უილიამ ტეკუმსე შერმანი
| უილიამ ტეკუმსე შერმანი William Tecumseh Sherman | ||
_(cropped).jpg) | ||
| ააშ-იშ არმიაშ თარსარდალი | ||
|---|---|---|
| პოსტის გერინაშ ბორჯი | ||
| 4 მელახი, 1869 – 1 გერგობათუთა, 1883 | ||
| პრეზიდენტი | ულის გრანტი რეზერფორდ ჰეისი ჯეიმზ გარფილდი ჩესტერ ართური | |
| წიმოხონი | ულის გრანტი | |
| მონძე | ფილიპ შერიდანი | |
| პოსტის გერინაშ ბორჯი | ||
| 6 ეკენია, 1869 – 25 გჷმათუთა, 1869 | ||
| პრეზიდენტი | ულის გრანტი | |
| წიმოხონი | ჯონ აარონ როულინსი | |
| მონძე | უილიამ უორტ ბელნაპი | |
| დუნაბადი | 8 ფურთუთა, 1820 ლანკასტერი, ოჰაიო, ააშ | |
| ნაღურა | ფურთუთა 14, 1891 (71 წანერი) ნიუ-იორკი, ააშ | |
| მენოღალობა |  ააშ | |
| ერუანობა | ამერიკალი | |
| პოლიტიკური პარტია | რესპუბლიკური პარტია | |
| მუმა | ჩარლზ რობერტ შერმანი | |
| ნანა | მერი ჰოიტ შერმანი | |
| ალმასქუ | ელეანორ ბოილი იუნგი | |
| სქუალეფი | 8 | |
| გონათაფა | ააშ-იშ ოურდუმე აკადემია | |
| ჯილდოეფი | კონგრესიშ მარდობუა (19 ფურთუთა, 1864 დო 10 ღურთუთა, 1865) | |
| ხეშმოჭარუა |  | |
უილიამ ტეკუმსე შერმანი (ინგლ. William Tecumseh Sherman; დ. 8 ფურთუთა, 1820 — ღ. 14 ფურთუთა, 1891) — ამერიკალი ოურდუმე მოღალე, ბიზნესმენი დო ჭარუ. მონაწილენდჷ ამერიკაშ ომენოღალე ლჷმას (1861-1865), სოდეთ დუდი გიმირჩქინჷ მუჭოთ წჷმოძინელი ოურდუმე სტრატეგოსიქ. შერმანი მერჩქინელი რე ართ-ართი უდიდაში გენერალო ააშ-იშ ისტორიას. მარა თის ფშხირას აკრიტიკენა უგუწყანაფუ ტაქტიკაშ გეშა, ნამუსჷთ თინა მეთხოზუდჷ მუში ოურდუმე კამპანიეფიშ მიმალობას, კონფედერაციული შტატეფიშ მეხჷ.
დებადჷ ოჰაიოშ ნოღა ლანკასტერს, შინელი ამერიკალი იურისტიშ ჩარლზ რობერტ შერმანიშ ფანიას. უილიამ შერმანი გურაფულენდჷ ააშ-იშ ოურდუმე აკადემიას, ნამუთ 1840 წანას გათუ. ართი პერიოდის, თიქ ოურდუმე კარიერა ქიმიოტუ დო ბიზნესის ქათხოზჷ, მარა მუთუნნერი შანულამი ფინანსური წჷმოძინეფიშა ვემიაჭირინუ. 1859 წანას ქიდეკინჷ გურაფაშ დო ოურდუმე აკადემიაშ ლუიზიანაშ შტატიშ სემინარიაშ (თეხანური ლუიზიანაშ შტატიშ უნივერსიტეტი) ხემანჯღვერიშ პოსტი. ლუიზიანაშ ააშ-იშ აკოდგინალუაშე გიშულაშ უკულ, შერმანქ პოსტიშე გეგნოდირთჷ. შერმანი, დუდშე დუდენდჷ ბრიგადას ბულ-რანიშ მაართა ლჷმას, 1861 წანაშ 21 კვირკვეს. უკულ გეგნიჸონეს ბჟადალი თეატრიშა. ომენოღალე ლჷმაშ დაჭყაფური პერიოდის, შერმანს პესიმისტური პოზიცია უღუდჷ დო ჸათეშ გეშათ თინა, ჭიჭე ხანიშ გოძვენას აკოანჯარაფილი ნძალეფიშე გოუტეს. მარა მალას კინ დართჷ არმიას დო ჯგირი ურთიართალა გაჭყჷ გენერალი ულის გრანტიწკჷმა. 1862-1863 წანეფს, გრანტიშ მანჯღვერალაშ თუდო, შერმანი მონაწილენდჷ ფორტ ჰენრიშ, ფორტ დონელსონიშ დო შაილოშ ლჷმეფს. წჷმოძინელი ოურდუმე კამპანიეფიშ შედეგო ქუდანთხუ კონფედერატეფიშ თარი სიმანგარექ, ვიკსბერგიქ დო მიჯალაგჷ კონფედერატეფიშ ნძალეფქ ტენესიშ შტატის.
1864 წანაშ ზარხულს, შერმანი დუდენდჷ კამპანიას, ნამუქჷთ შელებუ სტრატეგიული ნოღაშ, ატლანტაშ ეჭოფუა. ჯორჯიაშ შტატიშე, შერმანქ წიმიჭყჷ შინელი მარში ზუღაშა, ნამუქჷთ მოჯალაგუ კონფედერატეფიშ ოურდუმე აბანეფი, ინდუსტრია, ინფრასტრუქტურა. შედეგო, ძალამს დედაღარჷ კონფედერატეფიშ ეკონომიკური დო ოტრანსპორტე რშვილეფქ. 1865 წანაშ პირელიშო, კონფედერატეფიშ არმიეფქ კაროლინას, ჯორჯიას დო ფლორიდას კაპიტულაცია გეგმაცხადეს.
ომენოღალე ლჷმაშ თებაშ უკულ, შერმანი ნინალენდჷ შხვადოშხვა პოსტეფს. 1869 წანაშე რდჷ ააშ-იშ არმიაშ თარსარდალი დო 1869 წანაშ ეკენია-გჷმათუთას რდჷ ააშ-იშ ლჷმაშ ობორჯე მელამოსე. 1875 წანას, თიქ გჷმაბჟინუ მემუარეფი, ნამუთ ასე ხოლო შანულამი წყუ რე ამერიკაშ ომენოღალე ლჷმაშ რკვიებეფიშო.