ინგირწყარი

ფაილი:Enguridam.jpg

ინგირწყარიშ კაშხალი

ინგირწყარი, წყარმალუ ბჟადაალი საქორთუოს, კავკაციონიშ თარი წყარგჷმმართალი ქჷნდჷრიშ ოჩხანე კართეს დო კოლხეთიშ რზენს. ოდუდე უღუ უგურყელი ინგირს, ზუღაშ გეჸეშე 2614 მ-ს. ნოღა ანაკლიაწკჷმა აკათუ უჩა ზუღას. სიგირძა 213 კმ, გოჸორიშ ფართობი 4060 კმ². თარი ნადუეფი რე - მარძგვანი: ადიშისჭალა, ხალდეჭალა, მულხრა, დოლრაჭალა, ნაკრა, ნენსკრა; კვარჩხანი: თხეიში, ხუმფრერი, ლასილი, მაგანა, ჯუმი დო შხვა. ინგირწყარი ჟიმოლენს კვათუნს შონეშ ქვაბის, ოდო უკული ტომბა დო ცორქო ლეხერს მეხირჩანს. ჟიმოლენს დო შქა დინაფას წყარმალუშ კალაპოტი მინჸურე ჭორომიანიე. ნოღა ჯვარწკჷმა წყარმალუ გიშმურს კოლხეთიშ რზენს, ქიმინუნს ფართო ლეხერს დო იჩხვინჩხვალუ. ოფ. რუხწკჷმა ირთუ ჟირი ნოჸელათ, ნამუეფ შქას აშაძჷ 12 კმ სიგირძაშ დო 0,5-2,0 კმ სიგანეშ კოკი. თიშა გეკიდილი რე ოფუტე შამგონა. ინგირწყარი აკოწყორილი რდუალაშ წყარმალუ რე; ჟიმოლენს წანური გიმნაველიშ 66%-ის აკმადგინანს თჷრიშ დო უგურყელიშ წყარი, 22%-ის გრუნტიშ წყარი, 12%-ის ჭვემაშ წყარი, თუდოლენს ოსქვებურო — 18%, 26% დო 56%-ის. ოშქარი წანური ხარჯი ოფუტე ხაიშწკჷმა 109 მ³/წმ მანგიე აკაკათაფუწკჷმა 170 მ³/წმ. წყარალა უჩქუ აფუნს დო ზარხულს, წყარმორჩილი რე ზათონც. ოფუტე ლახამულიშე ოფუტე შამგონაშახ ინგირწყარს ირინუანა ჯა-ტყაშ გიმასიონტაფალო, თუდოლენს — ოწყარალო, ინგირ-გალიშ ოწყარალი არხიშ გაბრათ. ნოღა ჯვარწკჷმა გიკიდჷ ინგირწყარიშ ჰიდროელექტროსადგურქ. ოფ. ტობარწკჷმა დოპროექტაფილიე 750 ვითარი. კვტ სიმძლავრეშ ტობარჰესიშ გეკიდუა. ინგირწყარიშ მანგას გიშმურს სამარგალოშ დო აფხაზეთიშ რეგიონეფიშ ადმინისტრაციული სანძღო.

წყარმალუ ინგირი ოდუდეწკჷმა. ფონს უკახლე უშგულიშ ლამარია

ლიტერატურა

• უკლება ნ., ქსე, ტ. 4, გვ. 150, თბ., 1979