ლასარო კარდენასი
| ლასარო კარდენასი Lázaro Cárdenas | ||
.png) კარდენასი 1930-იან წანეფს | ||
| მექსიკაშ პრეზიდენტი | ||
|---|---|---|
| პოსტის გერინაშ ბორჯი | ||
| 1 ქირსეთუთა, 1934 – 30 გერგობათუთა, 1940 | ||
| წიმოხონი | აბელარდო როდრიგესი | |
| მონძე | მანუელ ავილა კამაჩო | |
| დუნაბადი | 21 მესი, 1895 ხიკილპანი, მიჩოაკანი, მექსიკა | |
| ნაღურა | გჷმათუთა 19, 1970 (75 წანერი) მეხიკო, მექსიკა | |
| მენოღალობა |  მექსიკა | |
| ერუანობა | მექსიკარი | |
| პოლიტიკური პარტია | ინსტიტუციურ-რევოლუციური პარტია | |
| ალმასქუ | ამალია სოლორსანო | |
| სქუალეფი | კუაუტემოკ კარდენასი | |
| საქვარუა | ოურდუმე მოღალე, პოლიტიკოსი | |
ლასარო კარდენას დელ რიო (ესპ. Lázaro Cárdenas del Río, დ. 21 მესი, 1895 — ღ. 19 გჷმათუთა, 1970) — მექსიკარი ოურდუმე მოღალე დო პოლიტიკოსი, მექსიკაშ პრეზიდენტი 1934-1940 წანეფს. პრეზიდენტობაშახ უკებუდჷ შხვადოშხვა შანულამი პოსტეფი. რდჷ მიჩოაკანიშ შტატიშ გუბერნატორი 1928-1932 წანეფს, ინსტიტუციურ-რევოლუციური პარტიაშ პრეზიდენტი 1930-1931 წანეფს დო მექსიკაშ ოურდუმე მელამოსე 1933 წანას. უკულ, 1942-1945 წანეფს მოღალენდჷ ერუანული დუდთხილუაშ მელამოსეთ. კარდენასიშ პრეზიდენტობათ გეთუ მაქსიმატოშ პერიოდიქ.
კარდენასიქ, მექსიკაშ რევოლუციაშ მიმალობას ქაკათჷ კონსტიტუციონალისტური არმიას, სოდეთ შანულამი წჷმოძინეფს მიოჭირინუ დო გინირთჷ გენერალო. 1934 წანას, პლუტარკო ელიას კალიესიქ, ნამუთ პოლიტიკური პროცესეფს რეალურო მართუნდჷ, კარდენასი პრეზიდენტობაშ კანდიდატო ქჷმწარინუ. 1928-1934 წანეფიშ პერიოდი მექსიკაშ ისტორიას, შინელი რე მაქსიმატოშ ჯოხოდვალათ. ჸათე ბორჯის ელიას კალიესის ვაუკებუდჷ პრეზიდენტიშ პოსტი ოფიციალურო, მარა თინა სკიდუდჷ ქიანაშ დე ფაქტო მამართალო. 1934 წანაშ კვირკვეშ გიშაგორუეფს კარდენასიქ ხონარეფიშ 98 % მიპალუ დო გემორძგუ.
პრეზიდენტიშ პოსტიშ დაკინებაშ უკულ მალას, კარდენასიქ ელიას კალიესის ვადაჸუნჷ დო პოლიტიკური მანევრეფიშ შედეგო აძვილჷ ელიას კალიესი მექსიკაშე გეგნიხორუკო. კარდენასიქ წიმიჭყჷ შანულამი რეფორმეფი. თიქ დადაღარჷ მექსიკაშ აკოანჯარაფილი ნძალეფიშ პოლიტიკური როლი. 1938 წანას კარდენასიქ აკეთჷ მექსიკაშ ონაფთობე ინდუსტრიაშ ნაციონალიზაცია დო დარსხუ სახენწჷფო კორპორაცია პემექსი. კარდენასიშ თარობაქ, თაშნეშე ატარჷ დიხაშ რეფორმა, ნამუშ შედეგო ჭიჭე ფერმერეფს გინაჩჷ დიხეფქ. კარდენასიქ ხე შეუნწყუ გონათაფაშ სისტემას ხოლო. 1936 წანას დირსხუ მექსიკაშ ერუანული პოლიტექნიკური ინსტიტუტიქ დო 1940 წანას მექსიკაშ კოლეჯიქ.
მექსიკას, ლასარო კარდენასი მერჩქინელი რე მაეჩა ოშწანურაშ ართ-ართი უდიდაში დო პოპულარული პრეზიდენტო. თიში ართ-ართი უშანულამაში მეჭირინაფათ თვალუნა თის ნამდა კარდენასიქ საპრეზიდენტო ვადაშ თებაშ უკულ ხეშულობა დათმჷ. თიში მონძე რდჷ მანუელ ავილა კამაჩო, ნამუთ პოლიტიკური კარიერაშ გოძვენას კარდენასიშ პატრონაჟით სარგებლენდჷ.