მითრიდატე I (პართია)

	მითრიდატე I; ‎‎𐭌𐭄𐭓𐭃𐭕‎
	; მითრიდატეშ პორტრეტი ტეტრადრაქმას. მითრიდატეს დუს გიორთჷ ბერძენული ომაფე დიადემა
პართიაშ მაფა
პოსტის გერინაშ ბორჯი
	ჯვ. წ. 165 – ჯვ. წ. 132
წიმოხონი	ფრაატ I
მონძე	ფრაატ II
ნაღურა	ჯვ. წ. 132;
მუმა	ფრიაპატი
ალმასქუ	რინუ
სქუალეფი	როდოგუნა; ფრაატ II

მითრიდატე I (პართ. 𐭌𐭄𐭓𐭃𐭕) — პართიაშ მაფა ჯვ. წ. 165-132 წანეფს, არშაკიდეფიშ დინასტიაშ წჷმმარინაფალი. თიში მართუალაშ ბორჯის, პართიაქ შანულამო გენძალიერჷ დო გინირთჷ დომინანტური პოლიტიკური ნძალათ ჯვეში არხო ბჟაეიოლს. მითრიდატექ ქიდეკინჷ არია, მარგიანე დო ბჟადალი ბაქტრია. უკულ მითრიდატექ წიმიჭყჷ ოურდუმე კამპანია სელევკიდეფიშ იმპერიაშ მეხჷ დო ქიდიჸუნუ მიდია, ატროპატენა ჯვ. წ. 148/7 წანას. ჯვ. წ. 141 წანას მითრიდატექ ქიდიჸუნუ ბაბილონეთი დო მანჯჷ ოფიციალური ინვესტიტურაშ ცერემონიალი სელევკიას. ელიმაიდაქ დო ხარაკენაქ პართიაშ ვასალური სახენწჷფოეფო გინირთეს. ჯვ. წ. 140 წანაშო, მუჟამსჷთ მითრიდატე ოლიმუდჷ საკეფიშ გეგია კათას, ბჟაეიოლს, სელევკიდეფიშ მაფაქ, დემეტრე II ნიკატორქ ქირგებუ მომენტი დო მინდომუ ტერიტორიეფიშ დორთინაფა, მარა დემარცხჷ დო ტყვეთ ხეშა ქაშუოლჷ პართიალეფს.

მითრიდატე I-ს მუში ოურდუმე დო პოლიტიკური მეჭირინაფეფიშ გეშა, ფშხირას ადარენა კიროს დიდის, აქემენიანეფიშ იმპერიაშ დუმარსხუაფალს. მითრიდატე რდჷ მაართა პართიალი მონარქი, ნამუთ მიშინუაფუდჷ ჯვეში აქემენიდური ტიტულით მაფეფიშ მაფა (შაჰინშაჰი). მითრიდატექ ღურუ ჯვ. წ. 132 წანას. თიში მონძე რდჷ სქუა ფრაატ II.

რესურსეფი ინტერნეტის

ენციკლოპედია ბრიტანიკა