იონ ანტონესკუ
| იონ ანტონესკუ Ion Antonescu | ||
 ანტონესკუ 1941 წანას | ||
| რუმინეთიშ კონდუკეტორი | ||
|---|---|---|
| პოსტის გერინაშ ბორჯი | ||
| 6 ეკენია, 1940 – 23 მარაშინათუთა, 1944 | ||
| წიმოხონი | პოსტიქ გიჭყჷ | |
| მონძე | პოსტიქ გეუქვჷ | |
| პოსტის გერინაშ ბორჯი | ||
| 5 ეკენია, 1940 – 23 მარაშინათუთა, 1944 | ||
| მონარქი | კაროლ II მიჰაი I | |
| წიმოხონი | იონ ჯიგურტუ | |
| მონძე | კონსტანტინ სენეტესკუ | |
| დუნაბადი | 14 მანგი, 1882 პიტეშტი, რუმინეთი | |
| ნაღურა | 1 მანგი, 1946 (63 წანერი) ჯილავაშ ჯიხა, ჯილავა, რუმინეთი | |
| მენოღალობა |  რუმინეთიშ ომაფე | |
| პოლიტიკური პარტია | უპარტიე | |
| ალმასქუ | მარია ანტონესკუ | |
| საქვარუა | ოურდუმე მოღალე, პოლიტიკოსი | |
იონ ანტონესკუ (რუმ. Ion Antonescu, დ. 14 მანგი [ჯვ.სტ. 2 მანგი], 1882 — ღ. 1 მანგი, 1946) — რუმინალი ოურდუმე მოღალე, მარშალი, პოლიტიკოსი, რუმინეთიშ კონდუკეტორი (ფიურერიშ დო დუჩეშ ანალოგი) დო პრემიერ-მინისტრი 1940-1944 წანეფს.
ნინალენდჷ რუმინეთიშ აკოანჯარაფილი ნძალეფს დო მონაწილენდჷ მაართა მოსოფელიშ ლჷმას. მუჭოთ ანტისემიტი ანტონესკუ იზიარენდჷ ულტრა-მემარძგვანეეფიშ დო ფაშისტური პოლიტიკური იდეეფს. შხვადოშხვა ბორჯის უკინებუდჷ შხვადოშხვა პოსტეფი. რდჷ ოურდუმე ატაშე საფრანგეთის, რუმინეთიშ არმიაშ გენერალური შტაბიშ უნჩაში, დუდთხილუაშ მინისტრი. 1930-იან წანეფს მუში პოლიტიკური იდეეფიშ გეშა ფშხირას უღუდჷ კონფლიქტური ურთიართალა რუმინეთიშ მაფა კაროლ II-წკჷმა. ართი პერიოდის ანტონესკუ ჭოფილ ხოლო რდჷ. ანტონესკუქ შანულამი პოპულარობა მიპალუ 1940-იან წანეფიშ პოლიტიკური კრიზისიშ მიმალობას. 1940-1941 წანეფს თინა დუდენდჷ ნაციონალურ-ლეგიონური ხეშულობას, ნამუთ იხასიათებუდჷ ტოტალიტარიზმით, ანტიკომუნიზმით დო ულტრა-ნაციონალიზმით. ნაციონალურ-ლეგიონური ხეშულობა ალიანსის რდჷ რევოლუციურ-რელიგიურ-ფაშისტური იდეოლოგიაშ რკინაშ გვარდიაწკჷმა, ნამუშ ლიდერი ჰორია სიმა რდჷ. 1941 წანაშ რკინაშ გვარდიაშ მაკათურეფიშ არყებაშ მარცხიშ უკულ, ანტონესკუქ მუში პოზიციეფი განძალიერჷ. პრემიერ-მინისტრობაშ მოხ, თიქ ქიდეკინჷ გალენური საქვარეფიშ მინისტრიშ დო დუდთხილუაშ მინისტრიშ პოსტეფი. ანტონესკუშ მართუალაშ მიმალობას, რუმინეთიქ დეხოლჷ ნაცისტური გერმანიას დო ხუჯი დუკინჷ ოპერაცია ბარბაროსას. რუმინეთიქ დირთინუ ბესარაბია დო ოორუე ბუკოვინა. ანტონესკუქ გინირთჷ რუმინეთიშ მარშალო.
ანტონესკუქ გაჭყჷ დიქტატორული დო ტოტალიტარული ხეშულობა. თინა კონწარო თხოზუდჷ ურიეფს, უკრაინალეფს, ჩაჩანეფს. 1944 წანას მორსხუეეფქ წიმიჭყეს რუმინეთიშ ოჰეერე ბომბუა. შედეგო, ანტონესკუქ გინოჭყვიდჷ მორსხუეეფიწჷმა ოთინჩალე მორაგადაფეფიშ დოჭყაფა. 1944 წანაშ 23 მარაშინათუთას, მაფა მიჰაი I-ქ მანწყუ პუტჩი ანტონესკუშ ხეშულობაშ მეხჷ. ანტონესკუ ქუდახუეს, ოჭოფეს დო უკულ გასამართეს, ქეკადვეს ლჷმაშ დანაშურეფი დო ღურაშ განჩინება გეგშუღეს.