ჯვეში ეგვიპტე

გიზეშ პირამიდეფ

ჯვეშ ეგვიპტე — რდჷ ქიანა აფრიკას ჯვ.წნ.ა 4000-525 წანეfს. თენა რდჷ ართ-ართი მაართა ქიანა თელქიანას. მუშ ნანანოღა რდჷ მემფისი დო ქაირო. ჯვეშ ეგვიპტე ასეიანი ეგვიპტეშ ტერიტორიას რდჷ.

ქიანაშ ჯოხოდვალა

ჯვეში ეგვიპტური, იგივე კოპტურ ნინაშა ქიანას ჯოხოდჷ კემე, ნამუთ მარგალურო ითანგუ მუჭო უჩა დიხა. ქიანაშ გვერდი ჭითა დიხა რდჷ. ჯვეშ ეგვიპტეშ ნანანოღა მემფისი რდჷ, მარა ეგვიპტარეფი თე ნოღას ჰიკუპტას უძახუდეს. (ჰეტ-კა-პტაჰ - მარგალურო ნიშნენს კაპტაჰიშ ჸუდეს). უკული ბერძინეფი თე ჯოხოს - ჰიკაპტას თელ ქიანას უძახუდეს დო თი დღაშე ჯოხო ”ეგვიპტე”.

გეოგრაფია

ჯვეშ ეგვიპტეშ რუკა

ჯვეშ ეგვიპტე აფრიკაშ ოორუე-ბჟაიოლ თიას მილარდჷ,ასეიანი ეგვიპტეშ არაბულ რესპუბლიკაშ ტერიტორიას. ოორუეშე მუჭოთ ასე, უხურგუნდჷ სქირონაშქა ზუღა, ბჟადალით ლიბიაშ ტიოზი, ბჟაიოლით ჭითა ზუღა დო ოჩხანეშე წყარმალჷ ნილოსიშ ჭორომეფი. ნილოსი რე ეგვიპტეშ ართი უდიდაშ წყარმალჷ. თენა ოჩხანეშე ოორუეშა მეურს დო სქირონაშქა ზუღას აკათუ. ეკონიას, სოდე თინა ზუღას აკათუნი, უღუ შქვით ნოველა. თე ნოველეფი ბერძინეფიშ არზით მუნეფიშ დელტას გუდჷ, ათეშენი ჯოხო თის ნილოსიშ დელტა. ჯვეშო ქიანაშ ოორუე თიას ეგვიპტურო თუდონი ეგვიპტე ჯოხოდჷ, ოჩხანეშე თიას - ჟინი ეგვიპტე.

ფარაონი

ფარაონეფი უდიდაშ როლს ლაჸაფენდეს ეგვიპტარეფიშ რინას.თინეფი რდეს ქიანაშ მაზოჯუეფი დო უმაღალაშ ქურუმეფი. ფარაონი რდჷ კოჩო მოულირი ღორონთი დიხას დო ღორონთი ღურაშ უკული. ლეგენდათ მაართა ფარაონი რდჷ ბჟაშ ღორონთი - რა.

ტერმინი ”ფარაონი” ჟირი სიტყვაშ აკოძინა რე: ”პერ-აა” მუთ დიდ ჸუდეს ნიშნენს. ფარაონს ქარაგმულო თქუანდესჷნ, თიში ჯოხო სალამუსო რდჷ.