ლი კუან იუ

	ლი კუან იუ
	; ლი კუან იუ 1975 წანას
სინგაპურიშ მა-1 პრემიერ-მინისტრი
პოსტის გერინაშ ბორჯი
	5 მანგი, 1959 – 28 გერგობათუთა, 1990
წიმოხონი	პოსტიქ გიჭყჷ
მონძე	გო ჩოკ ტონგი
ნაღურა	23 მელახი, 2015 (91 წანერი); სინგაპური
მენოღალობა	სინგაპური
პოლიტიკური პარტია	ოკათე საქვარიშ პარტია
ალმასქუ	კვა გეოკ ჩუ
სქუალეფი	ლი სიან ლუნი; ლი სიან იანი; ლი ვეი ლინგი
გონათაფა	სინგაპურიშ ერუანული უნივერსიტეტი; ლონდონიშ ეკონომიკაშ სკოლა; ფიცუილიამიშ კოლეჯი
საქვარუა	იურისტი, პოლიტიკოსი
რელიგია	აგნოსტიციზმი

ლი კუან იუ (ინგლ. Lee Kuan Yew, ჩინ. 李光耀; დ. 16 ეკენია, 1923 — ღ. 23 მელახი, 2015) — სინგაპურალი პოლიტიკოსი დო იურისტი, სინგაპურიშ მა-1 პრემიერ-მინისტრი 1959-1990 წანეფს.^[1] თიშ მართუალათ, ბრიტანეთიშ ჸოფილი კოლონია სინგაპურქ გინირთჷ მოსოფელიშ ართ-ართ წჷმოძინელ სახენწჷფოთ.^[2]

გურაფულენდჷ იურისპრუდენციას კემბრიჯიშ უნივერსიტეტის. გურაფაშ თებაშ უკულ მოღალენდჷ ადვოკატო დო აქტიურო მონაწილენდჷ ანტი-კოლონიური ჸარაფის. 1950-იან წანეფიშე აქტიურო ქაკათჷ პოლიტიკური პროცესეფს დო 1954 წანას ქუდარსხუ ოკათე საქვარიშ პარტია, ნამუქჷთ მალას გინირთჷ დომინანტური პოლიტიკური პარტიათ სინგაპურს.^[3] 1959 წანას, ლიქ გიშაგორილქ იჸუ სინგაპურიშ პრემიერ-მინისტრო.^[4] თიშ ლიდერობათ სინგაპურქ, 1959 წანას მიოჭირინუ მუშით-მართუალას დო 1963 წანას ქიმიარცხუ მალაიზიას. მარა ჟირ წანაშ უკულ, პოლიტიკური, ეთნიკური დო იდეოლოგიური ბაძაძეგიშ გეშა სინგაპურქ მალაიზიაშ აკოდგინალუაშე გიშელჷ დო ზოხორინელობა მიპალჷ.^[5]

დუდშე სინგაპური სერიოზული ეკონომიკური პრობლემეფიშ წოხოლე გერდჷ. ლიშ ინიციატივათ იმანჯჷ შანულამი ეკონომიკური რეფორმეფქ. ინდუსტრიალიზაციაშ დო ურცხოლი ინვესტიციეფიშ შედეგო სინგაპურიშ ეკონომიკური ჸოფირალაქ შანულამო გეუჯგუშჷ დო სინგაპურქ გლობალური ფინანსური დო ოვაჭარე ჰაბო გინირთჷ. ლი, თაშნეშე მეთხოზუდჷ ნძალიერი ანტი-კორუფციული პოლიტიკას. ლიშ ხეშულობა ფშხირას რდჷ კრიტიკაშ ობიექტი ხოლო, ავტორიტარული დო ცენტრალიზაფილი მართუალაშ გეშა. ლიშ ინიციატივათ იჸუ მეღებულქ კონწარი კანონეფქ, თხოზუდეს ოპოზიციას დო ცენზურაშ თუდო რდჷ პრესა დო მედია. მოხუჯეეფიშ მეჯინათ, ლიშ ჸათე ავტორიტარული ბიჯგეფქ სინგაპურს მოუღჷ პოლიტიკური სტაბილურობა დო ეკონომიკური წჷმოძინა, მუჟამსჷთ კრიტიკოსეფი ანტკიცენა ნამდა ლიშ ავტორიტარული მართუალაშ მეთოდეფქ შანულამო დადაღარჷ დემოკრატიული დუდიშულობა.^[6]

1990 წანას, ლიქ პრემიერ-მინისტრობაშე გეგნოდირთჷ, მარა იშენით სქიდუდჷ აქტიური ფიგურათ სინგაპურიშ თარობას, დო შხვადოშხვა ბორჯის უკინებუდჷ შხვადოშხვა პოსტეფი. ლიქ ღურუ 2015 წანაშ 23 მელახის, 91 წანერქ. თინა მერჩქინელი რე სინგაპურიშ ტრანსფორმაციაშ არქიტექტორო დო თეხანური ბორჯიშ ართ-ართი უდიდაში პოლიტიკური ლიდერო.^[7]

ლიტერატურა

ენციკლოპედია ბრიტანიკა

სქოლიო

[1] ttps://www.britannica.com/biography/Lee-Kuan-Yew

[2] ttps://www.britannica.com/biography/Lee-Kuan-Yew

[3] ttps://www.britannica.com/topic/Peoples-Action-Party

[4] ttps://www.britannica.com/biography/Lee-Kuan-Yew

[5] ttps://www.britannica.com/biography/Lee-Kuan-Yew

[6] ttps://www.britannica.com/biography/Lee-Kuan-Yew

[7] ttps://www.britannica.com/biography/Lee-Kuan-Yew

[1]

[2]

[3]

[4]

[5]

[6]

[7]