მითრიდატე II (პართია)
| მითრიდატე II 𐭌𐭄𐭓𐭃𐭕 | |
 მითრიდატე II-შ დრაქმა | |
| პართიაშ მაფა | |
|---|---|
| პოსტის გერინაშ ბორჯი | |
| ჯვ. წ. 124 – ჯვ. წ. 91 | |
| წიმოხონი | არტაბან I |
| მონძე | გოტარზ I |
| ნაღურა | ჯვ. წ. 91 |
| მუმა | არტაბან I ვარდა ფრიაპატი |
| სქუალეფი | გოტარზ I მითრიდატე III |
| რელიგია | ზოროასტრიზმი |
მითრიდატე II (პართ. 𐭌𐭄𐭓𐭃𐭕) — პართიაშ მაფა ჯვ. წ. 124-91 წანეფს, არშაკიდეფიშ დინასტიაშ წჷმმარინაფალი. მერჩქინელი რე პართიაშ ართ-ართი უდიდაში მაფათ დო შინელი რდჷ მუჭოთ მითრიდატე დიდი.
მითრიდატექ შანულამო გენძალიერჷ პართია. თიქ გაჭყჷ ოურდუმე ალიანსი ხარაკენაწკჷმა, ქიდიჸუნუ ელიმაიდაშ ომაფე, თაშნეშე არაბეფი, ნამუეფით სერიოზული საფრთხეს წჷმარინუანდეს ბაბილონეთიშო. მითრიდატე II რდჷ მაართა პართიალი მაფა, ნამუქჷთ პართიაშ პოლიტიკური მართუალა გოფაჩჷ კავკაციაშ რეგიონს: სომხეთიქ, იბერიაქ დო ალბანეთიქ გინირთეს პართიაშ ვასალური სახენწჷფოეფო. ბჟაეიოლს, მითრიდატექ დამარცხჷ ბაქტრიას მახორუ გეგია კათეფი დო ქიდეკინჷ საკესტანი. ჯვ. წ. 114/113 წანეფს, მითრიდატექ სელევკიდეფს მიდუღუ დურა-ევროპოსი. ჯვ. წ. 95 წანაშო, ოორუე მესოპოტამიაშ ომაფეეფქ: ადიაბენაქ, გორდუენექ დო ოსროჰენაქ ქიჩინეს პართიაშ ხეშულობა. მითრიდატეშ მართუალათ, პართიაქ მიოჭირინუ ტერიტორიული ექსპანსიაშ პიკის. მითრიდატეშ მართუალაშ ბორჯის, პართიაქ გაჭყჷ დიპლომატიური ურთიართალა რომიწკჷმა დო ხანიშ დინასტიაწკჷმა (ჩინეთი).