ტუნკუ აბდულ რაჰმანი
| ტუნკუ აბდულ რაჰმანი تونكو عبد الرحمن | ||
.jpg) ოფიციალური პორტრეტი, 1950-იან წანეფი | ||
| მალაიზიაშ მა-1 პრემიერ-მინისტრი | ||
|---|---|---|
| პოსტის გერინაშ ბორჯი | ||
| 31 მარაშინათუთა, 1957 – 22 ეკენია, 1970 | ||
| წიმოხონი | პოსტიქ გიჭყჷ | |
| მონძე | აბდულ რაზაკ ჰუსეინი | |
| პოსტის გერინაშ ბორჯი | ||
| 25 მარაშინათუთა, 1951 – 23 ღურთუთა, 1971 | ||
| წიმოხონი | ონ ჯაფარი | |
| მონძე | აბდულ რაზაკ ჰუსეინი | |
| დუნაბადი | 8 ფურთუთა, 1903 ალორ-სეტარი, კედაჰიშ სასულთანო | |
| ნაღურა | 6 ქირსეთუთა, 1990 (87 წანერი) კუალა-ლუმპური, მალაიზია | |
| მენოღალობა |  მალაიზია | |
| პოლიტიკური პარტია | რსხუშ პარტია (1952-1973) ბარისან ნასიონალი (1973-1988) გოართოიანაფილი მალაიარეფიშ ერუანული ორგანიზაცია (1946-1988) | |
| გონათაფა | კემბრიჯიშ უნივერსიტეტი | |
| რელიგია | სუნიზმი | |
| ხეშმოჭარუა |  | |
ტუნკუ აბდულ რაჰმანი (ჯავი. تونكو عبد الرحمن, დ. 8 ფურთუთა, 1903 — ღ. 6 ქირსეთუთა, 1990) — მალაიზიარი პოლიტიკოსი, მალაიზიაშ მა-1 პრემიერ-მინისტრი 1957-1970 წანეფს.[1] თინა, თაშნეშე რდჷ მალაიაშ ფედერაციაშ თარი მინისტრი 1955-1957 წანეფს, გოართოიანაფილი მალაიარეფიშ ერუანული ორგანიზაციაშ პრეზიდენტი 1951-1971 წანეფს დო რსხუშ პარტიაშ ლიდერი 1952-1971 წანეფს.[2] ტუნკუ რდჷ მალაიზიაშ, მუჭოთ დუდიშული დო ზოხორინელი სახენწჷფოშ დუმარსხუაფალო 1963 წანას. თინა მერჩქინელი რე მალაიზიაშ დუმარსხუაფალ-მუმათ.[3]
ტუნკუ აბდულ რაჰმანი რდჷ კედაჰიშ სასულთანოშ სულთანიშ აბდულ ჰამიდ ჰალიმიშ სქუა. გურაფულენდჷ კემბრიჯიშ უნივერსიტეტის.[4] გურაფაშ თებაშ უკულ მუშენდჷ კოლონიური ოთარობე სტრუქტურეფს. 1949 წანაშე მოღალენდჷ პროკურორო. პოლიტიკური პროცესეფს 1950-იან წანეფიშე ოკათუდჷ. 1951 წანას ტუნკუქ გოართოიანაფილი მალაიარეფიშ ერუანული ორგანიზაციაშ (გმეო) საპრეზიდენტო გიშაგორუეფს გემორძგჷ დო თე პარტიაშ ლიდერი გინირთჷ. ართ წანაშ უკულ, ტუნკუქ დარსხუ კოალიციური რსხუშ პარტია, მალაიზიაშ ჩინური ასოციაციაწკჷმა დო მალაიზიაშ ინდური კონგრესიწკჷმა ალიანსით. 1955 წანაშ გიშაგორუეფს კაბეტი უმენტაშობა მიპალჷ რსხუშ პარტიაქ დო ტუნკუქ გინირთჷ თარი მინისტრო.[5] თიქ, 1956 წანას, ლონდონიშ ხეკულუათ შელებუ მალაიაშ ზოხორინელობაშა მეჭირინაფა. ტუნკუშ ინიციატივათ, 1963 წანას გიჭყჷ დუდიშული მალაიზიაქ, ნამუთ იკათუანდჷ სინგაპურს, საბაჰის დო სარავაკის. მარა 1965 წანას სინგაპურქ მალაიზიაშ აკოდგინალუაშე ოფიციალურო გიშელჷ.
1969 წანას, რსხუშ პარტიაქ მანთხაშა მიპალჷ გომორძგუა გიშაგორუეფს, მარა უმენტაშობა ვემუღებჷ. გიშაგორუეფიშ უკულ, 13 მესის, კუალა-ლუმპურს არდგილი უღუდჷ ეთნიკური კონფლიქტის მალაიარეფს დო ჩინარეფს შქას. 1970 წანაშ ეკენიას, ტუნკუქ პრემიერ-მინისტრიშ პოსტიშე ოფიციალურო გეგნოდირთჷ. თინა დოთირუ აბდულ რაზაკ ჰუსეინქ. პოლიტიკაშე ულაშ უკულ, ტუნკუ აქტიური ფიგურათ სქიდუდჷ დო ფშხირას მონაწილენდჷ სპორტული დო რელიგიური საქვარეფს. უკინებუდჷ აზიაშ კუჩხბურთიშ კონფედერაციაშ პრეზიდენტიშ დო ისლამური წოროხანდაშ ორგანიზაციაშ გენერალური მელამოსეშ პოსტეფი. ტუნკუქ ღურუ 1990 წანაშ 6 ქირსეთუთას, 87 წანერქ. დასაფულებური რე კედაჰიშ ომაფე მავზოლეუმს.