რომულო გალიეგოსი
| რომულო გალიეგოსი Rómulo Gallegos | ||
 გალიეგოსი 1940-იან წანეფს | ||
| ვენესუელაშ პრეზიდენტი | ||
|---|---|---|
| პოსტის გერინაშ ბორჯი | ||
| 17 ფურთუთა, 1948 – 24 გერგობათუთა, 1948 | ||
| წიმოხონი | რომულო ბეტანკური | |
| მონძე | კარლოს დელგადო ჩალბო | |
| დუნაბადი | 2 მარაშინათუთა, 1884 კარაკასი, ვენესუელა | |
| ნაღურა | 5 პირელი, 1969 (84 წანერი) კარაკასი, ვენესუელა | |
| ნთხორუ აბანი | ვენესუელაშ ერუანული პანთეონი | |
| მენოღალობა |  ვენესუელა | |
| პოლიტიკური პარტია | დემოკრატიული ჸარაფი | |
| გონათაფა | ვენესუელაშ ცენტრალური უნივერსიტეტი | |
| საქვარუა | ჭარუ, პოლიტიკოსი | |
| რელიგია | კათოლიციზმი | |
| ჯილდოეფი | ერუანული ლიტერატურული პრემია (1958) | |
| ხეშმოჭარუა |  | |
რომულო ანხელ დელ მონტე კარმელო გალიეგოს ფრეირე (ესპ. Rómulo Ángel del Monte Carmelo Gallegos Freire; დ. 2 მარაშინათუთა, 1884 — ღ. 5 პირელი, 1969) — ვენესუელარი ჭარუ დო პოლიტიკოსი, ვენესუელაშ პრეზიდენტი ჩხორო თუთაშ გოძვენას, 1948 წანაშ ფურთუთაშე გერგობათუთაშახ.
გალიეგოსი მუშენდჷ შხვადოშხვა პროფესიათ. რდჷ მაგურაფალი, უკულ ჟურნალისტი. ლიტერატურული კარიერა 1910-იანი წანეფიშე დიჭყჷ. 1929 წანას გჷმაბჟინუ რომანი "დონა ბარბარა", ნამუქჷთ ავტორს შანულამი პოპულარობა მოუღჷ. ჸათე რომანს მოჩამილი რდჷ ვენესუელაშ დიქტატორიშ ხუან ვისენტე გომესიშ კრიტიკა. ჸათეშ გეშათ გალიეგოსის გამათხოზეს დო ქიანაშე გეგნახორეს. თიქ ოცხოვრებშა ესპანეთიშა გეგნორთჷ დო თექ გაგინძორჷ ლიტერატურული კარიერა. წორეთ ესპანეთის რინაშ ბორჯის ჭარჷ გალიეგოსიქ მუში შხვა შინელი ნაწარმებეფი: "კანტაკლარო" (1934) დო "კანაიმა" (1935). 1936 წანას ვენესუელაშა დირთჷ. თე წანას გალიეგოსი ქუდარინეს ვენესუელაშ გონათაფაშ მინისტრო. 1937 წანას გიშაგორილქ იჸუ კონგრესიშ მაკათურო. 1940-1941 წანას მოღალენდჷ კარაკასიშ მერო. 1945 წანას გალიეგოსი მონაწილენდჷ სახენწჷფო გინორთას, ნამუქჷთ ქუდახუ ისაიას მედინა ანგარიტაშ მართუალა. ხეშულობაშა ქუმორთჷ რომულო ბეტანკურქ დო რევოლუციური თარობაქ. 1947 წანაშ საპრეზიდენტო გიშაგორუეფს გემორძგუ გალიეგოსიქ, მუჭოთ დემოკრატიული ჸარაფიშ კანდიდატიქ. თიქ მიპალუ ხონარეფიშ 74,3 %, ნამუთ ასე ხოლო რეკორდი რე ვენესუელაშ გიშაგორუეფიშ ისტორიას. მართუალაშ ბორჯის, გალიეგოსიქ ონაფთობე ინდუსტრიას ოგაფურეფი 43 %-შე 50 %-შახ გუდიდჷ. გალიეგოსი მეთხოზუდჷ გოღია კარიშ პოლიტიკას, შედეგო ქიანას ქიმიძინჷ ემიგრანტი იტალიარეფიშ მუდანობაქ. 1948 წანაშ 24 გერგობათუთას, ოურდუმე ოფიცერეფქ, კარლოს დელგადო ჩალბოშ დო მარკოს პერეს ხიმენესიშ მანჯღვერალათ მანწყუეს ოურდუმე გინორთა დო ქუდახუეს რომულო გალიეგოსიშ თარობა. გალიეგოსიქ ვენესუელა ქიდიტუ დო ოცხოვრებშა დიო კუბაშა გეგნორთჷ დო უკულ მექსიკაშა. მარკოს პერეს ხიმენესიშ გინორაგვაფაშ უკულ, 1958 წანას ვენესუელაშა დირთჷ. 1961 წანას გიშაგორილქ იჸუ სადღამუშო სენატორო, მარა უკულიან ბორჯის პოლიტიკაშა ვაუკათინჷ. 1960-1963 წანეფს უკინებუდჷ ადამიერიშ ნებეფიშ ინტერ-ამერიკული კომისიაშ პრეზიდენტიშ პოსტი.
1958 წანას გალიეგოსიქ მიპალუ ერუანული ლიტერატურული პრემია. 1960 წანას ნომინირაფილი რდჷ ნობელიშ პრემიაშა ლიტერატურაშ დარგის. 1964 წანას დირსხუ რომულო გალიეგოსიშ ჯოხონობაშ ლიტერატურულ პრემიაქ.