ინგირწყარი

ფაილი:Enguridam.jpg

ინგირწყარიშ კაშხალი

ინგირწყარი, წყარმალუ ბჟადალ საქორთუოს, კავკაციონიშ თარი წყარგჷმმართალი ქჷნდჷრიშ ოჩხანე კართეს დო კოლხეთიშ რზენს. ოდუდე უღუ უგურყელ ინგირს, ზუღაშ დონეშე 2614 მ-ს. ნოღა ანაკლიაწკჷმა აკათუ უჩა ზუღას. სიგირძა 213 კმ, გოჸორიშ ფართობი 4060 კმ². თარი ნადუეფი რე — მარძგვანი: ადიშისჭალა, ხალდეჭალა, მულხრა, დოლრაჭალა, ნაკრა, ნენსკრა; კვარჩხანი: თხეიში, ხუმფრერი, ლასილი, მაგანა, ჯუმი დო შხვა. ინგირწყარი ჟიმოლენს კვათჷნს შონეშ ქვიბის, ოდო უკული ტომბა დო ცორქო ლეხერს მეხირჩანს. ჟიმოლენს დო შქა დინაფას წყარმალუშ კალაპოტი მინჸურე ჭორომიანიე. ნოღა ჯვარწკჷმა წყარმალუ გიშმურს კოლხეთიშ რზენს, ქიმინუნს ფართო ლეხერს დო იჩხვინჩხვალუ. ოფუტე რუხიწკჷმა ირთუ ჟირი ნოჸელათ, ნამუეფ შქას აშაძჷ 12 კმ სიგირძაშ დო 0,5-2,0 კმ სიგანაშ კოკი. თიშა გეკიდილი რე ოფუტე შამგონა. ინგირწყარი აკოწყორილი რდუალაშ წყარმალუ რე; ჟიმოლენს წანური გიმნაველიშ 66%-ის აკმადგინანს თირიშ დო უგურყელიშ წყარი, 22%-ის გრუნტიშ წყარი, 12%-ის ჭვემაშ წყარი, თუდოლენს ოსქვებურო — 18%, 26% დო 56%-ის. ოშქაშე წანური ხარჯი ოფუტე ხაიშიწკჷმა 109 მ³/წმ მანგიე აკაკათაფუწკჷმა 170 მ³/წმ. წყარალა უჩქჷ აფუნს დო ზარხულს, წყარმორჩილი რე ზათონც. ოფუტე ლახამულიშე ოფუტე შამგონაშახ ინგირწყარს ირინუანა ჯა-ტყაშ გიმასიონტაფალო, თუდოლენს — ოწყარალო, ინგირ-გალიშ ოწყარალი არხიშ მეშქაშალათ. ნოღა ჯვარწკჷმა გიკიდჷ ინგირწყარიშ ჰიდროელექტროსადგჷმქ. ოფუტე ტობარწკჷმა დოპროექტაფილიე 750 ვითარი. კვტ სიძალიარაშ ტობარჰესიშ გეკიდუა. ინგირწყარიშ მანგას გიშმურს სამარგალოშ დო აფხაზეთიშ რეგიონეფიშ ადმინისტრაციული სანძღო.

წყარმალუ ინგირი ოდუდეწკჷმა. ფონს უკახლე უშგულიშ ლამარია

ლიტერატურა

• უკლება ნ., ქორთული სხუნუეფიშ ენციკლოპედია, ტ. 4, ხს. 150, ქართი, 1979 წანა.