რობერ გეი
| რობერ გეი Robert Guéï | ||
 | ||
| კოტ-დ’ივუარიშ მა-3 პრეზიდენტი | ||
|---|---|---|
| პოსტის გერინაშ ბორჯი | ||
| 24 ქირსეთუთა, 1999 – 26 გჷმათუთა, 2000 | ||
| პრემიერ-მინისტრი | სეიდუ დიარა | |
| წიმოხონი | ანრი კონან ბედიე | |
| მონძე | ლორან გბაგბო | |
| დუნაბადი | 16 მელახი, 1941
კაბაკუმა, ფრანგული ბჟადალი აფრიკა | |
| ნაღურა | ეკენია 19,, 2002 (61 წანერი)
აბიჯანი, კოტ-დ’ივუარი | |
| მენოღალობა |  კოტ-დ’ივუარი | |
| პოლიტიკური პარტია | უპარტიე | |
| გონათაფა | სენ-სირი | |
| საქვარუა | ოურდუმე მოღალე, პოლიტიკოსი | |
| რელიგია | კათოლიციზმი | |
რობერ გეი (დ. 16 მელახი, 1941 — ღ. 19 ეკენია, 2002) — კოტ-დ’ივუარალი ოურდუმე მოღალე დო პოლიტიკოსი, კოტ-დ’ივუარიშ მა-3 პრეზიდენტი 1999-2000 წანეფს.
დებადჷ ოფუტე კაბაკუმას, მანიშ დეპარტამენტის. ორხველუდჷ იაკუბაშ ეთნიკურ ბუნას.[1] გეი რდჷ ჯარიშკოჩი დო ნინალენდჷ ფრანგული ადმინისტრაციაშ თუდო. გურაფულენდჷ უაგადუგუშ ოურდუმე სკოლას, უკულ გურაფა გაგინძორჷ საფრანგეთის (სენ-სირი). გეიქ შანულამ კარიერულ წჷმოძინეფს მიოჭირინუ პრეზიდენტ ფელიქს უფუე-ბუანიშ მართუალაშ ბორჯის, მარა თიშ მონძე ანრი კონან ბედიეწკჷმა ვემირიგჷ. 1997 წანას გეი აკოანჯარაფილ ნძალეფშე ხოლო გოუტეს.
1999 წანაშ ქირსეთუთას, კოტ-დ’ივუარს ქუმოხვადჷ ოურდუმე გინორთაქ დო ბედიე ქუდახუეს. გეი ჸათე პროცესის ვაკათუდჷ მარა ბედიეშ გინორაგვაფაშ უკულ მალას პოლიტიკას დართჷ დო მუჭოთ პოპულარული გენერალი ხემანჯღვერენდჷ ოურდუმე ხუნტას ახალ გიშაგორუეფიშ მანჯებაშახ.[2] 2000 წანაშ 22 გჷმათუთას, იტარინჷ საპრეზიდენტო გიშაგორუეფქ, სოდეთ მონაწილენდჷ გეი ხოლო, მუჭოთ უპარტიე, ზოხორინელი კანდიდატი. შანულამ ოპოზიციურ პარტიეფს ნება ვემეჩეს მუნეფიშ კანდიდატეფ ქუმწურინუაფდესკო. რესპუბლიკარეფიშ რსხუქ დო კოტ-დ’ივუარიშ დემოკრატიული პარტიაქ გიშაგორუეფს ბოიკოტ გეგმუცხადეს. გიშაგორუეფს მონაწილენდჷ ხვალე ართ ოპოზიციურ კანდიდატ: ლორან გბაგბო, კოტ-დ’ივუარიშ ოკათე ფრონტიშ ლიდერი, ნამუქჷთ გიშაგორუეფს ხონარეფიშ დოხოლაფირო 60 % მიპალჷ დო გეი დამარცხჷ (გეიქ მიღჷ ხონარეფიშ 33 %). გეიქ გიშაგორუეფს შედეგეფ ვეჩინჷ.[3] ჸათე მოლინეფს მაჸუნჷ დემონსტრაციეფქ, გეიშ მართუალაშ სააწმარენჯოთ. გეიქ ლიბერიაშ სანძღოწკჷმა მადვალუ ართ-ართ ჭიჭე ოფუტეშა ინტუ. 2001 წანას დირსხუ შერიგაშ ფორუმქ, ნამუსჷთ გეი ხოლო ოკათუდჷ. თიქ ქუდოდვჷ პიჯალა ნამდა ვადემოკრატიულ ბიჯგეფს ვეგნოდგუნდჷ. 2002 წანაშ ეკენიას, გეიქ ფირუმიშ აპიჯალაშე გიშელჷ. მალას, თე წანაშ 19 ეკენიას, ომენოღალე ლჷმაშ დოჭყაფაშ მაართა საათეფს, გეი, თიშ ალმასქუ, ჸოფილი მაართა ლედი როზა დუდუ გეი დო თინეფიშ სქუალეფ, დოჸვილეს, აბიჯანიშ კოკოდაშ რაიონს. გეიშ დო თიშ ფანიაშ ჸვილუას გბაგბოშ მოხუჯე ნძალეფს აბრალუაფუნა.[4]