კეროლ ლომბარდი

კეროლ ლომბარდი
Carole Lombard
ლომბარდი 1940 წანას
ჯოხო დაბადება შვანს	ჯეინ ელის პიტერსი
მოღალობა	1921–1942
ბიოგრაფიული ჩინებეფი
დაბადებაშ თარიღი	6 გჷმათუთა, 1908
დაბადებაშ აბანი	ფორტ-უეინი, ინდიანა, ააშ
ღურაშ თარიღი	ღურთუთა 16, 1942 (33 წანერი)
ღურაშ აბანი	პოტოსიშ გვალა, ნევადა, ააშ
ნთხორუაშ აბანი	ფორესტ-ლაუნიშ მემორიალურ პარკი, გლენდეილი, კალიფორნია
საქვარუა:	არტისტი
მენოღალობა	ააშ
ერუანობა	ამერიკალი
მუმა	ფრედერიკ პიტერსი
ნანა	ელიზაბეთ პიტერსი
ალმასქუ	უილიამ პაუელი (გ. 1931; ჩეთხ. 1933) კლარკ გეიბლი (გ. 1939)

კეროლ ლომბარდი (ინგლ. Carole Lombard, ბადებაშ ედომშამ ჯოხო — ჯეინ ელის პიტერსი; დ. 6 გჷმათუთა, 1908 — ღ. 16 ღურთუთა, 1942) — ამერიკალ ოსურ არტისტი, ნამუთ გჷშაკერზაფილო ჩინებულ რდჷ მუშ ენერგიულ დო შხირას ექსცენტრულ როლეფით სკრუბოლ-კომედიეფს. 1999 წანას, ამერიკაშ კინოინსტიტუტიქ (AFI) ლომბარდი 23-ა აბანს ქიმკიწონჷ კლასიკურ ჰოლივუდიშ კინოშ უკაბეტაშ ოსურ კინომურიცხეფიშ ერკებულს.

ლომბარდიქ დებადჷ დინდარ ფანიას ფორტ-უეინს, ინდიანას, მარა ლოს-ანჯელესის ირდუდჷ ხვალეხე დიდაწკჷმა. 12 წანერ რდჷნ თეშ, რეჟისორ ალან დუანიქ ქიმიჭანჷ დო მუშ ეკრანულ დებიუტ მანჯჷ ფილმის „იდეალურ დჷნაშებუ“ (1921). 16 წანერობაშ ხანს კონტრაქტ გაფორმჷ Fox Film Corporation-წკჷმა, მარა თარო ეპიზოდურ როლეფს ლაჸაფენდჷ დო ართ წანაშა დეთხინეს. თიშ კარიერა მეხოლაფირო დათებუს მიორედჷ 19 წანერობაშ ხანშო, მუჟანსჷთ ავტოავარიაშ ბორჯის აკოტახილ საბორე სარკექ სახეს აკნაბუჯგა ქუგუტჷნ, მარა თიქ თე გაჭირება გინიღჷ დო 15 კუნტამეტრაჟიან კომედიას ილაჸაფჷ მაკ სენეტი-შო 1927 წანაშე 1929 წანაშა. უკულ თიქ ქჷდიჭყუ ლაჸაფ რსულმეტრაჟიან ფილმეფს, მუჭომეფით რდჷ „მაღალ ნჭუ“ (1929) დო „რეკეტიორი“ (1929). ფილმის „არიზონალ ბაღანა“ (1930) წჷმოძინელ როლიშ უკული, თიწკჷმა კონტრაქტ სტუდია Paramount Pictures-ქ გაფორმჷ.

Paramount-იქ მალას ქჷდიჭყუ ლომბარდიშ გინოღალა თარ როლეფს, დუდშე უმოსო დრამატულ ფილმეფს. თიშ პოპულარობაქ ძალამო ქიმიძინჷ, მუჟანსჷთ 1931 წანას უილიამ პაუელშა გეთხჷნ, მარა ჟირ წანაშა თინეფქ მაჸალურო ართიანს დეთხიეს. გინმაჭყვიდირე ჭურჭულ ლომბარდიშ კარიერას რდჷ ჰოვარდ ჰოუქსიშ პიონერულ სკრუბოლ-კომედია „XX ოშწანურა“ (1934). არტისტიქ მუშ აფამია ზუსტას თე ჟანრის ქოძირჷ დო გაგინძორჷ ლაჸაფ თიცალ წჷმოძინელ ფილმეფს, მუჭომეფით რდჷ: „Hands Across the Table“ (1935) — პოპულარულ დუეტი ფრედ მაკ-მიურეიწკჷმა; „ჩქიმ ქომონჯ გოდფრი“ (1936) — მუდგაშოთ ოსკარიშ ნომინაცია მიპალჷ (პაუელწკჷმა ართო ილაჸაფჷ); „Nothing Sacred“ (1937). თე ბორჯის ლომბარდიქ კლარკ გეიბლშა გეთხჷ. ათე „სუპერჭკობაქ“ მედიაშ დო ჯარალუაშ უკაბეტაშ ხვილაფა მიკიჭოფჷ. ოსკარიშ მოგებაშ კორინით, ლომბარდიქ ვითწანურაშ დათებუს სერიოზულ როლეფშა გეგნორთჷ, მარა თე მალობათ წჷმოძინას ვემიაჭირინუ. საბოლათ, თიქ კჷნ კომედიას დაურთჷ ალფრედ ჰიჩკოკიშ ფილმის „მისტერ დო მისის სმიტი“ (1941) დო ერნსტ ლუბიჩიშ „ჸოფა ვარ-და ვაჸოფა“ (1942), ნამუთ თიშ ეკონია ეკრანულ როლ რდჷ.

კეროლ ლომბარდიქ 33 წანაშ ხანას დოღურჷ TWA Flight 3-იშ ავიაკატასტროფას პოტოსიშ გვალას, ნევადას. თე უბედურ შვანქ მოხვადჷ თი ბორჯის, მუჟანსჷთ არტისტ ოურდუმე ობლიგაციეფიშ ტურნეშე ირთუდჷნ. თინა დუდგინოდვალირო ოხვარუდჷ მუშ ქიანას მაჟირა მოსოფელიშ ლჷმაშ ბორჯის დო ზუსტას თე მისიაქ ქეშიკიბირჷ თიშ რინა. ლომბარდ სქიდჷ სკრუბოლ-კომედიაშ ჟანრიშ დო ამერიკულ კომედიაშ ართ-ართ გჷმოხანტილ არტისტო. თინა მერჩქინელ რე კლასიკურ ჰოლივუდიშ კინოშ ნანდულ სახეთ. თიშ ენერგია, ნიჭ დო ქარიზმა ამდღარშათ სამანგა რე არტისტეფშო ედომუშამ მოსოფელს.

რესურსეფ ინტერნეტის

• კეროლ ლომბარდი — კინოფილმეფიშ ინტერნეტ მუნაჩემეფიშ ბაზას (ინგლისური)
• კეროლ ლომბარდი TCM-იშ კინოფილმეფიშ მუნაჩემეფიშ ბაზას
• Carole Lombard at Virtual History
• Carole Lombard at Indiana Historical Bureau