რაფაელ ლეონიდას ტრუხილიო
| რაფაელ ლეონიდას ტრუხილიო Rafael Leónidas Trujillo | ||
.jpg) ტრუხილიო 1940 წანას | ||
| დომინიკარეფიშ რესპუბლიკაშ გენერალისიმუსი | ||
|---|---|---|
| პოსტის გერინაშ ბორჯი | ||
| 1934 – 30 მესი, 1961 | ||
| წიმოხონი | პოსტიქ გიჭყჷ | |
| მონძე | რამფის ტრუხილიო | |
| პოსტის გერინაშ ბორჯი | ||
| 18 მესი, 1942 – 16 მარაშინათუთა, 1952 | ||
| წიმოხონი | მანუელ ტრონკოსო დე ლა კონჩა | |
| მონძე | ჰექტორ ტრუხილიო | |
| პოსტის გერინაშ ბორჯი | ||
| 16 მარაშინათუთა, 1930 – 16 მარაშინათუთა, 1938 | ||
| წიმოხონი | რაფაელ ესტრელია ურენია | |
| მონძე | ხასინტო პეინადო | |
| დუნაბადი | 24 გჷმათუთა, 1891 სან-კრისტობალი, დომინიკარეფიშ რესპუბლიკა | |
| ნაღურა | 30 მესი, 1961 (69 წანერი) სიუდად-ტრუხილიო, დომინიკარეფიშ რესპუბლიკა | |
| ღურაშ ბაძაძი | ჸვილუა | |
| ნთხორუ აბანი | მინგორუბიოშ სასაფლა, მადრიდი | |
| მენოღალობა |  დომინიკარეფიშ რესპუბლიკა | |
| პოლიტიკური პარტია | დომინიკარეფიშ პარტია | |
| ალმასქუ | 1. ამინტა ლედესმა 2. ბიენვენიდა რიკარდო 3. მარია მარტინესი | |
| სქუალეფი | 8 (თინეფს შქას რამფისი დო ანხელიტა) | |
| საქვარუა | ოურდუმე მოღალე, პოლიტიკოსი, ბიზნესმენი | |
| რელიგია | კათოლიციზმი | |
| ხეშმოჭარუა |  | |
რაფაელ ლეონიდას ტრუხილიო მოლინა (ესპ. Rafael Leónidas Trujillo Molina; დ. 24 გჷმათუთა, 1891 — ღ. 30 მესი, 1961) — დომინიკარი ოურდუმე მოღალე დო დიქტატორი, ნამუთ დუდენდჷ დომინიკარეფიშ რესპუბლიკას 1930 წანაშე ღურაშახ (1961).
1919 წანაშე მოღალენდჷ პოლიციას დო მიოჭირინუ პოლკოვნიკობას. 1924 წანას ქუდარინეს ერუანული პოლიციაშ ხემანჯღვერო. 1927 წანას გინირთჷ გენერალო. ტრუხილიოქ პოლიცია ოურდუმე სტრუქტურათ გინაშქუ დო თიში პოზიციეფი შანულამო გაჭყანიერჷ. 1930 წანას მანწყუ მინორთა, ქუდახუ ჰორასიო ვასკესიშ თარობა დო ხეშუულობა ხეშა ქაშეჸოთჷ. ტრუხილიოს პრეზიდენტიშ პოსტი უკებუდჷ 1930-1938 დო უკულ კინ 1942-1952 წანეფს. მარა უკულ ხოლო სქიდუდჷ სახენწჷფოშ ხვალახე ოურდუმე მანჯღვერეთ, ოფიციალური პოსტიშ უმუშო. თიში დუდალაშ 31 წანიანი პერიოდის უძახუდეს "ტრუხილიოშ ერა"-ს, ნამუთ გერსხუდჷ პიჯური კულტის, კონწარი რეჟიმს დო დიქტატურას. ტრუხილიო მუში ღანკეფიშ მიოჭირინაფალო შხირას გჷმირინუანდჷ უშქურანჯობაშ ნძალეფს, ნაფულა პოლიციას დო სახენწჷფო ტერორიზმის.
ტრუხილიო თხოზუდჷ პოლიტიკური ოპონენტეფს, თაშნეშე დომინიკას მახორუ ჰაიტარეფს დო თინეფიშ მეხჷ აქტიურო ირინუანდჷ კონწარი დო უბადო მეთოდეფს. 1937 წანას, ჰაიტარეფს გენოციდი ხოლო მუნწყის დო დოჸვილეს დოხოლაფირო 35 ვითოში ჰაიტარი. ჸათე ფაქტიქ ნეგატიური გაულა იღვენუ დომინიკაშ დო ჰაიტიშ ერეფოშქაშე ურთიართალაშა. თე ოკითხე ასე ხოლო აქტუალური რე თინეფს შქას. 1956 წანას ტრუხილიოშ ზოჯუათ, ნიუ-იორკის, ქიხვამილეს დო დოჸვილეს ბასკი ჭარუ დო პოლიტიკოსი ხესუს გალინდესი, ნამუთ ტრუხილიოშ ოპონენტი რდჷ. 1960 წანას, ტრუხილიოშ აგენტეფქ მინდომეს ვენესუელაშ პრეზიდენტიშ რომულო ბეტანკურიშ (ნამუთ აკრიტიკენდჷ ტრუხილიოშ დიქტატურას) ჸვილუა დო მანწყუეს ტერორისტული აქტი, მარა ბეტანკურქ გინასქიდჷ. 1960 წანაშ გერგობათუთას, დოჸვილეს დალეფი მირაბალეფი, ნამუეფით აწურედეს ტრუხილიოშ რეჟიმს. 1960 წანაშე ძალამს გეუფრაშჷ დომინიკარეფიშ რესპუბლიკაშ ურთიართალაქ ამერიკაშ სახენწჷფოეფიშ ორგანიზაციაწკჷმა, ნამუქჷთ ტრუხილიოშ თარობას ფინანსური სანქციეფი ქიგიოდჷ. ბორჯიშ გოძვენას, ტრუხილიოს ანდა ნტერქ გურჩქინდჷ. თიში დუდალათ გადღანებული რდჷ არმია ხოლო. 1961 წანას 30 მესის, ტრუხილიო დოჸვილეს კონსპირატორეფქ, გენერალი ანტონიო იმბერტ ბარერაშ მანჯღვერალათ. 1961 წანაშ გერგობათუთას, ტრუხილიოშ ფანია დომინიკარეფიშ რესპუბლიკაშე გეგნახორეს.
ტრუხილიო ოდებელი ფიგურა რე. მოხუჯეეფიშ მეჯინათ, ტრუხილიოშ ნჯღვერალაქ სახენწჷფოს თინჩალა, ფინანსური სტაბილურობა დო ეკონომიკური წჷმოძინეფი მოუღჷ, შანულამო გიძინჷ ედპ-ქ. კრიტიკოსეფი ტრუხილიოს ეკმადვანა შხვადოშხვა დჷნაშებუეფს, ვითოშობათ ადამიერიშ ჸვილუას, ქსენოფობიას ჰაიტარეფიშ მეხჷ, ნეპოტიზმის დო კორუფციას.