რომულო ბეტანკური
| რომულო ბეტანკური Rómulo Betancourt | ||
 | ||
| ვენესუელაშ პრეზიდენტი | ||
|---|---|---|
| პოსტის გერინაშ ბორჯი | ||
| 13 ფურთუთა, 1959 – 13 მელახი, 1964 | ||
| წიმოხონი | ედგარ სანაბრია | |
| მონძე | რაულ ლეონი | |
| პოსტის გერინაშ ბორჯი | ||
| 19 გჷმათუთა, 1945 – 17 ფურთუთა, 1948 | ||
| წიმოხონი | ისაიას მედინა ანგარიტა | |
| მონძე | რომულო გალიეგოსი | |
| დუნაბადი | 22 ფურთუთა, 1908 გუატირე, მირანდაშ შტატი, ვენესუელა | |
| ნაღურა | 28 ეკენია, 1981 (73 წანერი) ნიუ-იორკი, ააშ | |
| ნთხორუ აბანი | ბჟაეიოლიშ სასაფლა, ვენესუელა | |
| მენოღალობა |  ვენესუელა | |
| პოლიტიკური პარტია | დემოკრატიული ჸარაფი | |
| ალმასქუ | 1. კარმენ ვალვერდე 2. რენე ჰარტმანი | |
| სქუალეფი | ვირჯინია ბეტანკური | |
| გონათაფა | ვენესუელაშ ცენტრალური უნივერსიტეტი | |
| ხეშმოჭარუა |  | |
რომულო ერნესტო ბეტანკურ ბელო (ესპ. Rómulo Ernesto Betancourt Bello; დ. 22 ფურთუთა, 1908 — ღ. 28 ეკენია, 1981) — ვენესუელარი პოლიტიკოსი, ვენესუელაშ პრეზიდენტი 1945-1948 დო კინ, 1959-1964 წანეფს, XX ოშწანურაშ ვენესუელაშ დომინანტური პოლიტიკური პარტია დემოკრატიული ჸარაფიშ დუმარსხუაფალი დო ლიდერი. ფშხირას მიშინუანა მუჭოთ "ვენესუელაშ დემოკრატიაშ მუმა"-ს.
დებადჷ ნოღა გუატირეს, კარაკასიშ გოხოლუას. გურაფულენდჷ იურისპრუდენციას ვენესუელაშ ცენტრალური უნივერსიტეტის. ორდოიანი წანეფიშე ოკათუდჷ პოლიტიკური პროცესეფს დო ოპონირენდჷ ხუან ვისენტე გომესიშ დიქტატორული რეჟიმს. პოლიტიკური აქტივიზმიშ გეშა ბეტანკური 1928 წანას ოჭოფეს დო ჯიხას ქუდახუნეს. გადუდიშულაფაშ უკულ კინ გაგინძორჷ ლჷმა თარობაშ მეხჷ. ჸათეშ გეშათ ხოლო ართიშა ოჭოფეს დო ვენესუელაშე გეგნახორეს. ბეტანკური 1936 წანაშახ ცხოვრენდჷ კოსტა-რიკას, სოდეთ თექიანი კომუნისტეფს დეხოლჷ დო კოსტარიკაშ კომუნისტური პარტიას ქაკათჷ. ბეტანკურქ 1936 წანას ვენესუელაშა დირთჷ, მარა სუმი წანაშ უკულ კინ გეგნახორეს. 1941 წანას დორთაშ ნება ქიმეჩეს. თე წანას თიქ ქუდარსხუ პარტია დემოკრატიული ჸარაფი, ნამუშ თარი იდეეფი ანტი-კომუნიზმი დო მეკვარჩხანეობა რდჷ. 1945 წანაშ 18 გჷმათუთას, ქუმოხვადჷ სახენწჷფო გინორთაქ, აკოანჯარაფილი ნძალეფიშ დო ბეტანკურიშ დემოკრატიული ჸარაფიშ მანჯღვერალათ. შედეგო ქუდახუეს ისაიას მედინა ანგარიტაშ თარობა. ხეშულობა გეჭოფუ დემოკრატიული ჸარაფიქ დო ბეტანკურქ, ნამუქჷთ, მართუალაშ ბორჯის, მიღჷ ახალი კონსტიტუცია, წიმიჭყჷ სოციალური რეფორმეფი, დიხეფი გლეხეფს გეგნოჩჷ დო ონაფთობე ინდუსტრიას შანულამი კონტროლი დუწეს. 1948 წანაშ გიშაგორუეფიშ უკულ ვენესუელაშ პრეზიდენტო გინირთჷ დემოკრატიული ჸარაფიშ კანდიდატიქ რომულო გალიეგოსიქ, მარა თე წანაშ გეორგობათუთას თინა გეგთარაგუეს დო ხეშულობა ხეშა ქაშეჸოთჷ მარკოს პერეს ხიმენესიქ. გინორთაშ უკულ, ბეტანკურქ კინ ემიგრაციაშა მიდართჷ.
გეჸვენჯი ვითი წანაშ გოძვენას თინა ამერიკას, კუბას, პუერტო-რიკოს დო კოსტა-რიკას ცხოვრენდჷ. 1958 წანას ხიმენესი გეგთარაგვეს დო ბეტანკურქ ვენესუელაშა დირთჷ. თიქ აქტიურო ქაკათჷ პოლიტიკას, შხვა დემოკრატიული პარტიეფიწკჷმა ალიანსი გაჭყჷ დო ხოლო ართიშა გიშაგორილქ იჸუ ქიანაშ პრეზიდენტო. ბეტანკურიშ თარობას ნძალიერო ოპონირენდეს მუჭოთ კომუნისტეფი, თაშნეშე კონსერვატორეფი. მარა თიქ იშენ შელებუ შხვადოშხვა შანულამი კანონეფიშ მეღება.
ბეტანკურს ვაუღუდჷ ჯგირი ურთიართალა დომინიკარეფიშ რესპუბლიკაშ დიქტატორი რაფაელ ლეონიდას ტრუხილიოწკჷმა დო თიში დიქტატორული მართუალას ფშხირას აკრიტიკენდჷ. 1960 წანას 24 ივანობას, ტრუხილიოშ ზოჯალათ, ბეტანკურს ტერორისტული აქტი მუნწყის, მარა ბეტანკურქ გინასქიდჷ.
ბეტანკურქ პრეზიდენტიშ პოსტიშე 1964 წანას მიდართჷ დო უკულ მალას შვეიცარიაშა გეგნიხორჷ, სოდეთ ბრუო წანას ცხოვრენდჷ. უკულ კინ ვენესუელას დართჷ დო ხუჯი დუკინჷ დემოკრატიული ჸარაფიშ კანდიდატის კარლოს ანდრეს პერესის.