხირიშ თარიღი: 2026-04-15.
- ↑ Ziaur Rahman. კითხირიშ თარიღი: 2026-04-15.
- ↑ Ziaur Rahman. კითხირიშ თარიღი: 2026-04-15.