უილიამ უოლესი
| უილიამ უოლესი Uilleam Uallas | ||
 უილიამ უოლესი (დევიდ ერსკინიშ ნახანტა) | ||
| შოტლანდიაშ მათხილარი | ||
|---|---|---|
| პოსტის გერინაშ ბორჯი | ||
| 1297 – 1298 | ||
| წიმოხონი | ჯონ ბალიოლი (მუჭოთ შოტლანდიაშ მაფა) | |
| მონძე | რობერტ ბრიუსი ჯონ კომინი | |
| დუნაბადი | დოხ. 1270 ელდერსლი, შოტლანდიაშ ომაფე | |
| ნაღურა | 23 მარაშინათუთა, 1305 (35 წანერი) ლონდონი, ინგლისიშ ომაფე | |
| ნთხორუ აბანი | ლონდონი | |
| მენოღალობა | .svg){kind=small} შოტლანდიაშ ომაფე | |
| მუმა | მალკოლმ უოლესი | |
| ნანა | მარგარეტ კროუფორდი | |
| ალმასქუ | მერიონ ბრეიდფიუიტი | |
უილიამ უოლესი (შოტ. Uilleam Uallas, დ. დოხოლაფირო 1270 — ღ. 23 მარაშინათუთა, 1305) — შოტლანდიარ აიარი დო ოურდუმე მოღალე, შოტლანდიაშ დუდიშულობაშო მალჷმარი, შოტლანდიაშ ერუანულ გერგეზი.[1]
1296 წანას, ინგლისიშ მაფაქ, ედუარდ I-ქ ხვისტაშე გეგთარაგუ შოტლანდიაშ მაფა ჯონ ბალიოლი დო დუდი გეგმაცხადჷ შოტლანდიაშ მამართალო.[2] ჸათე ფაქტით უკმაყოფილე შოტლანდიარეფქ ეარყეს, უილიამ უოლესიშ მანჯღვერალათ. 1297 წანას, უოლესიქ, მუშ მოხუჯეეფით, გეჭოფუ დო გეგნოჭუ ნოღა ლანარკი. შოტლანდიარეფქ ნოღაშ ინგლისარი შერიფი ხოლო დოჸვილეს.[3] ჸათეშ უკულ უოლესიქ წიმიჭჷ უმოს ფართე მასშტაბიანი ლჷმა ინგლისარეფიშ მეხჷ. უოლესიქ ნძალეფი აკაართიანჷ ენდრიუ დე მორეიწკჷმა.[4]
1297 წანაშ 11 ეკენიას, უოლესიქ დო დე მორეიქ მიოჭირინეს უდიდაშ გომორძგუას, სტერლინგიშ ხინჯიშ ლჷმას.[5] ჸათე ბურჯაფის, შოტლანდიარეფქ კონწარო დამარცხეს ინგლისარეფი. შოტლანდიაქ ინგლისიშ მართუალაშე გედუდიშულჷ. 1297 წანას უოლესი გეგმაცხადეს აიარო დო გეგშაგორეს შოტლანდიაშ მათხილარო.[6] უოლესიქ ქიდიჭყჷ აკოანჯარაფილი ნძალეფიშ რეორგანიზაცია, მარა თიში წჷმოძინეფი ბრელ ხანს ვაგაგინძორებე. 1298 წანას, ინგლისარეფქ ორჯგინეს უოლესის ფალკირკიშ ლჷმას.[7] თე წანას თიქ შოტლანდიაშ მათხილარიშ პოსტიშე გეგნოდირთჷ დო აქტიური გაგინძორჷ პარტიზანული ლჷმეფი ინგლისარეფიშ სააწმარენჯოთ.
1305 წანას, გლაზგოშ გოხოლუას, ინგლისარეფქ უოლესი ოჭოფეს დო ლონდონშა მიდეჸონეს, სოდეთ გასამართეს დო გითოჩამა ქეკადვეს.[8] 1305 წანაშ 23 მარაშინათუთას, უილიამ უოლესი ღურათ დასაჯეს კონწარი დო უბადო მეთოდეფიშ გჷმორინაფათ.[9]
თეხანური შოტლანდიას, უოლესი მერჩქინელი რე შოტლანდიაშ დუდიშულობაშ ერუანული სიმბოლოთ. თიშ ლეგენდარულ რინაშ გეშა გინოღალირი რე ოსკარიშ მაღვენჯი ფილმი უშქურანჯი გური, სოდეთ უოლესიშ როლს არსულენს შინელი ამერიკალი მსახიობი მელ გიბსონი.[10]
სქოლიო
[რედაქტირაფა | წყუშ რედაქტირაფა]- ↑ https://www.britannica.com/biography/William-Wallace
- ↑ https://www.britannica.com/biography/Edward-I-king-of-England
- ↑ https://www.britannica.com/biography/William-Wallace
- ↑ https://www.britannica.com/biography/Andrew-de-Moray
- ↑ https://www.britannica.com/event/Battle-of-Stirling-Bridge
- ↑ https://www.britannica.com/topic/guardian-of-Scotland
- ↑ https://www.britannica.com/event/Battle-of-Falkirk
- ↑ https://www.britannica.com/biography/William-Wallace
- ↑ https://www.britannica.com/biography/William-Wallace
- ↑ https://www.britannica.com/topic/Braveheart-film-by-Gibson