ფრანსისკო იგნასიო მადერო
| ფრანსისკო იგნასიო მადერო Francisco I. Madero | ||
 ფრანსისკო იგნასიო მადერო 1910-იან წანეფს | ||
| მექსიკაშ პრეზიდენტი | ||
|---|---|---|
| პოსტის გერინაშ ბორჯი | ||
| 6 გერგობათუთა, 1911 – 19 ფურთუთა, 1913 | ||
| წიმოხონი | ფრანსისკო ლეონ დე ლა ბარა | |
| მონძე | პედრო ლასკურაინი | |
| დუნაბადი | 30 გჷმათუთა, 1873 პარას-დე-ლა-ფუენტე, მექსიკა | |
| ნაღურა | ფურთუთა 22, 1913 (39 წანერი) მეხიკო, მექსიკა | |
| ღურაშ ბაძაძი | ჸვილუა | |
| მენოღალობა |  მექსიკა | |
| პოლიტიკური პარტია | პროგრესულ-კონსტიტუციონალისტური პარტია | |
| მუმა | ფრანსისკო მადერო ერნანდესი | |
| ნანა | მერსედეს გონსალეს ტრევინიო | |
| ალმასქუ | სარა პერეს რომერო | |
| გონათაფა | კალიფორნიაშ უნივერსიტეტი | |
| საქვარუა | ბიზნესმენი, ჭარუ, რევოლუციონერი, პოლიტიკოსი | |
| ხეშმოჭარუა |  | |
ფრანსისკო იგნასიო მადერო გონსალესი (ესპ. Francisco Ignacio Madero González; დ. 30 გჷმათუთა, 1873 — ღ. 22 ფურთუთა, 1913) — მექსიკარი ბიზნესმენი, ჭარუ, რევოლუციონერი, პოლიტიკოსი, მექსიკაშ პრეზიდენტი 1911-1913 წანეფს. მადეროშით დიჭყჷ მექსიკაშ რევოლუციაქ, დიქტატორი პორფირიო დიასიშ სააწმარენჯოთ.
დებადჷ გოლინიანი დო დინდარი ფანიას. გურაფულენდჷ ბიზნესის პარიზიშ კომერციაშ სკოლას. ართი პერიოდის გურაფულენდჷ კალიფორნიაშ უნივერსიტეტის ხოლო. მადერო პოლიტიკური პროცესეფს ახალნორდული წანეფიშე მონაწილენდჷ. რდჷ დემოკრატიული პრინციპეფიშ ადვოკატი დო კონწარო ოპონირენდჷ მექსიკაშ თიხანური დიქტატორს პორფირიო დიასის. მალას მადეროქ შანულამი პოპულარობა მიპალუ დო 1910 წანაშ საპრეზიდენტო გიშაგორუეფს დუდი ოფიციალურო ქჷმწარინუ პრეზიდენტობაშ კანდიდატო. დიასიქ გიშაგორუეფი გაყალბჷ დო მადერო აჭოფაფუ. მადეროქ დუდი გომორძგვილო გეგმაცხადჷ, ჯიხაშე ინტუ დო ამერიკაშა გეგნორთჷ. 1910 წანაშ 5 გჷმათუთას, მადეროქ გჷმაბჟინუ პოლიტიკური დოკუმენტი, სოდეთ აცხადენდჷ ნამდა გიშაგორუეფი რდჷ გაყალბებული დო უციოთ ოხვილური რდჷ ოურდუმე არყება დიასიშ ავტოკრატიული რეჟიმიშ მეხჷ.
მადეროშ მოხუჯე აკოანჯარაფილი ნძალეფი უმოსო კონცენტრირაფილი რდეს ოორუე მექსიკას. თინეფს ანჯარით დო ფინანსეფით ამერიკა ოხვარუდჷ. მადეროქ რევოლუციური ლიდერეფი ქჷმწარინუ პანჩო ვილია დო პასკუალ ოროსკო. მადეროქ ტეხასიშე მექსიკაშა გეგნორთჷ დო არყებული რევოლუციონერეფიშ მანჯღვერალა გეჭოფუ ხეშა. მაართა შანულამი ბურჯაფის, ნოღა კასას-გრანდესიშ გოხოლუას, მექსიკაშ ფედერალური არმიაქ დამარცხჷ არყებულეფი. ჸათე მარცხიშ უკულ, მადეროქ ოურდუმე მანჯღვერალა ქიმიოტუ. 1911 წანაშ პირელი-მესის მოხვადჷ მექსიკაშ რევოლუციაშ დაჭყაფური პერიოდიშ ართ-ართი უშანულამაში ლჷმაქ (სიუდად-ხუარესიშ ლჷმა). არყებულეფქ, ვილიაშ დო ოროსკოშ მანჯღვერალათ ორჯგინეს ოთარობე ნძალეფს დო გეჭოფეს ნოღა სიუდად-ხუარესი. ჸათე მარცხიშ უკულ, 1911 წანაშ 21 მესის, დიდვინჷ სიუდად-ხუარესიშ ხეკულუაქ, ნამუსჷთ ხე მაჭარეს მადეროქ დო დიასიქ. ხეკულუაშ ნძალათ, დიასიქ პოსტიშე გეგნოდირთჷ. დიასი დოთირუ ობორჯე პრეზიდენტიქ, ფრანსისკო ლეონ დე ლა ბარაქ. თაშნეშე, ხეკულუაშ ართ-ართი პიჯალათ ოკო იტარინუკო ახალი საპრეზიდენტო გიშაგორუეფქ.
1911 წანაშ 7 მანგის, გომორძგვილი მადეროქ, მუში მოხუჯეეფიწკჷმა ართო მეხიკოშო გემშართჷ. სუმი თუთაშ უკულ, მადეროქ გიშაგორილქ იჸუ მექსიკაშ ახალი პრეზიდენტო. მადერო სარგებლენდჷ უდიდაში გოლინათ დო პოპულარობათ, მარა მალას პოლიტიკური სიტუაციაქ დითირჷ, მუჟამსჷთ თის გურჩქინდჷ ნძალიერი ოპონენტეფქ: კონსერვატორეფქ დო რადიკალი რევოლუციონერეფქ. მადეროშ თარობაქ ვაგატარჷ დიხაშ რეფორმა. ჸათეშ გეშათ მადეროშ ბრელი მოხუჯე რდჷ უკმაყოფილე. მალას მადეროშ მეხჷ ეარყეს თიში ჸოფილი ალმარენჯეფქ: ემილიანო საპატაქ დო პასკუალ ოროსკოქ.
1913 წანაშ ფურთუთას, ქუმოხვადჷ სახენწჷფო გინორთაქ, კონსერვატორი გენერალეფიშ ფელიქს დიასიშ (პორფირიო დიასიშ ჯიმასქუა), ბერნარდო რეიესიშ დო ვიქტორიანო უერტაშ დუდალათ. მადერო ოჭოფეს დო 1913 წანაშ 22 ფურთუთას, დოჸვილეს. თიწკჷმა ართო დოჸვილეს ვიცე-პრეზიდენტი ხოსე მარია პინო სუარესი დო მარედოშ უკულაში ჯიმა გუსტავო.