დინორეშა გინულა

პერვეზ მუშარაფი

ვიკიპედიაშე
პერვეზ მუშარაფი
پرویز مشرف‎
პერვეზ მუშარაფი پرویز مشرف‎
მუშარაფი 2008 წანას
პაკისტანიშ მა-10 პრეზიდენტი
პოსტის გერინაშ ბორჯი
20 მანგი, 2001 – 18 მარაშინათუთა, 2008
პრემიერ-მინისტრი  ზაფარულა ხან ჯამალი
შუჯატ ჰუსეინი
შაუქათ აზიზი
მუჰამედ მიან სომრო
იუსუფ რეზა გილანი
წიმოხონიმუჰამედ რაფიკ ტარარი
მონძემუჰამედ მიან სომრო

დუნაბადი11 მარაშინათუთა, 1943
დელი, ბრიტანეთიშ ინდოეთი
ნაღურაფურთუთა 5, 2023 (79 წანერი)
დუბაი, არაბეფიშ გოართოიანაფილი საამიროეფი
მენოღალობაპაკისტანიშ შილა პაკისტანი
პოლიტიკური პარტიაპაკისტანიშ მუსულმანეფიშ ლიგა (ქ)
მუმასიედ მუშარაფუდინი
ნანაბეგუმ ზარინ მუშარაფი
ალმასქუსეჰბა ფარიდე
სქუალეფიაილა, ბილალი
გონათაფაპაკისტანიშ ოურდუმე აკადემია
ერუანული დუდთხილუაშ უნივერსიტეტი
დუდთხილუაშ ომაფე კოლეჯი
რელიგიაისლამი

პერვეზ მუშარაფი (ურდუ. پرویز مشرف; დ. 11 მარაშინათუთა, 1943 — ღ. 5 ფურთუთა, 2023) — პაკისტანარი ოურდუმე მოღალე დო პოლიტიკოსი, პაკისტანიშ პრეზიდენტი 2001-2008 წანეფს.

დებადჷ დელის, ბრიტანეთიშ ინდოეთის, კარიერული დიპლომატიშ ფანიას. 1947 წანას მუშარაფეფიშ ფანიაქ ოცხოვრებშა პაკისტანშა გეგნორთჷ. 1964 წანას, მუშარაფიქ პაკისტანიშ აკოანჯარაფილი ნძალეფს ქაკათჷ. უკულიანი პერიოდის ბრიტანეთის რდჷ დო გურაფულენდჷ დუდთხილუაშ ომაფე კოლეჯის. ოდაბადეშა დორთაშ უკულ, მუშარაფის უკინებუდჷ შანულამი პოსტეფი პაკისტანიშ არმიას. 1965 დო 1971 წანეფს მონაწილენდჷ პაკისტანიშ ლჷმეფს ინდოეთიშ მეხჷ. 1998 წანაშ გჷმათუთას პაკისტანიშ პრემიერ-მინისტრიქ ნავაზ შარიფიქ მუშარაფი ქუდარინუ აკოანჯარაფილი ნძალეფიშ ხემანჯღვერო. 1999 წანაშ ზარხულს, მუშარაფიშ ინიციატივათ პაკისტანიშ ჯარეფქ ქაშმირიშ ოდებელი ტერიტორიაშა გემშეჭკირეს, მარა უკულ მალას ქაშმირიშ ტერიტორიაქ დატებელქ აჸის.

1999 წანაშ 12 გჷმათუთას, შარიფიქ მუშარაფი მონწუ. ჸათე ბორჯის მუშარაფი ურცხოეთის რდჷ. მუჟამსჷთ მუშარაფიქ პაკისტანშა დორთა მინდომუნჷ, შარიფიქ თიში ფურინჯის კარაჩიშ აეროპორტის დოხუნაშ ნება ვემეჩუ. მუშარაფის ხუჯი დუკინჷ არმიაქ. ჯარეფქ კარაჩის აეროპორტიშა გემნიჭკირეს დო ხეშა ქაშეჸოთეს შხვა ოთარობე დგჷმილეფი ხოლო. შედეგო, ქუდახუეს შარიფი დო გიჭყჷ ახალი ოურდუმე მართუალაქ, ნამუშ ხემანჯღვერო მუშარაფი გეგმაცხადეს. მალას თიქ გაუქვჷ კონსტიტუცია, დეთხინუ პარლამენტი დო ქუდარსხუ ერუანული უშქურანჯობაშ სხუნუ, ნამუშ მაკათურეფი რდეს ოჯარალე დო ოურდუმე მოღალეეფი. 2001 წანას მუშარაფიქ პრეზიდენტო გინირთჷ დო მალას წიმიჭყჷ ოთინჩალე მორაგადაფეფი ინდოეთიწკჷმა, ქაშმირიშ რეგიონიშ გეშა. მუშარაფი აწარმენდჷ ქიანაშ მოდერნიზაციაშ პოლიტიკას. თიში მანჯღვერალათ იმანჯჷ შხვადოშხვა შანულამი რეფორმეფქ, დედაღარჷ ისლამისტეფიშ გოლინაქ პაკისტანიშ არმიას დო შხვა. ეკონომიკას, მუშარაფიქ ხუჯი დუკინჷ ეკონომიკური ლიბერალიზაციას დო პრივატიზაციას. შედეგო შანულამო ქიმიძინჷ პაკისტანიშ ედპ-ქ. მუშარაფიშ მართუალაშ ბორჯის, სერიოზული პრობლემა რდჷ რელიგიური შანეფით მოტივირაფილი ტერორიზმი, ულტრანაციონალიზმი დო ფუნდამენტალიზმი, ნამუეფით შანულამი საფრთხეს წჷმარინუანდეს სახენწჷფოშ სტაბილურობაშო. ისლამისტეფქ ბრელშა მუნწყის მუშარაფის ტერორისტული აქტი, მარა თიქ არძა ჸათე ცადებეფს გინუსკიდჷ.

2001 წანაშ 11 ეკენიაშ ტერორისტული აქტიშ უკულ, ამერიკაქ დეხოლჷ მუშარაფიშ თარობას. მუშარაფი ჯორჯ ბუშიშ ადმინისტრაციაშ მოხუჯე რდჷ ტერორიზმიშ მეხჷ მიმალი ლჷმეფიშ ბორჯის.

2007 წანას მუშარაფიქ კინ მინდომუ პრეზიდენტობა, მარა თიშ ჸათე ცადებას ქაწუდირთჷ პაკისტანიშ უჟინაში სასამართალოქ. საგამათ, მუშარაფიქ წიმიჭყჷ მოქმენდალა უჟინაში სასამართალოშ მეხჷ. 2008 წანაშ ფურთუთაშ საპარლამენტო გიშაგორუეფს მუშარაფიშ პარტიაქ დემარცხჷ. ოპოზიციური კოალიციაქ (ნამუსჷთ ხემანჯღვერენდეს შარიფი დო ასიფ ალი ზარდარი) ქიდიჭყჷ მუშარაფიშ იმპიჩმენტიშ პროცედურა. თის აბრალუაფუდეს კონსტიტუციური ეკოღვაფეფს. 2008 წანაშ 18 მარაშინათუთას მუშარაფიქ პრეზიდენტიშ პოსტიშე გეგნოდირთჷ.

უკულიანი პერიოდის მუშარაფი ურცხოეთის ცხოვრენდჷ. თიქ 2010 წანას დარსხუ ახალი პოლიტიკური პარტია დო პაკისტანშა დორთა ულამუდჷ. 2013 წანას მუშარაფიქ პაკისტანშა დირთჷ, მარა თის ვემეჩეს ნება გიშაგორუეფს მონაწილებაშ დო შხვადოშხვა დანაშურეფი ქეკადვეს. მუშარაფიქ ღურუ 2023 წანაშ 5 ფურთუთას, ამილოიდოზიშ ლახარათ.