ოროზ I

‎ოროზ I
ოროზ I-შ ვარჩხილიშ მონეტა, ეკბატანას მუნაჭკირა
პართიაშ მაფა
პოსტის გერინაშ ბორჯი
109 – 116
წიმოხონი	პაკორ II
მონძე	პართამასპატე
პოსტის გერინაშ ბორჯი
117 – 129
წიმოხონი	პართამასპატე
მონძე	ვოლოგეზ III
ნაღურა	129
სქუალეფი	პართამასპატე
რელიგია	ზოროასტრიზმი

ოროზ I, თაშნეშე გიმითქუალუ მუჭოთ ხოსრო I (პართ. 𐭇𐭅𐭎𐭓𐭅) — პართიალი დიდებუანი, ნამუთ მართუნდჷ პართიაშ ბჟადალი ნორთის 109-129 წანეფს, არშაკიდეფიშ დინასტიაშ წჷმმარინაფალი.

109 წანას, ოროზიქ ეარყჷ პაკორ II-შ მეხჷ დო მინდომუ პართიაშ ომაფე ხვისტაშ ხეშა ეშაჸოთამა. პაკორიშ სქუაშ დო მონძეშ, ვოლოგეზ III-შ მართუალაშ ბორჯის, ოროზიქ ქიდეკინჷ პართიაშ ბჟადალი ნორთი. ვოლოგეზის ქასქიდჷ ბჟაეიოლი ნორთიქ. 113 წანას, ოროზიქ სომხეთიშ ხვისტაშე გეგთარაგუ ვოლოგეზ III-შ ჯიმა აშხადარი დო თიშ მანგიორო ქიგიორინუ აშხადარიშ ჯიმა პართამასირი. ოროზიშ ჸათე ცადება რომიშ იმპერიაქ სამანჯელო გეგმირინუ დო იმპერატორი ტრაიანექ პართიაშ დომეინიშა გემშეჭკირჷ. 114 წანას ტრაიანექ ქიდიჸუნუ სომხეთი დო თინა რომიშ პროვინციათ გინაშქუ. 116 წანას ტრაიანექ გეჭოფუ პართიაშ ნანანოღეფი: სელევკია დო ქტესიფონი. ტრაიანექ უკულ ოურდუმე კამპანია გაგინძორჷ დო მიოჭირინუ სპარსეთიშ ჸუჯიშ წყარპიჯის. ჸათაქ, თიქ აძვილჷ პართიაშ ვასალი, ხარაკენაშ მამართალი, ატამბელოს VII რომშა ოგაფური (ხარკი) გინუგაფუდკო. ტრაიანექ, ქტესიფონს ახალი მაფა ქიგიორინუ - ოროზიშ სქუა პართამასპატე. მალას, ტრაიანეშით ეჭოფილი ტერიტორიეფს ქომოხვადჷ არჸებეფქ რომალეფიშ მეხჷ, ბაბილონარეფქ დო ურიეფქ რომალეფი მესოპოტამიაშე ხოლო გეგშარაჸეს. ტრაიანეშ ღურაშ უკულ, 117 წანას პართიალი დიდებუანეფქ პართამასპატეშ მანგიორო მაფათ კინ ოროზი ქიგიორინეს. მარა ოროზიშ ხეშულობა ვარდჷ ნძალიერი. ოროზიშ ხეშულობაშ დოდაღარაფა ქირგებუ ვოლოგეზ III-ქ. თიქ, 129 წანას შელებუ ოროზიშ ქითორაგვაფა დო პართიაშ ბჟადალი ნორთი ქიმკირსხუ.