პოლ პოტი
| პოლ პოტი ប៉ុល ពត | ||
 | ||
 კამპუჩიაშ კომუნისტური პარტიაშ გენერალური მელამოსე | ||
|---|---|---|
| პოსტის გერინაშ ბორჯი | ||
| 22 ფურთუთა, 1963 – 6 ქირსეთუთა, 1981 | ||
| წიმოხონი | ტუ სამუტი | |
| მონძე | პოსტიქ გეუქვჷ | |
| პოსტის გერინაშ ბორჯი | ||
| 25 გჷმათუთა, 1976 – 7 ღურთუთა, 1979 | ||
| პრეზიდენტი | კჰიეუ სამპჰანი | |
| წიმოხონი | კჰიეუ სამპჰანი (ობორჯე) | |
| მონძე | ნუონ ჩეა (1981) | |
| პოსტის გერინაშ ბორჯი | ||
| 14 პირელი, 1976 – 27 ეკენია, 1976 | ||
| პრეზიდენტი | კჰიეუ სამპჰანი | |
| წიმოხონი | კჰიეუ სამპჰანი (ობორჯე) | |
| მონძე | ნუონ ჩეა (ობორჯე) | |
| დუნაბადი | 25 მესი, 1925 პრეკსბაუვი, ფრანგული ინდოჩინეთი | |
| ნაღურა | პირელი 15, 1998 (72 წანერი) ანლონგვენგი, კამბოჯა | |
| პოლიტიკური პარტია | დემოკრატიული კამპუჩიაშ პარტია (1981-1993) კამპუჩიაშ კომუნისტური პარტია (1960-1981) | |
| ალმასქუ | 1. ქჰიეუ პონარი 2. მეა სონი | |
| სქუალეფი | სარ პატჩატა | |
| გონათაფა | ციფრული ტექნოლოგიეფიშ დო ინფორმაციაშ საინჟინერო სკოლა | |
| ხეშმოჭარუა |  | |
.svg)
პოლ პოტი (ქმერ. ប៉ុល ពត, დ. 19 მესი, 1925 — ღ. 15 პირელი, 1998), დაბადებაშ ჯოხო სალოტ სარი — კამბოჯარი პოლიტიკოსი, რევოლუციონერი დო დიქტატორი, ნამუთ მართუნდჷ კომუნისტური დემოკრატიული კამპუჩიას, 1976-1979 წანეფს. პოტი ხემანჯღვერენდჷ კამბოჯაშ კომუნისტური ჸარაფის, ჭითა ქმერეფს 1963 წანაშე 1997 წანაშახ. პოტი მოღალენდჷ კამპუჩიაშ კომუნისტური პარტიაშ გენერალური მელამოსეთ, 1963-1981 წანეფს. 1975-1979 წანეფს კამბოჯას არდგილი უღუდჷ კამბოჯარი კათაშ გენოციდის. გენოციდიშ შედეგო გოჭყორდჷ დოხოლაფირო 1,5-2 მილიონი ადამიერქ.
ბიოგრაფია
[რედაქტირაფა | წყუშ რედაქტირაფა]პოლ პოტიქ დებადჷ მეჩხომეეფიშ ოფუტე პრეკსბაუვის. გურაფულენდჷ კამბოჯაშ ელიტურ სკოლას. 1949 წანას მიპალუ სტიპენდია დო ოგურაფუშა საფრანგეთიშა მიდართჷ. ჸათაქ თიქ, 1951 წანას ქაკათჷ საფრანგეთიშ კომუნისტური პარტიას. 1953 წანას პოტიქ კამბოჯაშა დირთჷ დო ქმერ ვიეტმინიშ მაკათურო გინირთჷ. ჸათე ორგანიზაცია წჷმარინუანდჷ ოურდუმე ჸარაფის, ნამუთ პარტიზანულო ოლიმუდჷ მაფა ნოროდომ სიანუკიშ თარობას. 1954 წანას ქმერ ვიეტმინიშ მაკათურეფქ ოორუე ვიეტნამიშა გინილეს დო თევრეშა გაგინძორეს აწმარენჯობა. მალას პოლ პოტიქ პნომპენიშა დირთჷ დო მაგურაფალო ქიდიჭყჷ მუშობა. თის პოლიტიკური აქტივიზმი ვემუტებო დო აქტიურო მონაწილენდჷ კამბოჯაშ მარქსიზმ-ლენინისტური ჸარაფის. 1959 წანას, პოტიშ მანჯღვერალათ გიჭყჷ კამპუჩიაშ ხანდაშ პარტიაქ, ნამუქჷთ უკულ გეგნიკეთჷ კამპუჩიაშ კომუნისტური პარტიათ (კკპ). რეპრესიეფიშ შიშით, პოტიქ პნომპენი ქიდიტუ დო ჯუნგლეფს დიტყობუ. 1963 წანას პოტიქ გინირთჷ კკპ-შ ლიდერო. 1968 წანაშო პოტიშ დუდალათ ქიდიჭყჷ ახალი ოურდუმე კამპანიაქ სიანუკიშ ხეშულობაშ მეხჷ. 1970 წანას კამბოჯას ქუმოხვადჷ სახენწჷფო გინორთაქ დო ოურდუმე მოღალე ლონ ნოლიშ ჯარეფქ ქუდახუეს სიანუკიშ თარობა. მალას პოლ პოტიქ ლონ ნოლიშ მეხჷ ქიდიჭყჷ მოქმენდალა დო ვიეტ კონგიშ დო ოორუე ვიეტმინიშ ჯარეფიშ ელარინათ რსულას ქიდეკინჷ კამბოჯა, 1975 წანაშო.
პოლ პოტიქ კამბოჯა გინართინუ ართპარტიული სახენწჷფოთ, ნამუსჷთ ჯოხოთ ქიგიოდუ დემოკრატიული კამპუჩია. პოტი ოცადუდჷ აგრარული სოციალისტური ჯარალუაშ გოჭყაფას, ნამუთ უკულ გინიქიმინუდჷ კომუნისტური ჯარალუათ. პოტიშ აზრით ოხვილური რდჷ არძანერი კულტურაშ დო ტრადიციეფიშ მოჯალაგუა დო ახალი რევოლუციური კულტურაშ დორსხუაფა. პოტიშ რეჟიმქ გაჭყჷ კოლექტივური ფერმეფი, სოდეთ მახორუეფი ძალით გინმოჸუნდეს. გეუქვჷ კერძო დორხველობაქ, ფარაქ, რელიგიაქ. არძა მახორუქ ოკო მიკიქუნკო უჩა მუკაქუნალი. თარობაშ ოპონენტეფს თხოზუდეს, ჸვილუნდეს დო მასობური სასაფლეფს ნთხორუნდეს. პოტიშ უბადო დო კონწარი პოლიტიკა, მუშო ოკო რაგადი, პოპულარული ვარდჷ. 1978 წანას ქიდიჭყჷ უკმაყოფილე ჯარიშკოჩეფიშ არყებაქ კამბოჯაშ ბჟაეიოლს.
1978 წანაშ ქირსეთუთას, ვიეტნამიშ აკოანჯარაფილი ნძალეფქ კამბოჯაშა გემშეჭკირეს. 1979 წანაშ ღურთუთაშო პოტიშ რეჟიმქ ქუდანთხუ. ჭითა ქმერეფიშ მაკათურეფქ ჯუნგლეფიშა ინტეს დო თევრეშე გაგინძორეს ლჷმა. მარა ვიეტნამიშ ჯარეფიწკჷმა ბურჯაფიშ შედეგო, ძალამს დედაღარეს. პოლ პოტიქ პოლიტიკური პროცესეფს დეთხუ დო პოსტეფიშე გეგნოდირთჷ. 1998 წანას პოტი ოჭოფეს, გასამართეს დო გითოჩამა ქეკადვეს. პოტიქ ღურუ თე წანაშ 15 პირელს. ოფიციალური ვერსიათ ღურაშ ბაძაძი გურიშ ლახარა რდჷ.
ქოძირით თაშნეშე
[რედაქტირაფა | წყუშ რედაქტირაფა]ლიტერატურა
[რედაქტირაფა | წყუშ რედაქტირაფა]- Kiernan, Ben (2008). The Pol Pot Regime: Race, Power, and Genocide in Cambodia Under the Khmer Rouge, 1975-79 (3rd ed.). New Haven, Conn. London: Yale University Press.