ნესტორ კირშნერი
| ნესტორ კირშნერი Néstor Kirchner | ||
.jpg) კირშნერი 2005 წანას | ||
| არგენტინაშ 55-ა პრეზიდენტი | ||
|---|---|---|
| პოსტის გერინაშ ბორჯი | ||
| 25 მესი, 2003 – 10 ქირსეთუთა, 2007 | ||
| წიმოხონი | ედუარდო დუალდე | |
| მონძე | კრისტინა ფერნანდესი | |
| დუნაბადი | 25 ფურთუთა, 1950 რიო-გალიეგოსი, სანტა-კრუსი, არგენტინა | |
| ნაღურა | გჷმათუთა 27, 2010 (60 წანერი) ელ-კალაფატე, სანტა-კრუსი, არგენტინა | |
| მენოღალობა |  არგენტინა | |
| ერუანობა | არგენტინალი | |
| პოლიტიკური პარტია | ხუსტისიალისტური პარტია გომორძგუაშ ფრონტი (2003-2010) | |
| ალმასქუ | კრისტინა ფერნანდესი | |
| სქუალეფი | 2 | |
| პროფესია | იურისტი | |
| საქვარუა | ადვოკატი, პოლიტიკოსი | |
| რელიგია | კათოლიციზმი | |
| ხეშმოჭარუა |  | |
ნესტორ კარლოს კირშნერ ოსტოიჩი (ესპ. Néstor Carlos Kirchner Ostoić; დ. 25 ფურთუთა, 1950 — ღ. 27 გჷმათუთა, 2010) — არგენტინალი იურისტი დო პოლიტიკოსი, არგენტინაშ პრეზიდენტი 2003-2007 წანეფს.
გურაფულენდჷ იურისპრუდენციას ლა-პლატაშ ერუანული უნივერსიტეტის. სტუდენტობაშ ბორჯის თინა ახალნორდული პერონისტული ორგანიზაციაშ მაკათური რდჷ. 1975 წანას ნესტორ კირშნერქ ოსურო ქიმიჸონჷ კრისტინა ფერნანდესი, ნამუთ, თაშნეშე იურიდიული ფაკულტეტიშ სტუდენტი რდჷ. გურაფაშ თებაშ უკულ, 1976 წანას, თინეფქ ოცხოვრებშა სანტა-კრუსიშა მიდართეს, სოდეთ ქუდარსხუეს წჷმოძინელი იურიდიული კომპანია. 1970-იან წანეფს ნესტორ კირშნერი აქტიურო მონაწილენდჷ პოლიტიკური პროცესეფს დო ართი პერიოდის, პოლიტიკური აქტივიზმიშ გეშა ჭოფილი ხოლო რდჷ. 1987 წანას, გიშაგორილქ იჸუ ნოღა რიო-გალიეგოსიშ მერო დო 1991 წანას სანტა-კრუსიშ გუბერნატორო. ჸათე პოსტი თის სუმი ვადაშ გოძვენას უკინებუდჷ. კირშნერი არგენტინაშ თიხანური პრეზიდენტიშ, კარლოს მენემიშ ფშხირი კრიტიკოსი რდჷ.
2003 წანას კირშნერქ დუდი ქჷმწარინუ არგენტინაშ პრეზიდენტობაშ კანდიდატო. თიში კანდიდატურას მითინი სერიოზულო ვათვალუნდჷ, მარა წჷმოძინელი საპრეზიდენტო კამპანიათ, 2003 წანაშ საპრეზიდენტო გიშაგორუეფს შანულამი შედეგეფს მიოჭირინუ. გიშაგორუეფს კირშნერიშ ოპონენტი კარლოს მენემი რდჷ. გიშაგორუეფიშ მაართა ტურს კირშნერქ მაჟირა აბანი ქიდეკინჷ, მაჟირა ტურს მენემიქ მუში კანდიდატურა მონწყუ. შედეგო არგენტინაშ პრეზიდენტო ნესტორ კირშნერქ გინირთჷ.
მართუალაშ ბორჯის, კირშნერქ ლჷმა გეგმუცხადჷ ოურდუმე მოღალეეფს, უჟინაში სასამართალოს დო შხვა ინსტიტუციეფს ნამუეფით არგენტინას პოპულარობათ ვასარგებლენდეს. კირშნერქ წიმიჭყჷ შხვადოშხვა ეკონომიკური რეფორმეფი. კირშნერიშ ინიციატივათ ქუმოხვადჷ არგენტინული პესოშ დევალვაციაქ, ნამუქჷთ ეკონომიკური წჷმოძინა გიმიჭანუ. კირშნერიშ გინოჭყვიდირით, 2005 წანას, არგენტინაშ ერუანული ხაზინაქ გინიგჷ საირქიანო სავალუტო ფონდიშ ვალი, ვითი მილიარდი დოლარიშ მუდანობათ. გალენური პოლიტიკას, კირშნერქ დეხოლჷ ლათინურ ამერიკაშ პოპულისტი ლიდერეფს. მართუალაშ ეკონია წანეფს, დუდი ირჩქინჷ კორუფციული სკანდალეფქ, ქიმიძინჷ ინფლაციაქ, სერიოზული პრობლემათ სქიდუდჷ ენერგო კრიზისი.
კირშნერქ ვეგნოჭყვიდჷ მაჟირა ვადათ კალიშ ღვაფა დო 2007 წანაშ საპრეზიდენტო გიშაგორუეფს ხუჯი დუკინჷ მუში ალმასქუს, პერონისტული პარტიაშ (ხუსტისიალისტური პარტია) კანდიდატის კრისტინა ფერნანდესის, ნამუქჷთ გიშაგორუეფს გემორძგუ დო არგენტინაშ მაართა ოსური პრეზიდენტო გინირთჷ.