ზულფიკარ ალი ბჰუტო

ზულფიკარ ალი ბჰუტო ذُو الفِقار علی بُھٹّو
ოფიციალური პორტრეტი, 1971 წ.
პაკისტანიშ მა-9 პრემიერ-მინისტრი
პოსტის გერინაშ ბორჯი
14 მარაშინათუთა, 1973 – 5 კვირკვე, 1977
პრეზიდენტი	ფაზალ ილაჰი ჩოუდჰრი
წიმოხონი	ნურულ ამინი (1971)
მონძე	მუჰამედ ზია-ულ ჰაკი
პაკისტანიშ მა-4 პრეზიდენტი
პოსტის გერინაშ ბორჯი
20 ქირსეთუთა, 1971 – 14 მარაშინათუთა, 1973
წიმოხონი	აღა მუჰამედ იაჰია ხანი
მონძე	ფაზალ ილაჰი ჩოუდჰრი
დუნაბადი	5 ღურთუთა, 1928 რატოდეროშ ტეჰსილი, ბრიტანეთიშ ინდოეთი
ნაღურა	პირელი 4, 1979 (51 წანერი) რავალპინდი, პაკისტანი
ღურაშ ბაძაძი	გითოშქვიდაფა
ნთხორუ აბანი	ბჰუტოშ ფანიაშ მავზოლეუმი
მენოღალობა	პაკისტანი
პოლიტიკური პარტია	პაკისტანიშ ოკათე პარტია
მუმა	შაჰ ნავაზ ბჰუტო
ნანა	ხურშედ ბეგუმი
ალმასქუ	1. შირენ ამირი 2. ნუსრატ ისპაჰანი
სქუალეფი	ბენაზირი, მურტაზა, სანამი, შაჰნავაზი
გონათაფა	ობჟათე კალიფორნიაშ უნივერსიტეტი კალიფორნიაშ უნივერსიტეტი (ბერკლი) ოქსფორდიშ უნივერსიტეტი
საქვარუა	ბარისტერი, დიპლომატი, პოლიტიკოსი
რელიგია	ისლამი
ჯილდოეფი	პაკისტანიშ ორდენი (ღურაშ უკულ)

ზულფიკარ ალი ბჰუტო (დ. 5 ღურთუთა, 1928 — ღ. 4 პირელი, 1979) — პაკისტანარი ბარისტერი, დიპლომატი დო პოლიტიკოსი, პაკისტანიშ მა-4 პრეზიდენტი 1971-1973 წანეფს დო პაკისტანიშ მა-9 პრემიერ-მინისტრი 1973-1977 წანეფს, პაკისტანიშ ოკათე პარტიაშ დუმარსხუაფალი.

დებადჷ შინელი პაკისტანარი პოლიტიკოსიშ შაჰ ნავაზ ბჰუტოშ ფანიას. გურაფულენდჷ ობჟათე კალიფორნიაშ, კალიფორნიაშ (ბერკლი) დო ოქსფორდიშ უნივერსიტეტეფს. გურაფაშ თებაშ უკულ დირთჷ პაკისტანშა დო პოლიტიკური პროცესეფს ქაკათჷ. უკინებუდჷ შხვადოშხვა შამულამი პოსტეფი ისკანდერ მირზაშ დო მუჰამედ აიუბ-ხანიშ ადმინისტრაციეფს. 1963 წანას ქუდარინეს გალენურ საქვარეფიშ მინისტრო. ბჰუტოქ ხუჯი დუკინჷ ოპერაცია გიბრალტარს, ნამუსჷთ ინდოეთ-პაკისტანიშ მაჟირა ლჷმაქ მაჸუნჷ. ტაშკენტიშ დეკლარაციაშ ხეშმოჭარუაშ უკულ პოსტიშე გადუდიშულეს. 1967 წანას ბჰუტოქ დარსხუ პაკისტანიშ ოკათე პარტია, ნამუთ გერსხუდჷ მეკვარჩხანე დო სოციალისტური იდეოლოგიას.

1970 წანაშ საპარლამენტო გიშაგორუეფს ბჰუტოშ პარტიაქ მიპალჷ ხონარეფიშ უმენტაშობა ბჟადალ პაკისტანს. ბჟაეიოლ პაკისტანს გემორძგჷ ავამი ლიგაქ, ნამუთ ლჷმენდჷ ბჟაეიოლ პაკისტანიშ (თეხანური ბანგლადეშიშ) ზოხორინელობაშო. პაკისტანიშ ოკათე პარტიაქ დო ავამი ლიგაქ ხეშულობაშ გორთუალაშ გეშა ვემირიგეს. შედეგო თეს მაჸუნჷ ომენოღალე ლჷმაქ დო ინდოეთ-პაკისტანიშ მასუმა ლჷმაქ. ლჷმას პაკისტანქ დემარცხჷ დო ბანგლადეშიქ პაკისტანიშ აკოდგინალუაშე გიშელჷ. პაკისტანიშ მარცხიშ უკულ, აღა მუჰამედ იაჰია ხანქ პრეზიდენტიშ პოსტიშე გეგნოდირთჷ დო 1971 წანაშ ქირსეთუთას, პრეზიდენტო გინირთჷ ზულფიკარ ალი ბჰუტოქ.

1972 წანაშ 2 კვირკვეს, ბჰუტოქ, ინდოეთიშ პრემიერ-მინისტრი ინდირა განდიწკჷმა ხე მაჭარჷ სიმლაშ აპიჯალას, ნამუშ ნძალათ ინდოეთიქ ჯარეფ გეგშეჸონჷ ლჷმაშ მიმალობას დაკინებულ პაკისტანიშ ტერიტორიეფშე (დოხოლაფირო 13,000 კმ²). 1973 წანაშ 28 მარაშინათუთას, პაკისტანქ, ინდოეთიწკჷმა დო ბანგლადეშიწკჷმა ხე მაჭარჷ დელიშ აპიჯალას, ნამუთ ითოლისწინენდჷ ტყვეეფიშ რეპატრიაციას. შედეგო ბჰუტოშ თარობაქ ქიანაშა დართინუ 93,000 პაკისტანარი ტყვე.

ბჰუტოს 1973 წანაშე უკინებუდჷ პრემიერ-მინისტრიშ პოსტი, მუშენდა ახალმეღებულ კონსტიტუციათ პრეზიდენტიშ პოსტიქ ცერემონიულო გინირთჷ. ბჰუტოშ მართუალაშ გოძვენას, პაკისტანქ პოლიტიკურო დეხოლჷ ისლამურ ქიანეფს, თაშნეშე ჩინეთის დო 1974 წანას ოფიციალურო ქიჩინჷ ბანგლადეში. ბჰუტოქ განძალიერჷ პაკისტანიშ ატომური ენერგიაშ კომისია დო წიმიჭყჷ გვირზილური პროგრამა, ნამუსჷთ თინა ერუანულ პრიორიტეტო თვალუნდჷ.

1977 წანაშ საპარლამენტო გიშაგორუეფს პაკისტანიშ ოკათე პარტიაქ გემორძგჷ. მარა ოპოზიციურ პარტიეფქ, გიშაკერზაფილო პაკისტანიშ ნაციონალური ალიანსიქ, გიშაგორუეფიშ შედეგეფი ვეჩინეს დო ბჰუტოშ თარობას აბრალუაფუდეს გიშაგორუეფიშ გაყალბებას. ბჰუტოქ ოპოზიციურ ნძალეფწკჷმა პიჯალა ქუდოდვჷ გიშაგორუეფიშ ახალშო მანჯებაშ გეშა. მარა 1977 წანაშ 5 კვირკვეს, ქუმოხვადჷ ოურდუმე გინორთაქ აკოანჯარაფილი ნძალეფიშ გენერალური შტატიშ უნჩაშიშ, მუჰამედ ზია-ულ ჰაკიშ მანჯღვერალათ. შედეგო ბჰუტო ქუდახუეს, ჯიხას ქუდახუნეს, გასამართეს დო 1979 წანაშ 4 პირელს ღურათ დასაჯეს.