ნიკოლაი ბუხარინი
| ნიკოლაი ბუხარინი Николай Бухарин | ||
 ბუხარინი 1920-იან წანეფს | ||
| კომუნისტური ინტერნაციონალიშ მარსულებერი კომიტეტიშ გენერალური მელამოსე | ||
|---|---|---|
| პოსტის გერინაშ ბორჯი | ||
| გერგობათუთა, 1926 – პირელი, 1929 | ||
| წიმოხონი | გრიგორი ზინოვიევი | |
| მონძე | ვიაჩესლავ მოლოტოვი | |
პრავდაშ რედაქტორი | ||
| პოსტის გერინაშ ბორჯი | ||
| გერგობათუთა, 1918 – პირელი, 1929 | ||
| წიმოხონი | იოსებ სტალინი | |
| მონძე | მიხეილ ოლმინსკი | |
მა-13, მა-14, მა-15 პოლიტბიუროშ რსული მაკათური | ||
| პოსტის გერინაშ ბორჯი | ||
| 2 მანგი, 1924 – 17 გერგობათუთა, 1929 | ||
მა-8, მა-9, მა-10, მა-11, მა-12 პოლიტბიუროშ კანდიდატი მაკათური | ||
| პოსტის გერინაშ ბორჯი | ||
| 8 მელახი, 1919 – 2 მანგი, 1924 | ||
| დუნაბადი | 9 გჷმათუთა, 1888 მოსკოვი, რუსეთიშ იმპერია | |
| ნაღურა | 15 მელახი, 1938 (49 წანერი) მოსკოვი, რუსეთიშ სფსრ, სსრრ | |
| ღურაშ ბაძაძი | რხუალა | |
| მენოღალობა |  სსრრ | |
| პოლიტიკური პარტია | რსდმპ (ბოლშევიკეფი) (1906-1918) სრკპ (1918-1937) | |
| ალმასქუ | 1. ნადეჟდა ლუკინა 2. ესფირ გურვიჩი 3. ანნა ლარინა | |
| სქუალეფი | 2 | |
| გონათაფა | მოსკოვიშ იმპერიული უნივერსიტეტი | |
| რელიგია | ათეიზმი | |
ნიკოლაი ივანეშ სქი ბუხარინი (რუს. Николай Иванович Бухарин; დ. 9 გჷმათუთა [ჯვ.სტ. 27 ეკენია], 1888 — ღ. 15 მელახი, 1938) — რუსი პოლიტიკოსი, რევოლუციონერი, სხუნუეთიშ სახენწჷფო მოღალე დო მარქსისტი თეორისტი.
ბუხარინი გურაფულენდჷ მოსკოვიშ იმპერიული უნივერსიტეტის. 1906 წანას ქაკათჷ რუსეთიშ სოციალ-დემოკრატიული მუშეფიშ პარტიას (რსდმპ). პოლიტიკური აქტივიზმიშ გეშა, 1910 წანას ოჭოფეს დო ონეგაშა გეგნახორეს. ართი წანაშ უკულ ინტუ დო ოცხოვრებშა ურცხოეთიშა მიდართჷ. ურცხოეთის რინაშ ბორჯის, ბუხარინქ გეჩინებაფუ ვლადიმერ ლენინი დო ლევ ტროცკი. 1915 წანას გჷმაბჟინუ ნახანდი: "იმპერიალიზმი დო მოსოფელიშ ეკონომიკა", ნამუქჷთ ავტორს შანულამი პოპულარობა მოუღუ. ფურთუთაშ რევოლუციაშ უკულ რუსეთშა დირთჷ. გჷმათუთაშ რევოლუციაშ უკულ, ბუხარინი ქუდარინეს გაზეთი პრავდაშ რედაქტორო. 1918 წანას ბუხარინი ხემანჯღვერენდჷ მეკვარჩხანე კომუნისტეფს, ნამუეფით ოპონირენდეს სეპარატული ზეშ დოდვალას გერმანიაწკჷმა. მეკვარჩხანე კომუნისტეფიშ არზით თინჩალა ოხვილური ვარდჷ დო საჭირო რდჷ "რევოლუციური ლჷმა" დო რევოლუციეფიშ გოფაჩუა გერმანიას დო მოსოფელიშ შხვა ქიანეფს. ბუხარინიშ მოხ მეკვარჩხანეეფიშ ფრაქციას ოკათუდეს შინელი ბოლშევიკეფი: ანდრეი ბუბნოვი, ალექსანდრა კოლონტაი, ვალერიან ოსინსკი, გიორგი პიატაკოვი, ევგენი პრეობრაჟენსკი, კარლ რადეკი დო შხვეფი. ლენინიშ ინიციატივათ გერმანიაწკჷმა ბრესტ-ლიტოვსკიშ ზექ იშენ ქიდიდვინჷ დო რუსეთიქ მაართა მოსოფელიშ ლჷმაშე გეგშართჷ. რუსეთიშ ომენოღალე ლჷმაშ მიმალობას, ბუხარინქ გჷმაბჟინუ ნახანდეფი: "კომუნიზმიშ ანბანი" (1920, ევგენი პრეობრაჟენსკიწკჷმა ართო) დო "ისტორიული მატერიალიზმი: სოციოლოგიაშ სისტემა" (1921). ბუხარინი დუდშე ოურდუმე კომუნიზმიშ აქტიური პროპონენტი რდჷ, მარა 1921 წანას თიქ ხუჯი დუკინჷ ახალი ეკონომიკური პოლიტიკას (ნეპი) დო თიში თარი თეორისტო დო ადვოკატო გინირთჷ.
ლენინიშ ღურაშ უკულ ბუხარინი სტალინს ალურდჷ. 1926-1929 წანეფს ბუხარინს უკინებუდჷ კომუნისტური ინტერნაციონალიშ მარსულებერი კომიტეტიშ გენერალური მელამოსეშ პოსტი. 1928 წანას სტალინიშ ინიციატივათ ქიდიჭყეს კოლექტივიზაციაშ ბიწორი პროცესი. ბუხარინი ნეპიშ პოლიტიკაშ მოხუჯე რდჷ, ნამუთ ითოლისწინენდჷ ეკონომიკური რეფორმეფიშ ნერე პროცესის დო აწურედჷ ინდუსტრიალიზაციაშ დო კოლექტივიზაციაშ ბიწორი მიმალობას. 1929 წანას ბუხარინი კომინტერნიშ გენერალური მელამოსეშ დო პრავდაშ რედაქტორიშ პოსტიშე გეგნარინეს, თაშნეშე პოლიტბიუროშე გეგშაჸათეს. უკულ, ბუხარინქ პოზიცია დითირუ დო სტალინიშ ინიციატივათ პარტიაშა კინ დართინეს. 1934 წანას ბუხარინი ქუდარინეს ოფიციალური ოთარობე გაზეთიშ იზვესტიაშ რედაქტორო. 1936 წანას ბუხარინი რდჷ სსრრ-შ კონსტიტუციაშ ართ-ართი ავტორი. დიდი ტერორიშ მიმალობას ბუხარინი ოჭოფეს დო გითოჩამა, კონტრ-რევოლუციური აქტივიზმი, შპიონაჟი ქეკადვეს დო 1938 წანაშ 15 მელახის გორხვეს. 1988 წანას ბუხარინქ ოფიციალურო რეაბილიტირაფილქ იჸუ.