ოროდ II
| ოროდ II 𐭅𐭓𐭅𐭃 | |
_mint.jpg) ოროდ II-შ მონეტა | |
| პართიაშ მაფა | |
|---|---|
| პოსტის გერინაშ ბორჯი | |
| ჯვ. წ. 57 – ჯვ. წ. 37 | |
| წიმოხონი | მითრიდატე IV |
| მონძე | ფრაატ IV |
| ნაღურა | ჯვ. წ. 37 |
| მუმა | ფრაატ III |
| ალმასქუ | ლაოდიკა |
| სქუალეფი | პაკორ I ფრაატ IV |
| რელიგია | ზოროასტრიზმი |
ოროდ II (პართ. 𐭅𐭓𐭅𐭃) — პართიაშ მაფა ჯვ. წ. 57-37 წანეფს, არშაკიდეფიშ დინასტიაშ წჷმმარინაფალი. ჯვ. წ. 57 წანას ოროდიქ დო თიში უნჩაში ჯიმაქ, მითრიდატე IV-ქ დოჸვილეს მუნეფიშ მუმა ფრაატ III. მარა უკულ ჯიმალეფქ ვემირიგეს დო ქიდიჭყეს ართიანწკჷმა დინასტიური ლჷმა, სოდეთ ოროდიქ დამარცხჷ მითრიდატე.
ჯვ. წ. 53 წანაშო, რომალი მანჯღვერთარქ დო ტრიუმვირქ მარკუს კრასუსიქ წიმიჭყჷ ოურდუმე კამპანია ბჟაეიოლს. მარა, კარეშ ლჷმას, ოროდ II-შ მანჯღვერქ, სურენაქ ორჯგინჷ რომიშ აკოანჯარაფილი ნძალეფს. ბურჯაფიშ მიმალობას დოღურჷ კრასუსიქ. თვითანჷ ოროდიქ სომხეთიშა გემშეჭკირჷ დო ქიდიჸუნუ მაფა არტავაზდ II, ნამუთ რომალეფიშ მოხუჯე რდჷ. ჯვ. წ. 52 წანას, ოროდიქ დაჸვილაფუ სურენა, ნამუშ პოპულარობა თის შანულამი საფრთხეთ მიოჩქუდჷ.
რომიშ რესპუბლიკას მიმალი ომენოღალე ლჷმეფიშ ბორჯის, პართიალეფი გნეუს პომპეუსის დო უკულ, მარკუს იუნიუს ბრუტუსის დო გაიუს კასიუს ლონგინუსის ალურდეს. ჯვ. წ. 40 წანაშო ოროდიშ სქუაქ, პაკორ I-ქ ქიდეკინჷ სირია დო მორჩილი აზიაშ კაბეტი ნორთი. მარა ჯვ. წ. 38 წანას, რომალი მანჯღვერთარქ, პუბლიუს ვენტიდიუსიქ დამარცხჷ დო დოჸვილჷ პაკორი. უკულ, მალას ოროდიქ ხვისტაშე გეგნოდირთჷ დო ხეშულობა გეგნოჩჷ მაჟირა სქუას ფრაატ IV-ს.