კარლოს მენემი
| კარლოს მენემი Carlos Menem | ||
 ოფიციალური პორტრეტი, 1995 წ. | ||
| არგენტინაშ 50-ა პრეზიდენტი | ||
|---|---|---|
| პოსტის გერინაშ ბორჯი | ||
| 8 კვირკვე, 1989 – 10 ქირსეთუთა, 1999 | ||
| წიმოხონი | რაულ ალფონსინი | |
| მონძე | ფერნანდო დე ლა რუა | |
| დუნაბადი | 2 კვირკვე, 1930
ანილიაკო, ლა-რიოხა, არგენტინა | |
| ნაღურა | ფურთუთა 14, 2021 (90 წანერი)
ბუენოს-აირესი, არგენტინა | |
| მენოღალობა |  არგენტინა | |
| ერუანობა | არგენტინალი | |
| პოლიტიკური პარტია | ხუსტისიალისტური პარტია | |
| ალმასქუ | 1. ზულემა იომა 2. სესილია ბოლოკო | |
| სქუალეფი | 4 | |
| რელიგია | ისლამი კათოლიციზმი | |
| ხეშმოჭარუა |  | |
კარლოს საულ მენემი (ესპ. Carlos Saúl Menem, დ. 2 კვირკვე, 1930 — ღ. 14 ფურთუთა, 2021) — არგენტინალი პოლიტიკოსი, არგენტინაშ პრეზიდენტი 1989-1999 წანეფს. მუჭოთ პერონისტის, ვითოსუმი წანაშ გოძვენას, 1990-2001 დო უკულ, 2001-2003 წანეფს, უკებუდჷ ხუსტისიალისტური პარტიაშ დუდმახვენჯიშ პოსტი. მენემიშ პოლიტიკური იდეოლოგია მენემიზმიშ ჯოხოდვალათ რე შინელი.
დებადჷ ლა-რიოხაშ პროვინციაშ ჭიჭე ნოღა ანილიაკოს, სირიალი მიგრანტეფიშ ფანიას. მენემი დუდშე მუსულმანი რდჷ. უკულ პოლიტიკური ღანკით კათოლიკობა მიღუ. ახალნორდობას ბუენოს-აირესის ცხოვრენდჷ, სოდეთ პერონისტული იდეეფით დეინტერესჷ. 1970-იან წანეფიშე პოლიტიკური პროცესეფს აქტიურო ოკათუდჷ. 1973 წანას, გიშაგორილქ იჸუ ლა-რიოხაშ პროვინციაშ გუბერნატორო. 1976 წანაშ სახენწჷფო გინორთაშ უკულ პოსტი ქუდატებაფეს, მარა 1983 წანას, ხოლო ართიშა იჸუ გიშაგორილქ გუბერნატორო. 1989 წანაშ საპრეზიდენტო გიშაგორუეფს, მენემიქ დამარცხჷ რადიკალური ომენოღალე რსხუშ კანდიდატი ედუარდო ანგელოსი დო არგენტინაშ რანწკით 50-ა პრეზიდენტო გინირთჷ.
მენემიშ მართუალაშ ბორჯის, დედაღარჷ ინფლაციაქ დო ქიდიჭყჷ პრივატიზაციაქ. მენემიშ თარობა მეთხოზუდჷ დუდიშული ვაჭარუაშ პოლიტიკას. არგენტინაქ გაუჯგუშჷ ურთიართალა გოართოიანაფილი ომაფეწკჷმა. ფოლკლენდიშ ლჷმაშ (1982) უკულ არგენტინას დო ბრიტანეთის დიპლომატიური ურთიართალა ვაუღუდეს. თაშნეშე, მენემიშ ადმინისტრაციაქ დეხოლჷ ამერიკას დო 1990 წანას, ხუჯი დუკინჷ ამერიკაშით გოჭყაფილი ანტი-ერაყული კოალიციას. მენემიშ მართუალაშ ბორჯის, არგენტინას მოხვადჷ ჟირი შანულამი ტერორისტული აქტიქ: 1992 დო 1994 წანეფიშ ტერაქტეფქ ბუენოს-აირესის. ტერაქტეფქ მინწყუ ისრაელიშ საელჩოშ დო არგენტინალი ურიეფიშ ასოციაციაშ მეხჷ. 1995 წანაშ გიშაგორუეფს კინ მენემიქ გემორძგუ დო მაჟირა ვადათ ქიდეკინჷ პრეზიდენტიშ პოსტი. 1997 წანას, მენემიშ სააწმარენჯოთ აკიკათეს ოპოზიციური პარტიეფქ. თინეფქ დიო 1997 წანაშ ოკანონმადვალე გიშაგორუეფი მიგეს დო ჟირი წანაშ უკულ თინეფიშ კანდიდატიქ საპრეზიდენტო გიშაგორუეფს ხოლო გემორძგუ.
კარლოს მენემის ფშხირას აბრალუაფუდეს კორუფციას, რთამიშ ეჭოფუას, ანჯარიშ ტრეფიკინგის დო შხვა დანაშურეფს. მარა მენემი, მუჭოთ სენატორი, იმუნიტეტით სარგებლენდჷ დო თინა ჯიხას ვადუხუნუაფუნა. 2003 წანას, მენემი ხოლო ართიშა მონაწილენდჷ საპრეზიდენტო გიშაგორუეფს. გიშაგორუეფს მენემიშ ოპონენტი ნესტორ კირშნერი რდჷ. გიშაგორუეფიშ მაჟირა ტურს მენემიქ მუში კანდიდატურა მონწყუ. შედეგო არგენტინაშ პრეზიდენტო ნესტორ კირშნერქ გინირთჷ.